Azərbaycanın Qarabağ iqtisadi rayonu ərazisində yaşayan ermənilərin bir qismi separatçılıqdan əl çəkmək istəmir. Onlar arasında hələ də, "qan-qan" deyənlər tapılır. Hətta onlar sosial şəbəkələrdə Azərbaycana qarşı öz kin və nifrətlətini büruzə verirlər. Əlbəttə, onların hər birinin şəxsiyyəti Azərbaycanın əlaqədar qurumları tərəfindən müəyyənləşdirilir və zamanı gələndə onlar cəzalarını çəkəcəklər.
Xankəndi sakininin "Telegram"da müraciəti ilə bağlı cinayət işi başlanıb. Bu barədə Baş Prokurorluq məlumat yayıb
Bildirilib ki, Azərbaycanın Xankəndi şəhərində yaşayan və özünü Karen Matevosyan kimi təqdim edən hərbi geyimdə olan şəxsin avqustun 21-də "Telegram" və digər internet informasiya resurslarında rus dilində yayımlanmış videomüraciəti üzrə Baş Prokurorluğunun İstintaq idarəsində araşdırma aparılıb.
Araşdırma zamanı qeyd olunan şəxsin videomüraciətində ölkəmizin ayrılmaz tərkib hissəsi olan Qarabağ bölgəsində yaşayan erməni əsilli şəxslərə səslənərək həmin ərazini qanunsuz olaraq dövlət təsisatları olan müstəqil “Artsax Respublikası” adlandırması, ərazimizdə Azərbaycan Respublikasının qanunvericiliyi ilə nəzərdə tutulmayan və Azərbaycan Respublikasının Silahlı Qüvvələrinin tərkibində mövcud olmayan “Yerli özünümüdafiə qüvvələri” adlı qanunsuz yaratdığı silahlı birləşmənin komandiri olduğunu açıq şəkildə bəyan etməsi, həmin silahlı birləşmə və qrupların fəaliyyətində iştirak etməsi, azərbaycanlıları düşmən adlandırmaqla Azərbaycan xalqına qarşı nifrət məzmunlu çıxışlar etməsi, Xankəndi və ətraf yaşayış məntəqələrində yaşayan erməni əsilli şəxsləri qorxmamağa və xalq kimi birləşib azərbaycanlılara qarşı mübarizə aparmağa çağıraraq Azərbaycan xalqının milli ləyaqətini alçaltmağa yönələn fikirlər səsləndirməsi, habelə aşkar surətdə internet informasiya resurslarından istifadə etməklə milli nifrət və düşmənçiliyin salınmasına yönələn hərəkətlər etməsi müəyyən edilib.
Qeyd olunanlara əsasən avqustun 22-də Azərbaycan Respublikasının Baş Prokurorluğu tərəfindən fakta görə Azərbaycan Respublikası Cinayət Məcəlləsinin 279.1 (qanunvericiliklə nəzərdə tutulmayan silahlı birləşmələr və qruplar yaratma) və 283.1-ci (milli nifrət və düşmənçiliyin salınması) maddələrilə cinayət işi başlanaraq ibtidai istintaqın aparılması Baş Prokurorluğun İstintaq idarəsinə həvalə edilib.
Hazırda cinayət işi üzrə zəruri istintaq tədbirləri həyata keçirilir. Hazırkı şəraitdə Xankəndidə yaşayan və Azərbaycana, azərbaycanlılara qarşı cinayət törətdikləri əsaslı şəkidə sübut olunan, bir nəfərə də olsa güzəşt edilmədən bu cinayətkarların hamısının siyahısını müəyyənləşdirib onlar barəsində cinayət işinin açılmasının nə kimi əhəmiyyəti var?
