Ermənistan Baş naziri Nikol Paşinyan cümə günü hökumətin iclasında yenidən Laçın yolu ilə bağlı danışıb:
“Bizə etibarlı məlumat daxil olub ki, Laçın “dəhlizi”nin birtərəfli qaydada açılması, yəni Qarabağdan çıxışa icazə verilməsi, lakin girişə icazə verilməməsi planları hazırlanır”
Azərbaycan bunu edə bilərmi?
Böyük Quruluş Partiyasının sədri Elşad Musayev “Bakı-Xəbər”ə açıqlamasında bildirdi ki, Laçın yolu Azərbaycan torpağıdır: “Bu səbəbdən də, Azərbaycan hansı tədbiri lazım bilirsə, onu da görə bilər. Bu məsələ ilə bağlı necə davranılması Azərbaycanın suveren hüquqlarından biridir. Ermənistanın Azərbaycan Laçın Sərhəd Buraxılış Məntəqəsinə (SBM) hücumundan, eləcə də Beynəlxalq Qırmızı Xaç Cəmiyyətinin (BQXC) Xankəndiyə erməni separatçılarına kontrabanda, hərbi təyinatlı malları daşıması faktı aşkar ediləndən sonra Laçın SBM-nin bağlanması ilə bağlı qərar verildi. Faktiki olaraq, hazırda mülki ermənilərin Laçın yolu vasitəsilə Ermənistana keçməsində heç bir problem yoxdur. Biz bunu televiziyaların hazırladığı reportajlardan da görürük. Ancaq Ermənistan tərəfdən yolu keçməyin qarşısının alınması ilə bağlı əsaslı səbəblər var. Ermənilər yolun tam açılmasına BMT səviyyəsində belə cəhd etdilər, amma heç bir faydası olmadı. Çoxları sözügedən iclasda hər hansı bir sərt qətnamənin çıxarılacağını gözləyirdi. 2020-ci il üçtərəfli Bəyanata əsasən, Laçın yolu üç məqsədlə istifadə oluna bilər. Yoldan vətəndaşların, yüklərin və nəqliyyat vasitələrinin keçidi nəzərdə tutulub. Ancaq biz görürük ki, ermənilər Laçın yolundan tam başqa məqsədlər üçün istifadə edirlər. Ermənistanın təxribatçı əməllərinin qarşılığında Azərbaycan yenə də konstruktivlik nümayiş etdirərək, humanitar daşımalar üçün alternativ yol - Ağdam-Xankəndi yolunu təklif edib. Bu təklif iyulun 15-də Azərbaycan Prezidenti, Ermənistanın baş naziri və AB Şurası Prezidentinin Brüssel görüşündə AB rəsmiləri tərəfindən dəstək qazanıb.
Buna baxmayaraq, Ermənistan belə bir nəcib təşəbbüsün qarşısını hər vəchlə almağa çalışıb, rəsmi İrəvanın təhriki ilə ermənilər Ağdam-Xankəndi yolunda beton maneələr quraşdırıb. İndi yol bağlayan bizmi oluruq, yoxsa ermənilərmi?
Qarabağ ermənilərinin Azərbaycana reinteqrasiyası qaçılmazdır. Bundan başqa heç bir ssenari meydandakı reallıqlarla uzlaşmır. Bunu hər kəs başa düşür. Proses ancaq bu istiqamətdə davam edə bilər. "Humanitar fəlakət" kimi iddialar isə bu prosesi sadəcə müəyyən müddətlik ləngidə bilər, meydanda yeni reallıqlar yarada bilməz. Bu, sadəcə epizodik proses kimi də yadda qalacaq. Laçın yolundakı mövcud rejimi dəyişdirmək üçün Ermənistanın havadarlarının dəstəyi və yardımı ilə bu cür planların işləməsinə Azərbaycan şərait yaratmayacaq.
Yaxşı olar ki, Ermənistan hərbi-siyasi rəhbərliyi bir məsələni heç vaxt unutmasın: Qarabağın Azərbaycan ərazisi olduğu əgər 44 günlük müharibəyə kimi beynəlxalq müstəvidə kağız üzərində əksini tapırdısa, Vətən müharibəsindən sonra bir çox güc və beyin mərkəzləri Azərbaycanın yaratdığı yeni geosiyasi reallığı qəbul etmək məcburiyyətini özlərində hiss etdilər”.
Məhəmmədəli QƏRİBLİ
