İran əxlaq polisinin zorakılığı nəticəsində ölən Məhsa Əmininin qətlindən sonra başlayan və aylardır bütün şəhərlərə yayılan aksiyalar səngimək bilmir. Aksiyaların genişlənməsi fonunda İran hakimiyyəti repressiv metodlarını da genişləndirir. Belə ki, aksiyalarda indiyə qədər hakimiyyət qüvvələrinin açdığı atəş nəticəsində onlarla insan ölüb, yüzlərlə aksiyaçı isə yaralanıb.
İran rejiminin zorakılıqlarına tək böyüklər deyil, uşaqlar da etiraz edir. Bu günlərdə İranda azyaşlı bir uşaq küçədə “Qadın, Həyat, Azadlıq”, “İnsan, Vətən, Yenilik” şüarları səsləndirib. Bu barədə “Azad İran” “Telegram” kanalı məlumat yayıb.
Qeyd edək ki, İranın ayrı-ayrı şəhərlərində müntəzəm olaraq antihökumət nümayişləri səngimək bilmir.
“Tehran hakimiyyətinin yürütdüyü anormal siyasətin nəticəsidir ki, onun yeniyetmə məktəbli vətəndaşları vaxtından əvvəl cəmiyyətin bəlalarını dilə gətirməyə məcbur olur”
Orta Doğu Araşdırma Mərkəzinin rəhbəri Sədrəddin Soltan “Bakı-Xəbər”ə açıqlamasında qeyd etdi ki, İranda yaşayan uşaqlar ailədə valideynlərinin, böyüklərinin çəkdikləri çətinliyi görür, yaşayır. Onlar görür ki, ata-analarının geyiminə, azadlıqlarına müdaxilə edilir: “Uşaqlar valideynlərinin aylıq əmək haqqının gecikməsindən də əziyyət çəkir. Nəzərə almaq lazımdır ki, uşaqlar istənilən məsələdə həssasdır. Onlar bu çətinlikləri görə-görə böyüyürlər. Uşaqlar, həmçinin, məktəbdə ayrıseçkiliyi, diskriminasiyanı də görür. Onlar məktəbdə hicab taxmayan sinif yoldaşlarına necə təzyiq edildiyini də müşahidə edir. Sözün düzünü deyən sinif yoldaşlarının necə cəzalandırıldığının da şahidi olurlar. Bu baxımdan uşaqların, yeniyetmələrin “Qadın, Həyat, Azadlıq”, “İnsan, Vətən, Yenilik” şüarları səsləndirməsi normaldır. Əslində, uşaqların bu cür şüarlar səsləndirməsi cəmiyyət üçün anormal hal sayılmalıdır. Nəzərə almaq lazımdır ki, çətinlik, təzyiq içində böyüyən nəsil vaxtından əvvəl yetkinləşir. Ancaq bu böyümə ilə yanaşı, həmin nəsil vaxtından qabaq da siyasiləşir. Bütün bunların hamısı Tehran hakimiyyətinin yürütdüyü anormal siyasətin nəticəsidir ki, onun yeniyetmə məktəbli vətəndaşları vaxtından əvvəl cəmiyyətin bəlalarını dilə gətirməyə məcbur olur”.
Günel CƏLİLOVA
