Belçikanın xarici işlər naziri Haca Labibin avqustun 22-də regiona səfəri başlayıb. İlk olaraq Ermənistana səfər edib, avqustun 23-də isə Gürcüstanda olub. Ermənistanda qondarma “erməni soyqırımı” abidəsini də ziyarət edən Haca Labib bu ölkənin xarici işlər naziri və Baş naziri ilə görüşlərində ermənipərəst mövqeyini bir daha ortaya qoyaraq, Azərbaycanın ünvanına əsassız iddialar səsləndirib.
Bununla yetinməyən H.Labib Bakını Ermənistanın ərazi bütövlüyünü tanımağa çağırıb: “Biz Azərbaycanın ərazi bütövlüyünü açıq şəkildə tanıyan Nikol Paşinyanın cəsarətini alqışladıq və Azərbaycanın ali rəhbərliyini də buna çağırırıq”.
Onun sözlərinə görə, Ermənistanla Azərbaycan arasında sülh sazişi yaxındır, Brüsseldə, İrəvanda və Bakıda yeni məsləhətləşmələr gözlənilir. Lakin o, məsləhətləşmələrin kimlərin arasında olduğunu açıqlamayıb.
Bu nə yanaşmadır? Bu boyda yalan olar? Elə sonuncu dəfə Əliyev “Euronews” telekanalına müsahibəsində Azərbaycanın Ermənistana qarşı hər hansı ərazi iddiası olmadığını bəyan edib. Bundan əvvəl də neçə dəfə Əliyev bəyan edib ki, Ermənistan Azərbaycanın ərazi bütövlüyünü tanıyarsa, Azərbaycan da analoji addım atar.
“İllərdir Belçika Qarabağ məsələsində obyektivlikdən uzaq mövqe sərgiləyir və bu, müxtəlif formalarda özünü göstərir”
Sözügedən məsələni “Bakı-Xəbər”ə şərh edən edən siyasi ekspert Elşad Həsənov hesab edir ki, Belçika Qarabağ məsələsində ədalətli mövqe sərgiləmir: “Əvvəla, Azərbaycan hər zaman Ermənistanın ərazi bütövlüyünü tanıyıb. Özü də Prezident İlham Əliyev bunu dəfələrlə bəyan edib. Biz Ermənistan ərazisini işğal edməmişik, onların əraziləri Azərbaycanın işğalı altında qalmayıb. Ermənistan ərazilərimizi işğal edib və 30 il torpaqlarımız işğal altında qalıb. Əfsuslar olsun ki, Belçikanın xarici işlər naziri məsələnin mahiyyətini anlamaq istəmir. Bir növ, xarici siyasətlə məşğul olan birisi ağzına gələni danışır. İllərdir Belçika Qarabağ məsələsində obyektivlikdən uzaq mövqe sərgiləyir və bu, müxtəlif formalarda özünü göstərir. Paşinyanın çıxışını alqışlayan Haca Labib Azərbaycan Prezidentinin çıxışlarrına diqqət yetirsə görər ki, biz öz ərazilərimizi işğaldan azad etmişik. Azərbaycan 44 günlük müharibədə BMT Təhlükəsizlik Şurasının 4 məlum qətnaməsini yerinə yetirib. Bu gün də Azərbaycan sülh sazişini imzalamaq üçün 5 əsas prinsip irəli sürüb. Özü də bu, BMT nizamnaməsinə və beynəlxalq hüququn normalarına uyğun hazırlanıb. Əgər Belçika xarici işlər naziri bunları oxusaydı, hər halda belə danışmazdı. Yəni Azərbaycan Prezidentinə böhtan atmazdı. Bütün bunlar onu göstərir ki, Labib məqsədyönlü şəkildə ermənipərəst və qərəzli mövqe sərgiləyir. Onun qərəzli mövqeyi Avropa İttifaqının iki ölkə arasında vasitəçilik missiyasına ziddir. Şarl Mişelin vasitəçiliyi ilə keçirilən danışıqlarda Prezident İlham Əliyev bəyan edib ki, Azərbaycanın Ermənistana yönəlik ərazi iddiası yoxdur. Azərbaycan öz suverenliyini və ərazi bütövlüyünü təmin edir. Nə qədər qərəzli olmalısan ki, bütün bu reallıqları görməyəsən. Nəzərə almaq lazımdır ki, Azərbaycanın apardığı siyasəti Avropa İttifaqı, ABŞ və sülhsevər ölkələr dəstəkləyir. Ona görə də zaman-zaman ermənipərəst mövqe sərgiləyən Labib buna son qoymalı və proseslərə real prizmadan yanaşmalıdır. Çünki belə obyektivlikdən uzaq mövqe nə ona, nə də ölkəsinə hörmət gətirir”.
Vidadi ORDAHALLI
