Məlum olduğu kimi, Belçikanın xarici işlər naziri Hadca Labib avqustun 24-də Bakıda səfərdə olub. İrəvandan sonra Bakıya gələn belçikalı nazir Ermənistanda olarkən qondarma "erməni soyqırımı" abidəsini də ziyarət etmişdi. Eyni zamanda H. Labib bu ölkənin xarici işlər naziri və Baş naziri ilə görüşlərində ermənipərəst mövqeyini bir daha ortaya qoyaraq Azərbaycanın ünvanına əsassız iddialar səsləndirib.
Bütün bunlardan sonra Bakıya gələn H.Labibi ermənipərəst mövqeyinə və ölkəmizə qarşı səsləndirdiyi əsassız iddialara görə Azərbaycan Prezidenti qəbul etmədi. Bununla da Azərbaycan Prezidenti İlham Əliyev belçikalı nazirə başqalarına da görk ola biləcək bir dərs verdi. Yadınıza gəlirsə, bu ilin aprel ayının 27-də Fransanın xarici işlər naziri Ketrin Kolonna da Bakıya səfəri zamanı ölkəmizdə soyuq qarşılandı. Ermənistanda səfərə olarkən ölkəmizə qarşı hədyanlar yağdıran Kolonnanı Prezident Əliyev qəbul etsə də, onunla sərt tonda danışdı, Fransanın himayə etdiyi Ermənistanın 2020-ci il 10 noyabr tarixli üçtərəfli bəyanatla üzərinə götürdüyü öhtəliklərin heç birini yerinə yetirmədiyini qeyd etdi.
Prezident İlham Əliyev aprelin 27-də Fransa Respublikasının Avropa və xarici işlər naziri Ketrin Kolonnanı qəbul edərkən “Laçın-Xankəndi yolunun başlanğıcında sərhəd-buraxılış məntəqəsinin qurulması ölkəmizin suveren hüququdur”-dedi.
Prezident İlham Əliyev həmçinin bildirdi ki, Ermənistan Naxçıvanla dəhlizin yaradılmasına imkan vermir, öz qoşunlarını Rusiya sülhməramlılarının müvəqqəti yerləşdirildiyi Azərbaycan ərazilərindən çıxarmır və Laçın dəhlizindən sui-istifadə edərək Qarabağa silah-sursat və digər hərbi təyinatlı məhsulların daşınmasını həyata keçirirdi.
Prezident İlham Əliyev Azərbaycan-Ermənistan sərhədində, Laçın-Xankəndi yolunun başlanğıcında sərhəd-buraxılış məntəqəsinin qurulmasının ölkəmizin suveren hüququ və ərazi bütövlüyümüzün təmin olunmasının ifadəsi olduğunu qeyd etmişdi. Kolonnanın nəzərinə ölkəsinin yürütdüyü ermənipərəst mövqeyin yaratdığı fəsadlar çatdırılmışdı.
Azərbaycan Prezidentinin anti-Azərbaycan mövqeli, ermənipərəst ölkələrin xarici işlər nazirlərinə qarşı bu cür davranış sərgiləməsi tam normaldır və bəzi ölkələrin nazirləri ilə davranışı ideal təsir - tərbiyə üsuludur.
“Bu da ölkəmizə qarşı qərəzli mövqedə olan ermənipərəst xarici diplomatlar üçün bir növ bir tərbiyə üsuludur ki…”
Siyasi elmlər üzrə fəlsəfə doktoru, Beynəlxalq Münaisbətlərin Təhlili Mərkəzinin aparıcı məsləhətçisi Mətin Məmmədli “Bakı-Xəbər”ə şərhində “Diplomatlar, dövlət adamları hər zaman çalışmalıdırlar ki, hər zaman digər dövlətlərlə münasibətlərdə müəyyən qırmızı xətlər var, onları keçməsinlər. Bu qırmızı xətlər də nədir? Həmin ölkənin ərazi bütövlüyü, müstəqilliyi, suverenliyi, həyati mənafeləri kimi məsələlərlə bağlı fikir, mövqe bildirəndə çalışmalıdırlar ki, həmin ölkənin bu maraqlarına zidd fikir bildirməsinlər. Fransa və Beliçkanın xarici işlər nazirləri Azərbaycana qarşı müəyyən qərəzli, doğru olmayan fikirlər ifadə ediblər, diplomatik etiket normalarını aşıblar. Belçikanın xarici işlər naziri son günlər regiona səfər etdi və Ermənistana, Gürcüstana getdi, ardınca da Azərbaycana gəldi. Ermənistanda olarkən Azərbaycana qarşı qərəzli fikirlər səsləndirib, xoşagəlməz mövqe sərgiləyib ki, bu da, təbii, ölkəmiz tərəfindən sərt qarşılanıb. Azərbaycan Prezidenti Azərbaycan dövlətinin başçısıdır, əlbəttə ki, dövlətimizin maraqları, mənafeyi hər zaman ölkə başçısı tərəfindən xüsusilə qorunur”-deyə bildirdi.
M.Məmmədli hesab edir ki, mənafe və maraqlarımıza zidd olan hər hansı bir davranış ölkə başçısı tərəfindən adekvat olaraq qiymətləndirilir: “Ölkə başçısı tərəfindən anti-Azərbaycan mövqeyində olan, ölkəmizə qeyri-obyektiv yanaşan qərəzli şəxslərə adekvat reaksiya ortaya qoyulur. Bu da ölkəmizə qarşı qərəzli mövqedə olan ermənipərəst xarici diplomatlar üçün bir növ bir tərbiyə üsuludur ki, Azərbaycanla belə rəftar etmək, davranmaz olmaz. Hesab edirəm ki, cənab Prezidentin mövqeyi yerindədir və bu bizim məmurlarımız üçün də örnəkdir”.
Leyla QARAXANLI
