Ermənistanda anti-Rusiya ab-havası illərdir ki, hökm sürür, bu ölkədəki rusdilli məktəblərin, bağçaların çoxunun bağlandığı məlumdur, rus dilinə qarşı ümumiyyətlə antipatiya yaradılıb. Rusiya dövlət səviyyəsində dəfələrlə Ermənistanda rus dilinin vəziyyəti ilə bağlı narazılıq etsə də, bu dilin tədrisinin genişləndirilməsi, keyfiyyətinin artırılması üçün dəfələrlə dəstək göstərsə də, yenə də ortada nəticə Rusiyanı qane edəcək səviyyədə deyil. Bu
da rusları narahat edir. Rusiya Ermənistanda rus dilinin tədrisini istədiyi səviyyədə görməyincə ondan əl çəkmək istəmir. Bir neçə ay əvvəl Rusiyanın xarici işlər naziri S.Lavrov bu məsələni qabardırdı ki, Ermənistanda rusdilli məktəblərin sayı artmalıdır, Paşinyan hökuməti də ona vəd vermişdi ki, problem həllini tapacaq.
Rusiyanın baş naziri Mixail Mişustin bu məsələni qabardıb. O, Çaxkadzorda Ermənistanın baş naziri Nikol Paşinyanla görüşdə vurğulayıb ki, Rusiya Ermənistanda rus dili tədrisinin keyfiyyətinin artırılması üçün bu ölkəyə yardımını davam etdirəcək.
O qeyd edib ki, Rusiyanın institut və universitetlərində 5 mindən çox erməni tələbə təhsil alır. "Burada biz Ermənistanda rus dilinin tədrisinin keyfiyyətinin yaxşılaşdırılmasına yardım etməyə davam edəcəyik” – deyə Mişustin bildirib.
O xatırladıb ki, Paşinyanın Rusiya prezidenti Vladimir Putinlə görüşündə bütün bu məsələlər, o cümlədən yeni məktəblərin tikintisi ətraflı müzakirə olunub.
“Biz həmçinin şadıq ki, Ermənistandan olan rus dili müəllimləri Rusiyada mütəmadi olaraq təlim keçirlər və ilin sonuna kimi biz də 50 minə yaxın dərslik tədarük edəcəyik. Biz indicə sizinlə bu barədə danışdıq, siz prezidentlə bu barədə danışdınız” deyə bildirən Rusiyanın baş naziri vurğulayıb ki, bu dərsliklər Ermənistan respublikasının bütün məktəbləri üçün nəzərdə tutulur.
Rusiyanın Ermənistanda rus dili tədrisinin keyfiyyətinin yüksəldilməsi, ümumiyyətlə rus dilinin mövqeyinin gücləndirilməsi üçün atdığı bu addımların, göstərdiyi səylərin Ermənistanda aparılan qərbyönlü siyasətə rəğmən nəticəsi olacaqmı?
“Novoye vremya” qəzetinin baş redaktoru Şakir Ağayev “Bakı-Xəbər”ə şərhində “Təbii ki, Rusiya Ermənistanda hakimiyyətdə oturan Paşinyanın Sorosun proyekti olduğunu yaxşı bilir. Paşinyan gələndən Ermənistanda düşünülmüş surətdə anti-Rusiya əhval-ruhiyyəsini alovlandırır, Ermənistanı daha çox Qərbə yönləndirməyə çalışır. Hesab edirəm ki, müəyyən mənada buna nail olub da. Çünki Paşinyan istənilən halda özünə aid olan günahları da Rusiyanın üzərinə yıxmağa çalışır. Nikol Paşinyanın məhz son vaxtlar KTMT-yə də münasibəti buna nümunədir. Onu hakimiyyətə Soros başda olmaqla Qərb gətirib, əsas məqsəd də Ermənistanda Rusiyanın mövqeyini zəiflətməkdir, Paşinyan da məhz bununla məşğul olur”-deyə bildirdi.
Ş.Ağayev qeyd etdi ki, Rusiyanın Ermənistana rus dili dərsliklərini göndərməsi ola bilsin, müəyyən qədər məsələyə təsir göstərsin. “Amma bu, Paşinyanın qlobal surətdə anti-Rusiya siyasətinə o qədər də kömək göstərə bilməyəcək. Çünki ilk növbədə rusdilli məktəblərin sayı çoxalmalıdır ki, rus dilinin tədris səviyyəsi artsın. Bilirsiz ki, Paşinyan hakimiyyətə gələndən rus dilində təhsil müəssisələrinin, rusdilli mətbuatın, rus dilində televiziya kanallarının sayının azaldılması ilə məşğul olub. Ermənistan monoetnik bir dövlətə çevrilir, burada ermənilərdən başqa heç bir millətə şərait yaradılmır, etnik ruslara da həmçinin. Rusdilli əhalinin sıxışdırıldığı bir ölkədə rus dilində tədrisin səviyyəsinin artmasını gözləmək olmaz. Rusiyanın bu səyləri ola bilsin, hardasa çox az faiz təsirə malik olar, amma köklü təsir edəcəyini ehtimal etmirəm. Çünki dövlətin apardığı siyasət, təbliğat Qərbyönülmlüdür. O səviyyədə 50 min dərsliyin yüksək səviyyədə təsir göstərməsi mümkün deyil. Rusiyaya verdiyi vəd sadəcə Paşinyanın xarakterinə uyğun növbəti hərəkətidir. Bununla göstərmək istəyir ki, guya Rusiya ilə məişət səviyyəsində münasibətləri saxlamaq istəyir. Amma Qərbyönlü siyasəti yürütməkdə davam edir. Bu baxımdan, indiki şəraitdə yüksək nəticə gözləmək mümkün deyil”-deyə Ş.Ağayev əlavə etdi.
İradə SARIYEVA
