“Ermənistanda bu gün heç bir ekoloji norma və standartlar gözlənilmədən aparılan dağ-mədən sənayesi işlərində ətraf mühitə ciddi zərər vurulur, ekoloji fəsadlar yaranır”.
Bu, "Ermənistan Respublikası ərazisindəki hasilat mədənlərinin kosmik monitorinqinə dair hesabat"da öz əksini tapıb.
Hesabatda qeyd olunub ki, bu barədə Ermənistanın öz mətbuatlarında çoxlu neqativ məlumatlar işıqlandırılır. Ermənistanda mədən sənayesinə yatırılan investisiyanın həcmi artsa da, bu proses ekoloji vəziyyətin sürətli şəkildə məhvi ilə müşayiət olunur: “Mədən sənayesində davam edən fəaliyyət region ölkələrinin ekoloji durumuna təsirsiz ötüşmür. Mədənlərin bir çoxunun su mənbələrinin yaxınlığında yerləşməsi ətraf mühit üçün zərərli hesab edilən kimyəvi tullantıların çaylara axıdılmasına gətirib çıxarır. Azərbaycanın yerüstü su ehtiyatlarının təxminən 70 faizi qonşu ölkələrdə formalaşıb, transsərhəd su axınları hesabınadır. Ermənistan coğrafi baxımdan Azərbaycandan keçən çayların hövzəsində yerləşdiyinə görə onun ərazisində həyata keçirilən mədən sənayesi üzrə hər hansı bir tədbir ekoloji baxımdan mütləq ölkəmizə təsir edir. Ermənistan Espoo konvensiyasının üzvü kimi ölkə ərazisində aparılan hansısa fəaliyyət barəsində məsləhətləşməli və bir çox hallarda Azərbaycanın razılığını almalı, razılıq əldə ediləndən sonra hansısa fəaliyyət həyata keçirilməlidir".
Açıqlanan hesabatdan bəlli olur ki, ermənilərin özləri ekoloji terror törətdiklərini etiraf edir.
“Ermənistan Respublikası ərazisində hasilat mədənlərinin fəaliyyəti heç bir normaya uyğun olmayıb, bununla bağlı Azərbaycan tərəfi dəfələrlə beynəlxalq ictimaiyyəti məlumatlandırsa da…”
Siyasi şərhçi Tural İsmayılov “Bakı-Xəbər”ə açıqlamasında qeyd etdi ki, Ermənistanın həyata keçirdiyi fəaliyyət həm özünün, həm də ətraf bölgələrin ekologiyasına ciddi zərbə vurur. Bugünə qədər ölkəmiz tərəfindən dəfələrlə beynəlxalq təşkilatlara məlum problemlə bağlı müraciət olunub: “Nəzərə almaq lazımdır ki, Ermənistanda uzun müddət “Metsamor” Atom Elektrik Stansiyası fəaliyyət göstərib. Məhz bu stansiyanın fəaliyyəti bölgənin ekoloji durumuna ciddi təsir edib”.
Həmsöhbətimiz onu da əlavə etdi ki, Ermənistan Respublikası ərazisində hasilat mədənlərinin fəaliyyəti də heç bir normaya uyğun olmayıb. Bununla bağlı Azərbaycan tərəfi dəfələrlə beynəlxalq ictimaiyyəti məlumatlandırıb: “Ancaq bugünə kimi Ermənistana “gözün üstə qaşın var” deyən olmayıb. Əksinə, Ermənistanın ekoloji cinayətlərinə başqa ölkələrin şirkətləri də qoşulub. Məsələn, Oxçuçayın çirkləndirilməsi prosesində alman şirkəti iştirak edib. Bu səbəbdən də hesab edirəm ki, qlobal ekoloji problem baş qaldırdığı üçün Ermənistanın fəaliyyəti ciddi şəkildə təftiş edilməlidir”.
Günel CƏLİLOVA
