Ermənistanın “humanitar böhran” şousu baş tutmayınca düşmən ölkənin havadarlarının da planları pozuldu. Ermənilərin Laçın yolu ətrafında qurduqları “genosid şousu”na artıq onları himayə edən dövlətlər də şübhə ilə yanaşır.
Ermənistanın ən yaxın dostu Fransa da artıq həqiqəti qəbul etdiyi üçün ermənidən daha çox erməni olan prezident Emmanuel Makron da ritorikasını bir qədər yumşaldıb. “Le Pointe” nəşrinə müsahibə verən Makrona jurnalistin: “Qarabağda baş verənləri “soyqırım” adlandırmaq olarmı” sualına Fransa prezidentinin cavabı erməniləri qane etməyib. “Mən bu termini tələsik işlətməkdən çəkinərdim”, – deyən Makron eyni zamanda Ermənistana da mesaj verib. Bununla Makron dolayısı ilə etiraf edib ki, Qarabağda soyqırım-filan yoxdur. Bu o deməkdir ki, erməni tərəfi təklif olunan Ağdam yolundan istifadə olunmasına razılaşmalıdır.
“Makronun da belə bir açıqlama ilə çıxış etməsinin kökündə sözügedən məsələlər dayanır”
Məsələ ilə bağlı “Bakı-Xəbər”ə açıqlama verən millət vəkili Ceyhun Məmmədov hesab edir ki, bütün bunlar erməni yalanlarının ifşa olunması anlamına gəlir: “Əslində prosesləri diqqətlə təhlil edəndə görürük ki, Qərb ölkələri də Qarabağda humanitar böhranın yaşanmadığının fərqindədilər. Eyni zamanda “genosid şousu” ilə bağlı artıq bütün dünya Ermənistanın apardığı yalan üzərində qurulan təbliğata inanmır. Daha çox mövcud reallıqları qəbul edirlər. Söhbət 44 günlük Vətən müharibəsindən sonra Azərbaycanın yaratdığı reallıqlardan gedir. O baxımdan hesab edirəm ki, Makronun da belə bir açıqlama ilə çıxış etməsinin kökündə sözügedən məsələlər dayanır. Yəni bu gün dünya ölkələri yaxşı bilirlər ki, Qarabağda hansısa genosid baş verməyib, etnik ermənilərə yönəlik soyqırım törədilməyib. Belə bir şey baş versəydi, o zaman bunu gizlətmək olmazdı. Ona görə də bu, daha çox ermənilərin qurduğu şoudur. Ermənilər bütün vasitələrlə çalışırlar ki, öz yalanlarına dünya ölkələrini ortaq etsinlər. Düzdür, bəzi ölkələrin erməni yalanlarına şərik olmaları halları var və bu, təəssüf doğuran haldır. Söhbət ermənipərəst mövqedən çıxış edən bəzi Avropa ölkələrindən gedir. Həmin ölkələr davamlı olaraq təxribatçı mövqe sərgiləyib erməniləri dəstəkləyirlər. Ancaq həmin ölkələr nə etsələr də ortada fakt yoxdur. Artıq onlar da anlayırlar ki, Ermənistanın apardığı təbliğat qəbul edilmir və bu səbəbdən fiaskoya uğrayıb. Ona görə də zaman-zaman belə açıqlamalar səslənir. Görünən odur ki, bununla Makron həqiqəti qəbul etdiyini etiraf etdi. Həm də bununla bugünə kimi aparılan yalan təbliğatın heç bir əsasının olmadığını açıq-aydın ifadə edir. Hesab edirəm ki, bütün bunlar Prezident İlham Əliyevin apardığı uğurlu siyasətin nəticəsidir”.
Vidadi ORDAHALLI
