Prezident İlham Əliyev “Laçın Şəhəri Günü” bayram tədbirindəki çıxışında belə bir məqamı xüsusi qeyd etdi:
“Bildiyiniz kimi, bu il aprelin 23-də Laçın rayonunda, Azərbaycan-Ermənistan sərhədində sərhəd-buraxılış məntəqəsi qoyulmuşdur. Bir daha iradə, cəsarət, öz gücünə əminlik nümayiş etdirərək biz bunu etdik. Nə qədər bizə təzyiqlər oldu, nə qədər hədə-qorxular oldu. Bu gün də davam edir, bu gün də müxtəlif beynəlxalq təşkilatlar çərçivəsində Ermənistan və onun arxasında dayananlar bizə qarşı müxtəlif fitnələr ortaya atırlar. Heç bir şey bizi yolumuzdan döndərə bilməz. 23 aprel bizim ərazi bütövlüyümüzün tam bərpası deməkdir. Sərhəd-buraxılış məntəqəsinin qurulması ərazi bütövlüyümüzün tam bərpası deməkdir və bunu biz beynəlxalq hüquq çərçivəsində etdik, biz öz ərazimizi qoruyuruq, öz sərhədlərimizi qoruyuruq və qoruyacağıq”.
Görünən odur ki, Azərbaycanın ərazi bütövlüyünün təmin olunması baxımından 23 aprel xüsusi əhəmiyyət kəsb edir. Çünki 23 aprel böyük tarixdir və Prezident bunu təsdiqlədi. Bütün bu deyilənlərin fonunda, 23 aprelin tarixləşdirilməsi və simvollaşdırılması üçün nə etmək olar? Bu işi kim icra etməlidir?
“23 aprel çox böyük tarixi əhəmiyyət kəsb edir və rəsmi səviyyədə simvollaşdırılmalıdır”
AVCİYA-nın vitse-prezidenti, professor Məhərrəm Zülfüqarlı “Bakı-Xəbər”ə açıqlamasında bununla bağlı bir sıra məqamlara toxundu: “Prezidentin dediyi fikirlər tamamilə həqiqəti özündə əks etdirir. Çünki 44 günlük müharibədən sonra Laçın dəhlizinin ermənilər tərəfindən istifadə edilməsi, sülhməramlıların bir sıra məsələləri görməzdən gəlmələri məlum təxribatların baş verməsinə səbəb oldu. Rusiya qüvvələri sülhməramlı adı ilə fəaliyyət göstərsələr də, ermənilərin Qarabağa silah daşıması, muzdluların ora gəlməsi üçün hər cür şərait yaradırdılar. O cümlədən, müxtəlif təxribatlara dəstək verirdilər. Ancaq bu il aprelin 23-də Azərbaycanın Laçın yolunun başlanğıcında nəzarət-buraxılış məntəqəsi qurması bütün təxribatların qarşısının alınmasında əhəmiyyətli rol oynadı. Ona görə də 23 apreldə nəzarət-buraxılış məntəqəsi qurulması Azərbaycanın ərazi bütövlüyünün bərpasında mühüm əhəmiyyət kəsb edir. Bir növ bu hadisə Azərbaycanın ərazi bütövlüyünün təmin olunması prosesinin tamamlanmasında mühüm rol oynadı. Bəzi məlumatlara görə, ermənilər rus sülhməramlılarına məxsus helekopterlərlə Qarabağa silah daşıyır. Hesab edirəm ki, bunun da qarşısı alınsa, gələcəkdə nəzarət tam Azərbaycan tərəfinə keçəcək. Düzdür, bir sıra beynəlxalq təzyiqlər var. Xüsusən də Fransanın canfəşanlığı daha çox özünü göstərir. Bəzi ermənipərəst senatorların çağırışlarına baxmayaraq, Azərbaycan öz mövqeyində qərarlıdır. Aprelin 23-nə qədər Qarabağa qanunsuz yüklərin daşınması kütləvi xarakter daşıyırdı. Ancaq artıq ermənilər bundan məhrum olublar. Ona görə də 23 aprel çox böyük tarixi əhəmiyyət kəsb edir və rəsmi səviyyədə simvollaşdırılmalıdır. Çünki bu, Ermənistanın qanunsuz əməllərinin qarşısına bir sədd çəkmiş oldu. Ona görə də cəmiyyət 23 aprelin önəmi barədə maarifləndirilməlidir. Çünki 23 apreldə nəzarət-buraxılış məntəqəsinin qurulması həm də bir dönüş mərhələsi oldu”.
Vidadi ORDAHALLI