"... Cinayətkar cəzasını almalıdır"
"Polisə Dəstək" İctimai Birliyinin sədri, tanımış hüquqşünas Şəmsəddin Əliyev "Bakı-Xəbər"ə şərhində "Azərbaycan hüqüq-mühafizə orqanları bu kimi şəxslərin cinayət məsuliyyətinə cəlb olunması üçün artıq işlər görür. Azərbaycana qarşı kin, nifrət yayan, eyni zamanda cinayətlər işləyən separatçıların heç biri cinayət məsuliyyətindən yayına bilməyəcək. Baş prokurorluqda bu istiqamətdə ciddi proses gedir"-deyə bildirdi. Ş. Əliyev hesab edir ki, ümumiyyətlə, bu çox ciddi məsələdir və o separatçıların heç birinə güzəşt edilə bilməz. "Daşnak, nasist xislətli Ermənistan hökumətinin, siyasi - hərbi rəhbərliyinin son 30 ildə Azərbaycan xalqının başına gətirdiyi faciələri bilməyən yoxdur. Mən hələ XX əsrin əvvəllərinə toxunuram. Son 30 ildə onlar Azərbaycan xalqını məhv etməyi qarşılarına məqsəd qoyublar, bunun çoxsaylı örnəkləri mövcuddur. Sadəcə, iradələrindən asılı olmayan səbəblərə görə tam olaraq genosid siyasətinə nail ola bilməyiblər. Təəssüf ki, vandalizm, insanlara qarşı genosid siyasəti, beynəlxaq hüquq prinsiplərinin kobud şəkildə pozulması kimi hallar ermənilərin həyat tərzinə çevrilib. Onlar bunu dünyanın gözü qarşısında edib, insanlarımıza zülmlər ediblər, fironsayağı işgəncələrə əl atıblar. Bu gün də bu zalımlıq onların beynindən çıxmayıb. 44 günlük Vətən müharibəsindən sonra da bu cür təxribatlara, ixtilafa yol açan çağırışlara yol verirlər. Nə qədər ki bu cəzasızlıq mühiti var, onlar nə sülh müqaviləsinə yaxın gələcəklər, nə də təxribatların əl çəkəcəklər. Çünki bunların kifayət qədər havadarları var, onlardan təlimat alırlar. Fransa, Rusiya kimi arxaları var. Ermənistanın özünə qalsa, onun qalib gəlmək gücü yoxdur, yalnız havadarlarının köməyi ilə Azərbaycana qarşı bu addımları atır, genosid siyasətini yenə də davam etdirirlər. Ermənilər o qədər cinayətlər edib ki, sayı-hesabı yoxdur".
Ş. Əliyev əlavə etdi ki, 44 günlük müharibə zamanı Ermənistan Azərbaycanın dinc əhalisini hədəfə götürdü. Bununla da onların məğlubiyyətlərini gizlətmək istədiklərini deyən Ş. Əliyev əlavə etdi ki, Azərbaycanın müvafiq orqanları separatçılara qarşı lazımı tədbiri görmək əzmindədir. "Qarabağda yaşayan ermənilərin Azərbaycan cəmiyyətinə reinteqrasiyasının aktual olduğu dövrdə düşmənçilik hisslərini gücləndirən, nifrət, ixtilaf yaradan çağırışlar edən separatçıların heç biri canını məsuliyyətdən qurtara bilməyəcək. Azərbaycan dövləti ortaya konkret iradə qoyub ki, cinayətkar cəzasını almalıdır. Heç bir separatçının cinayəti, təxribatı cəzasız qalmayacaq. Kamran Əliyev baş prokuror olandan bu sahədə işlər daha da gücləndirildi. Onların bütün hərəkətlərinə qarşı Azərbaycan Respublikasının qüvvədə olan Cinayət Məcəlləsi ilə reaksiya verilir. Hesab edirəm ki, Azərbaycana qarşı cinayət törətdiyinə görə beynəlxalq axtarışda olan cinayətkarlar Azərbaycana təhvil verilməlidir. Bir sıra ölkələrlə ekstradisiya müqaviləmiz var. Biz Köçəryan, Sarkisyan kimi hərbi xuntaları da cinayət məsuliyyətinə cəlb etməliyik. Eyni zamanda beynəlxalq məhkəmə onlara cəza kəsməlidir ki, başqa müharibə canilərinə də görk olsun"-deyə Ş.Əliyev qeyd etdi.
Leyla QARAXANLI
