“Danışıqlar yolu ilə bunu etmək mümkün deyildi və müharibə yeganə çıxış yolu idi”. Bunu Prezident İlham Əliyev “Laçın Şəhəri Günü” bayram tədbirindəki çıxışında deyib.
Ölkə başçısı deyib ki, biz ədalətli müharibə aparmışıq: “Bizim başqa ölkələrin torpağında gözümüz yoxdur, ancaq öz torpağımızı biz heç kimə verən də deyilik. Bu məsələ ilə bağlı hələ işğal dövründə dəfələrlə mən Azərbaycan dövlətinin mövqeyini ifadə edərək deyirdim ki, heç vaxt Azərbaycan xalqı işğalla barışmayacaq, nəyin bahasına olursa-olsun, öz doğma torpaqlarına qayıdacaqdır və belə də oldu. Xarici ölkələrdən, Yaxın Şərqdən erməniləri buraya dəvət edib onları bizim, azərbaycanlıların evlərində yerləşdirmişdi. Bir daha demək istəyirəm ki, bu, hərbi cinayətdir. Əfsuslar olsun ki, beynəlxalq təşkilatlar, Ermənistanın havadarları buna göz yumurdular. Bu onlar üçün məqbul idi. Çünki Ermənistan dövləti kimi, Ermənistanın xaricdəki havadarları da hesab edirdilər ki, bu torpaqlar əbədi işğal altında qalmalıdır. Bizim iradəmiz, bizim gücümüz, bizim yumruğumuz onların da başına dəydi. Çünki bizim torpağımızda ikinci Ermənistan, ikinci erməni dövlətinin yaradılması təkcə Ermənistan rəhbərliyinin məhsulu deyildi”.
“Azərbaycan 44 günlük müharibə ilə ərazilərini işğaldan azad etdi, BMT qətnamələrini güc yolu ilə təmin etdi”
Sözügedən məsələni “Bakı-Xəbər”ə şərh edən politoloq Elşən Manafovun fikrincə, Prezident İlham Əliyevin uğurlu siyasəti Ermənistanın və onun himayədarlarının planlarını pozdu: “Beynəlxalq güclər arasında uzun müddət ideoloji zəmində gedən qarşıdurmanın geosiyasət müstəvisi üzərinə keçməsi beynəlxalq hüquq və onu qorumalı olan beynəlxalq təşkilatların da durumuna təsirsiz ötüşmədi. Zamanında BMT Təhlükəsizlik Şurasının Qarabağla bağlı məlum 4 qətnaməsinin icra olunmamasi məhz onunla bağlı amillərdən irəli gəlib. Qarabağ münaqişəsi SSRİ kimi geosiyasi nəhəngi çökdürmək məqsədilə ABŞ tərəfindən idarə olundu. Ermənistandakı dairələrdən bir maşa kimi istifadə etdilər. Nəhayət, Qərbin Sovet rəhbərliyinə transfer edilmiş məlum təsir agentlərinin vasitəsilə bunu həyata keçirdilər. Müstəqilliyimizin ilk illərində dövlət və ordu quruculuğu ilə yanaşı, məlum dairələrin dəstəyi ilə Azərbaycana qarşı başlanmış təcavüz daxildə milli birliyin əldə edilməməsi, Qərblə bu və digər mənada əməkdaşlıq edən millətçi quvvələrin hakimiyyət uğrunda apardıqları mübarizə ölkəmizi zəif duruma saldı. Yalnız ümummilli lider Heydər Əliyevin hakimiyyətə gəlməsi ilə daxildə separatçı qüvvələrin müqaviməti qırıldı. Ordunun siyasiləşməsinin qarşısı alındı. Dövlət çevrilişinə cəhdlər puça çıxdı. Ən əsası, bölgədə nüfuz dairəsi uğrunda mübarizə aparan tərəflərlə uğurlu danışıqlardan sonra müstəqilliyimiz üçün olan ciddi təhlükə sovuşdurulmuşdu. Atəşkəsin əldə edilməsi ölkədə daxili sabitliyi təmin etməyə, hüquqi dövlət quruculuğunu davam etdirməyə şərait yaratdı. İqtisadiyyatın yüksəlişi məqsədilə ölkəyə investisiyalar cəlb edilib. Əsrin kontraktı və sonrakı neft-qaz müqavilələri geosiyasi güc mərkəzləri arasında Azərbaycana maraq yaratsa da, ölkənin əsas problemi olan Qarabağ məsələsinin həlli istiqamətində ciddi uğurlar əldə edilməmişdi. Danışıqlar nəticə vermirdi. Ümmummilli liderin siyasi varisi Prezident İlham Əliyev bütun bunları görür və qəti, həlledici və sarsıdıcı zərbənin endirilməsi üçün müvafiq zamanın yetişməsini gözləyirdi. Ən əsası, neft və qaz kontraktlarından əldə edilən milyardlarlarla vəsait problemi güc yolu ilə həll edə biləcək müasir və modern ordunun formalaşdırılmasına, onun hərbi qabiliyyətinin gücləndirilməsinə yönəldilirdi. Müvafiq olaraq sosial dövlət modeli uğurla həyata keçirilir, ordu və xalq arasında vəhdət və birliyin təminatı məqsədilə ardıcıl tədbirlər həyata keçirilirdi. Başlıcası isə, həlledici zərbənin endirilməsi üçün beynəlxalq güclər arasında Ermənistan hakimiyyətinə münasibətdə fərqli baxışların yetişəcəyi vaxtı gözləmək lazim idi. Nəhayət bu vaxt gəlib çatdı. Azərbaycan 44 günlük müharibə ilə ərazilərini işğaldan azad etdi, BMT qətnamələrini güc yolu ilə təmin etdi”.
Vidadi ORDAHALLI
