Məlum olduğu kimi, Özbəkistan Prezidenti Şavkat Mirziyoyev Azərbaycan Respublikasına dövlət səfərinə gəlib. Qeyd edək ki, Şavkat Mirziyoyev prezident seçiləndən sonra ilk səfəri məhz Azərbaycan olub.
Səfər zamanı bir sıra strateji əhəmiyyətli sənədlər imzalanıb. Həmin sənədlərdən biri də media sahəsində əməkdaşlıqdır. Qeyd edək ki, İlham Əliyevin və Özbəkistan Prezidenti Şavkat Mirziyoyevin geniş tərkibdə görüşü başa çatdıqdan sonra Azərbaycan-Özbəkistan sənədlərinin imzalanması mərasimi olub.
Azərbaycan Respublikasının xarici işlər naziri Ceyhun Bayramov və Özbəkistan Respublikasının xarici işlər naziri Baxtiyor Saidov “Azərbaycan Respublikası ilə Özbəkistan Respublikası arasında media sahəsində əməkdaşlığın inkişafına dair Yol Xəritəsi”ni imzalayıblar.
Maraqlıdır, Şavkat Mirziyoyevin ilk dövlət səfəri zamanı digər sənədlərlə yanaşı media sahəsində əməkdaşlıq sənədinin imzalanmasının nə kimi əhəmiyyəti var? Ümumiyyətlə, Azərbaycan mediası bu əməkdaşlığın hansı formada olmasını arzu edir?
“Azərbaycan-Özbəkistan media əlaqələrinin inkişaf etdirilməsi iki ölkə arasında əlaqələrin, media qurumlarının, xalqların mənafeyinə də uyğundur”
Mətbuat Şurası İdarə Heyətinin üzvü, media eksperti Müşfiq Ələsgərli “Bakı-Xəbər”ə açıqlamasında bunları qeyd etdi: “Bəllidir ki, türkdilli dövlətlərin inteqrasiyası, yaxınlaşması, vahid mövqedən çıxış etməsi yönündə xüsusi bir siyasət yürüdülür. Xatırladım ki, Türk Dövlətləri Təşkilatı yaradılıb. Türk Dövlətləri Təşkilatının mövqeyini ifadə etmək, dünyaya informasiya ilə təmin etmək, həmin dövlətlərin probleminlərini daha yaxşı işıqlandırmaq üçün mediadan da istifadə olunur. Bu məqsədlə Türk Dövlətləri Təşkilatınin media platforması da yaradılıb. Həmin platformanın özəyində Azərbaycan və Türkiyə mediası dayanır. O da bəllidir ki, Azərbaycan-Türkiyə media qurumları həm Türk dövlətləri media platformasında, həm də ikitərəfli müstəvidə ciddi şəkildə əməkdaşlıq edir. Qarşılıqlı memorandum, əməkdaşlıq haqqında sənədlər imzalanır. Hiss olunur ki, bu platformanın imkanlarının artması üçün digər türk dövlətlərinin media qurumları ilə sıx əməkdaşlıq prosesi həyata keçirilir. Necə ki, Azərbaycanla Türkiyə, eyni zamanda, Özbəkistan, Qazaxıstan və digər türk dövlətlərinin media təşkilatları ilə ikitərəfli əməkdaşlıq müqavilələri imzalanıb. Xatırladım ki, Özbəkistandan əlavə Qazaxıstan və digər türk dövlətləri ilə də sıx əməkdaşlığı ehtiva edən müqavilələr imzalanıb".
M.Ələsgərli hesab edir ki, Azərbaycanla Özbəkistan arasında media əlaqələrinin daha da inkişaf etdirilməsinə ehtiyac var idi. Türk dövlətləri mənəvi baxımdan bir-birinə yaxın olduğu kimi, bu siyasi tərəfdən də əhəmiyyətlidir: “Həm problemlərin işıqlandırılması, həm də mədəni inteqrasiyanın artırılması üçün əhəmiyyətlidir. Türk dövlətlərinin media qurumlarının qarşılıqlı əməkdaşlığının faydasını 44 günlük Vətən müharibəsində də gördük. İkinci Qarabağ müharibəsi zamanı Türkiyə media qurumlarının ölkəmizə necə dəstək verdiyinin də şahidi olduq. Hesab edirəm ki, bu cür əməkdaşlıq digər türk dövlətləri ilə də olsa daha faydalı olar”.
Həmsöhbətimiz onu da əlavə etdi ki, Azərbaycanla Özbəkistan arasında "Azərbaycan Respublikası ilə Özbəkistan Respublikası arasında media sahəsində əməkdaşlığın inkişafına dair Yol Xəritəsi”ni imzalanması Türk dövlətləri təşkilatının media platformasının inkişaf etməsinə səbəb olacaq. Bu, iki ölkə arasında əlaqələrin, media qurumlarının, xalqların mənafeyinə uyğundur.
Günel CƏLİLOVA
