Fransanın təxribatları ara vermir. Paris, Marsel və Strasburq merləri Fransanın Qarabağa yeni humanitar yükünü müşayiət edəcək.
“Fransadan 10 ağır yük maşınından ibarət humanitar karvan avqustun 30-da Kornidzora - Ermənistan Artsaxının girişinə yola düşəcək”, - Fransanın “Le Figaro” jurnalının direktor müavini Jan-Kristof Buisson bu barədə öz Twitter hesabında yazıb. O qeyd edib ki, yük Fransadakı Erməni Təşkilatlarının Koordinasiya Şurasının (CCAF) köməyi ilə yığılıb. Yükü Fransanın bir sıra regionlarının nümayəndələri müşayiət edəcək. Nümayəndə heyətinə Parisin meri Anna Hidalqo rəhbərlik edəcək. Nümayəndə heyətinə Marsel və Strasburq merləri, həmçinin Fransanın bir sıra regionlarının rəhbərləri də daxildir.
Görünən odur ki, Fransa Ağdam-Xankəndi yolu məsələsində Azərbaycanın göstərdiyi prinsipiallığı həzm etmək istəmir. Ancaq nə etsələr də, hər halda Fransa merlərini də sərhəddəki 40 TIR-ın aqibəti gözləyir.
“Gedib Fransa səfirliyində “sok” içməkdən ötrü Azərbaycanın mənafeyini qurban verməyə hazırdılar”
Məsələ ilə bağlı “Bakı-Xəbər”ə açıqlama verən Böyük Azərbaycan Partiyasının sədri Elşad Musayevin fikrincə, heç bir qüvvə Azərbaycanı zor gücü ilə nəyəsə məcbur edə bilməz: “Məlum olduğu kimi, ermənilər “TIR şousunu” davam etdirirlər. Bütün dünyaya car çəkirlər ki, guya Qarabağda etnik ermənilər acından ölür. Sözügedən məsələdə də açıq-aşkar onların arxasında dayanan ölkə Fransadır. Faktiki olaraq, Fransa bu məsələdə ən azğın, provokativ mövqedən çıxış edir. O Fransa ki, zaman-zaman müxtəlif ölkələrdə insanlıq əleyhinə cinayətlərdə bilavasitə iştirak edib. İndinin özündə də talançılıq siyasəti yeridir. Afrika ölkələrinin təbii sərvətlərini talayır. Hazırda faktiki olaraq Fransanı Afrikadan iti qovan kimi qovurlar. Ancaq bütün bunlara baxmayaraq, Fransa yenə də başqa dövlətlərin daxili işinə müdaxilə edir. Bunun bir hissəsi də Azərbaycana yönəlik addımlardır. İndi də humanitar yardım adı altında Fransa Azərbaycanla Ermənistan arasında gərginliyi artırmağa çalışır. Hesab edirəm ki, Paris, Marsel və Strasburq merlərinin yardımının qarşısını Azərbaycan qətiyyətlə alacaq. İmkan verməyəcək ki, Fransa öz təxribatçı fəaliyyətini həyata keçirsin. Bütövlükdə, bu kimi təxribatlara sərt cavab verilməlidir. Heç bir yük Laçın sərhədindən buraxılmamalıdır. Xankəndiyə humanitar yük daşınacaqsa, bu, Ağdam yolu ilə həyata keçirilməlidir. Kimin olmasından asılı olmayaraq Azərbaycan bu məsələdə sərt və qətiyyətli mövqeyini davam etdirməlidir. Fikrimcə, hər hansı provokasiyaya getmək olmaz. Səbrli və təmkinli olmaq lazımdır. Eyni zamanda Fransaya sərt təpki verilməlidir. Bununla yanaşı, Azərbaycanda anti-Fransa ovqatı güclənməlidir. Çünki ölkənin siyasi çevrələrində xeyli insanlar var ki, gedib Fransa səfirliyində “sok” içməkdən ötrü Azərbaycanın mənafeyini qurban verməyə hazırdır. Həmin adamlar Fransa əleyhinə danışmırlar. Ancaq indiki halda Azərbaycan dövlətinin əleyhinə fəaliyyət göstərən əsas ölkələrdən biri Fransadır. Ona görə də Fransanın bu hərəkətini şiddətlə qınayır və lənətləyirəm. O üzdən, ölkəmizdəki bütün siyasi qüvvələr Fransaya öz etirazını bildirməlidir”.
Vidadi ORDAHALLI
