Ermənistanın ekocinayətləri nəinki Azərbaycan, eləcə də bütün region üçün ciddi təhdiddir. Bunu qonşularımızın bəziləri hələ dərk etmək istəmir. Azərbaycan ərazisində ekoloji terror törətməklə kifayətlənməyən Ermənistanın bütün beynəlxalq hüquq normalarını, qəbul olunmuş bütün aidiyyəti konvensiyaları, tələbləri pozaraq Naxçıvanla sərhəddə, Arazdəyəndə metallurgiya zavodu tikdiyi məlumdur.
Ermənistanın Azərbaycanla, Naxçıvan Muxtar Respublikası ilə həmsərhəd ərazisində - Yerasx (Arazdəyən) kəndində 16 500 kvadratmetr sahədə illik istehsal gücü 180 000 ton olan iri metallurgiya zavodunun inşasının aparılması ilə bağlı Azərbaycan tərəf ən müxtəlif formalarda öz narazılığını bildirib.
Ermənistanın Naxçıvanla sərhəddə tikdiyi metaləritmə zavodunun inşasının dayandırılması ilə bağlı Azərbaycan QHT-ləri hərəkətə keçib, beynəlxalq ictimaiyyətə, beynəlxalq təşkilatlarla məktub yazıblar, müraciətlər ediblər, Naxçıvanda faəliyyət göstərən QHT-lər də dünya birliyinə öz etirazlarını çatdırıblar. Amma təəssüf ki, hələ də Ermənistana “gözün üstə qaşın var” deyən olmayıb, əksinə, müxtəlif səfirliklərin, xarici nümayəndəliklərin təmsilçiləri əraziyə gələrək ermənilərə dəstək verirlər.
Azərbaycan QHT-lərinin sözügedən zavodun inşasının dayandırılmasına nail olana qədər mübarizə aparmağa hazır olduğu məlumdur, bu onların bəyanat və müraciətlərində də öz əksini tapıb. Naxçıvana Azərbaycan ekofəallarının səfərini təşkil etmək, hadisə ilə bağlı yerində araşdırma aparmaq necə olar?
“Bu halda onlar sərhəddəki fəaliyyətləri, monitorinqləri, müşahidələri ilə Ermənistanın növbəti ekocinayətini ifşa edəcəklər”
Azərbaycan Milli QHT Forumunun prezidenti Rauf Zeyni “Bakı-Xəbər”ə şərhində “Ermənistanın Naxçıvanla sərhəddə yerləşən Arazdəyəndə tikdiyi metaləritmə zavodunun inşasının dayandırılması ilə bağlı QHT-lər çox geniş fəaliyyət göstərirlər və bəyanatlar verirlər, bütün beynəlxalq təşkilatlara, o cümlədən də bu ölkənin rəhbərliyinı müraciətlər edirlər. Azərbaycan QHT-ləri bütün dünyanı regionda ekoloji tarazlığın, balansın pozulmasına səbəb olan və eyni zamanda gələcək fəsadlara, baş verəcək ekoloji genosidə qarşı birgə mübarizə aparmağa çağırıb. Ermənistan bu zavodun inşasını başa çatdırıb onu işə salarsa, bu nəinki Azərbaycanın, bütövlükdə Cənubi Qafqazın ekologiyasını zəhrərləyəcək, bu da insanların sağlamlığına zərər vuracaq, onlara yaşamaq üçün imkan verməyəcək. Bu baxımdan QHT-lərin fəallığı yüksək qiymətləndirilir”-deyə bildirdi.
R.Zeyni qeyd etdi ki, Azərbaycan eko QHT-lərinin, bütövlükdə vətəndaş cəmiyyətinin bu yöndə aktivliyi davam etməlidir. O hesab edir ki, Azərbaycan tərəf Ermənistanın bu ziyanlı fəaliyyətinin dayandırılması üçün bütün mümkün variantlardan istifadə edir. “Hadisələri yerindəcə araşdırmaq üçün Azərbaycan ekofəallarının, mütəxəssislərin Naxçıvana səfərinin təşkil edilməsi çox böyük nəticə verə bilər. Onların Naxçıvanla Ermənistan sərhədinə səfərləri təşkil edilməlidir. Bu halda onlar sərhəddəki fəaliyyətləri, monitorinqləri, müşahidələri ilə Ermənistanın növbəti ekocinayətini ifşa edəcəklər. Eyni zamanda xarici təşkilatlarla səfərlər təşkil oluna, xarici səfirliklərlə görüşlər keçirilə, onlara da vəziyyət izah oluna bilər. Hesab edirəm ki, beynəlxalq müstəvidə daha sivil səviyyədə bu kampaniya davam etməlidir. Əlbəttə, bu istiqamətdə ardıcıl, sistemli şəkildə mübarizə aparmaq vacibdir və bu zaman bu aksiya öz müsbət nəticəsini verə bilər”-deyə R.Zeyni qeyd etdi.
Leyla QARAXANLI
