Qarabağda qalan ermənilər arasında gərgin vəziyyətin hökm sürməsi məlum həqiqətdir. Amma belə görünür ki, Qarabağ erməniləri ilə Ermənistan arasında da münasibətlər rəvan deyil. Xüsusən də Ruben Vardanyanın indiki Ermənistan hakimiyyətinə münasibəti, onu əvəzləmək niyyəti Nikol Paşinyan iqtidarına da sirr deyil.
Belə bir vaxtda Ermənistanda Ruben Vardanyana qarşı ittihamlar kəskin artır. O, Qarabağda vəziyyəti gərginləşdirməkdə, eləcə də Ermənistanda “suyu bulandırmağa” cəhddə ittiham olunur. Vardanyanın Araik Arutyunyana qarşı mövqeyi fonunda Ermənistanda ona qarşı daha sərt münasibət sərgilənməkdədir. Ermənistan parlamentinin “Vətəndaş müqaviləsi” fraksiyasının deputatı, müdafiə və təhlükəsizlik məsələləri daimi komissiyasının sədri Andranik Köçəryan bu fonda qeyd edir: “Ruben Vardanyan yenə səhv edir, bəlkə də Qarabağı Tatarıstanla qarışdırır. Vardanyan “sirli şam yeməyi” aşkar edib, lakin onun dediyi şeydə it yiyəsini tanımır. Araik Arutyunyan getsin, sonra nə olsun? Qarabağdan siyasi böhranı Ermənistana ötürməyə cəhd edilir. İndi inadkar olmaq vaxtı deyil, böhrandan çıxmaq üçün bir-birinizə kömək etmək yaxşı olardı. Qarabağdakı “sirli şam yeməyi”nin məqsədi Ermənistanda hakimiyyətdir”. Ermənistanın Respublika Naminə Partiyasının sədr müavini Ruben Mehrabyan isə bildirir ki, Qarabağdakı “daxili siyasi proseslər” çox narahatedicidir: “Ruben Vardanyan kimdir? Hər “paraşüt turoperatoru” Arutyunyanın “istefası”nı tələb edə bilməz. Arutyunyan keçilməz təzyiqlər altında danışa bilərdi. Rusiyanın Ermənistanı zərərli qərarlar verməyə məcbur etmək kimi siyasi məqsədi var. Ruben Vardanyan Rusiyanın zərərli gündəminə xidmət edir”. Beləliklə, Ermənistanda da hesab edilir ki, Ruben Vardanyan Rusiyadan idarə edilir. Elə bu fonda İrəvanın Rusiyaya qarşı siyasəti kəskinləşir. Hətta Ermənistanın “Qraparak” nəşri yazır ki, Ruben Vardanyanın Qarabağda qalmasına şərait yaradan Rusiyanın sülhməramlı qüvvələri belə Paşinyanı narahat edir: “Ermənistanın baş naziri Nikol Paşinyan rus sülhməramlılarını bölgədən çıxarmaq, onlardan xilas olmaq istəyir. Avqustun 24-də hökumətin iclasında o, Laçın dəhlizinin birtərəfli qaydada açılacağı, Qarabağa çıxışa icazə verilməsi barədə mötəbər mənbələrdən məlumat aldığını söyləyib. Paşinyan bildirib ki, Qarabağa girməyə icazə verilməyəcək. Qarabağdakı mənbələrimizin sözlərinə görə, bu iddialar çoxdan var və birbaşa Paşinyanın sülhməramlılardan xilas olmasına xidmət edir”. Nəşrin yazdığına görə, Qarabağdakı sülhməramlılar da bu plandan xəbərdardırlar. Qəzetdə, həmçinin vurğulanıb ki, Paşinyan artıq siyasətlə məşğul olsa da, hələ də jurnalistlik fəaliyyətindən əl çəkməyib və mötəbər mənbələrdən məlumat alır.
Paşinyana yaxınlığı olduğu iddia edilən “Sasna Tsrer” adı ilə tanınan erməni terror qruplaşmasının rəhbəri Jirayr Sefilyan bu fonda qeyd edir ki, Rusiya Ermənistandan həmişəlik yox olacaq. Sefilyan Ermənistanın birdəfəlik Rusiyanın təsirindən çıxacağı zamanın uzaqda olmadığını bildirib: “Söhbət Rusiyanın bölgədən çəkilməsindən gedirsə, o zaman aydındır ki, bu sistem buradan yoxa çıxacaq və bu fürsəti əldən vermək olmaz. Bu əbədi olmalıdır. Biz ermənilər daha heç bir başqa zülmkar sistemin ölkəmizi idarə etməsinə imkan verməməliyik. Tərəfdaşlarımızı əmin edirik ki, bu fürsət yaxın günlərdə bizə veriləcək”. Maraqlıdır ki, Paşinyan Rusiyadakı erməni diasporu ilə də əlaqələri kəsməyə üstünlük verir. Hesab edir ki, diaspor vasitəsilə Rusiya İrəvana təsir göstərməyə çalışır. Rusiya Erməniləri İttifaqının rəhbəri Ara Abramyan etiraf edir ki, Paşinyan onlarla əlaqədə deyil. Onun sözlərinə görə, 2018-ci ildə baş tutan inqilabdan əvvəl Rusiya Erməniləri İttifaqı Ermənistanda dövlətlə birlikdə onlarla tədbir keçirib: “Biz Xarici İşlər Nazirliyi, Diaspor Komitəsi ilə işləyirdik. Bu kifayət deyildi, amma az da olsa, nəticə əldə edirdik. Hər şeyin yaxşı olacağına ümid var idi. Bu gün nə Ermənistan-diaspor əlaqələri var, nə yanaşma, nə də siyasət”. O deyib ki, hazırda erməni diasporu bir-birini gözdən salmaqla məşğuldur: “Hamı ayrılıb. Rusiyada 400-ə yaxın milli təşkilat açılıb, lakin onlar çox tez bağlanırlar. Təşkilat açırlar, başa düşürlər ki, işləməlidirlər, amma təcrübələri yoxdur. Sonra görürlər heç nə alınmır, başlayırlar deməyə ki, Rusiya Ermənilər İttifaqı onlara mane olur. Hamı hamıya qarşı çıxır, hamı bir-birini gözdən salır. Rabitə pozulub. Paşinyanın bəyanatlarını götürsək, diasporumuz birdir. Amma onun dediklərinin əksini sübut edən 30 məqamı sadalaya bilərəm. “Bu gün nəinki Rusiyada, bütün başqa yerlərdə diaspor yoxdur, əlaqə kəsilib, Ermənistan qüdrətli qüvvədən məhrum edilib”. O, Ermənistan hakimiyyətinin diaspora qarşı siyasətindən narazı olduğunu bildirib. Abramyan Ermənistanın baş nazirinin diasporun birliyi ilə bağlı bəyanatlarının reallığa uyğun olmadığını qeyd edib. Bütün bunlar İrəvanın Qarabağ siyasətinə də təsir edir. Elə Qarabağdakı qondarma qurumun “nümayəndəsi” Artur Osipyan da hesab edir ki, baş verənlər onlar arasında ümidsizliyi artırır: “Qarabağda “hakimiyyət” uğrunda “siyasi müharibə” gedir. Bu, Qarabağda “hakimiyyət”i ələ keçirmək cəhdidir və Ermənistanda da hakimiyyəti ələ keçirmək üçün zəmin hazırlanır. Qarabağ sakinlərini manipulyasiya etməklə Ermənistanda hakimiyyət əldə etməyə çalışırlar, onları Qarabağ sakinləri maraqlandırmır”.
Nahid SALAYEV
