Ermənistan mətbuatı yazır ki, 10 Türkiyə və 2 Azərbaycan vətəndaşı sığınacaq almaq üçün Ermənistanın müvafiq orqanlarına müraciət edib. Təkcə türklərə deyil, özlərindən başqa digər xalqlara gecə-gündüz nifrət püskürən ölkədə necə yaşamaq olar? Maraqlıdır ki, Ermənistan həmin adamların adını açıqlamır.
Böyük ehtimalla, müraciət edənlər Türkiyə və Azərbaycan pasportuna sahib olsalar da, əslində etnik baxımdan ermənidirlər. Digər tərəfdən isə, ola bilər ki, Ermənistandan yayılan bu xəbər tam yalandır. Sadəcə, dünyaya öz ölkələrinin saxta cəzbediciliyini nümayiş etdirmək istəyirlər.
Müstəqil siyasətçi Bünyamin Qəmbərli “Bakı-Xəbər”ə açıqlamasında bildirdi ki,
bu məsələ bir az qaranlıqdır: “Birincisi, mən düşünmürəm ki, uzun müddət burda qalan, hətta ermənilər də daxil olmaqla, hər hansı Azərbaycan vətəndaşı Ermənistanda gedib yaşamaq istəsin. Ermənilərin özünün Ermənistandan köç etdiyi bir vaxtda bu, demək olar ki, mümkün deyil. Amma burada başqa variantlar var. Onlardan biri odur ki, xüsusi xidmət orqanları tərəfindən ələ alınmış, yaxud şantaj olunan Azərbaycan, Türkiyə vətəndaşı daxil olmaqla müxtəlif insanlar bunu edə bilər. Bu, variantlardan biridir. Yəni Ermənistan bir rəy yaratmaq üçün həmin adamları məcbur edər ki, belə bir müraciət etsinlər. İkinci variant, hansısa formada Azərbaycan hakimiyyətinə çox böyük nifrəti olan və Azərbaycandan qisas almaq istəyən müəyyən adamlar erməni lobbisinin təsiri ilə bu yalnış fikrə düşə bilər. Üçüncü variant isə hansısa formada Ermənistana meylli xarici xüsusi xidmət orqanlarının təsiri ilə, hətta şantajı ilə belə bu yola düşən insanların mövcudluğudur. Mən yalnız bu variantları düşünürəm. Yenə deyirəm, hətta erməni əsilli olan, 30 il Azərbaycanda yaşayan, bu qalmaqalda heç bir basqı görməyən, etnik baxımdan təsir görməyən bir insan Ermənistanda yaşamağa müraciət etməz. Mən erməni əsilli insanların belə müraciət edəcəyinə inanmıram. Yalnız qeyd etdiyim bu üç variantı çıxmaq şərti ilə”.
Ermənistanda orta məktəb dərsliklərinə baxasınız, orada ksenofobiya və nifrətin ən ifrat təzahürlərini görəcəksiniz. Ermənistan dünyada yeganə monoetnik dövlətdir, çünki burada etnik təmizləmələr mütəmadi şəkildə aparılıb.
Daim terror hücumları, işğalçı siyasəti, mənfur xisləti ilə tanınan Ermənistan monoetnik, millətçi ölkədir.
Bəzən sosial şəbəkələrdə Azərbaycan və Ermənistanda dini konfessiyalara və milli azlıqlara dövlət səviyyəsində münasibət müqayisə olunur. Belə ki, əsas dini təriqəti islam olan Azərbaycanda 150 000 xristian və 15 000 yəhudi yaşadığı halda, Ermənistanda 500 yəhudinin olduğu bildirilir.
Bütün dinlərə hörmətlə yanaşan tolerant dövlətimizdə 14 kilsə, 7 sinaqoq olduğu halda, Ermənistanda cəmi 1 məscid və 1 sinaqoq var. Ermənilər işğal etdikləri Azərbaycan torpaqlarında, Qarabağ ərazisində olan məscidlərdən tövlə kimi istifadə edərək orada heyvan saxlayıblar. Bu, erməni vandalizminin bir daha bariz nümunəsidir.
Azərbaycanda yüzlərlə rus bölməsi olan orta və ali məktəb olduğu halda, Ermənistanda bir dənə də olsun belə təhsil ocağı yoxdur. Sizcə, belə reputasiyaya malik ölkənin vətəndaşı olmağa kim razılıq verər? Hamısı erməni təbliğat maşınının uydurmasıdır.
Məhəmmədəli QƏRİBLİ
