Uzun illərdir ki, Gürcüstanda yaşayan soydaşlarımızın bir sıra təhlükələrlə üz-üzə qaldığı barədə məlumatlar yayılır. Soydaşlarımızın yaşadıqları bölgələrdə yaşanan ciddi problemlərdən biri İranın, fars-molla rejiminin öz təbliğatını qurmağa nail olmasıdır. Qumda xüsusi təhsil və təlim görmüş irançılar bu gün Gürcüstanın azərbaycanlıların kütləvi məskunlaşdığı bölgələrində öz ideologiyalarını yaymaqla, daha çox insanın beynini zəhərləməklə məşğuldur.
Məlumat üçün qeyd edək ki, bu yaxınlarda İranlı məddah Mehdi Rəsuli Gürcüstanda azərbaycanlıların yaşadığı ərazilərdə olub, məscidlərdə əzadarlıq mərasimlərinə qatılıb. Məlumata görə, Gürcüstandakı azərbaycanlıların kütləvi məskunlaşdığı ərazilərdə məscidlərin əksəriyyəti İranın müxtəlif qurumlarının nəzarətindədir.
İranın molla rejimi Gürcüstanda azəbaycanlılar arasında dini təbliğatı gücləndirməklə nə məqsəd güdür?
“Gürcüstanda İranın din pərdəsi altında zərərli təbliğat aparmasına zəmin yarandı və onlar da soydaşlarımızın arasına nüfuz etdilər”
Məsələ ilə bağlı ilahiyyatçı Tural İrfan “Bakı-Xəbər”ə açıqlamasında qeyd etdi ki, Gürcüstanla bağlı İran mənfi mənada işlər aparır. Bu işlər uzun müddətdir davam edir: "Məlumat üçün deyim ki, İran bu işləri Azərbaycan və Gürcüstanın müstəqilliyinin ilk illərindən görməyə başlayıb. Ancaq son zamanlar İranın məlum hərəkəti daha da artıb. Qarabağın işğaldan azad edilməsindən sonra İranın fəaliyyəti sürətlənib. Bu ilk növbədə Azərbaycana qarşı yönəlmiş bir məsələdir. Dünya azərbaycanlılarının həmrəyliyini pozmaq və Bütöv Azərbaycana qarşı İran bu cür addımlar atır. Təəssüflər olsun ki, Gürcüstanda yaşayan azərbaycanlıların bir qismi məzhəbçilik vəziyyətinə gəlib çıxıb. Məlumata görə, Gürcüstanda qəbiristanlıqlarda belə anormal vəziyyət yaranıb. Belə ki, qəbirlər arasında ip çəkilib. Sünnilər bir tərəfdə, şiələr isə başqa bir səmtdə basdırılıb. Təbii ki, bunu İran edib. İran Gürcüstana dindar, ruhani adı ilə adamlar göndərir. Onlar da orda bizim soydaşlarımız arasında şiəlik adı altında farsçılıq ideologiyasını aşılayır. Həmçinin, türkçülük, milliyyətçilik, milli mənsubiyyət, milli kimliyə qarşı çıxışlar edirlər. Beləliklə, insanları təxribata yönəldirlər. İranın əsas niyyəti inqilabı ixrac etməkdir. Onlar qonşu və digər müsəlman ölkələrində təxribat yaratmaq istəyir".
Həmsöhbətimiz onu da əlavə etdi ki, İranın əksər ölkələrdə missionerləri var. Pakistan, Azərbaycan, Əfqanıstan, Gürcüstan, hətta Rusiyada belə nümayəndələri var. Onlar ilk olaraq məzhəbçilikdən başlayır, daha sonra farsçılıq ideologiyasını aşılayır. Bu, İranın Sasani imperiyasını bərpa etmək planıdır. Onlar öz dini təbliğatları ilə şiəçilik adı altında Sasani imperiyasını bərpa etmək istəyirlər. Bu səbəbdən də ilk olaraq sərhədləri kiçiltmək istəyirlər.
T.İrfanın sözlərinə görə, İran Azərbaycanda nail ola bilmədiyi istəklərini Gürcüstanda həyata keçirir. İran rejiminin azərbaycanlılar arasında müxtəlif vasitələrlə apardığı dini təbliğatının başlıca hədəfi vahid Azərbaycan ideologiyasına və dünya Azərbaycanlıların həmrəyliyinə zərbə vurmağa hesablanıb: “İranın Suriyada, Yəməndə, İraqda nə oyunlar çıxardığı, hansı təxribatlar törətdiyi məlumdur. Həmçinin Azərbaycanda da İranın agentura şəbəkəsinin ifşa edildiyinin şahidi olduq, o şəbəkənin üzvləri həbs edildi, hazırda bu yöndə araşdırma gedir və bu məsələ təhlükəsizlik orqanları tərəfindən nəzarətə götürülüb. Çox təəssüf ki, Gürcüstanda İranın din pərdəsi altında zərərli təbliğat aparmasına zəmin yarandı və onlar da soydaşlarımızın arasına nüfuz etdilər. Bu şəraitdən istifadə edib insanların beynini yumağa başladılar. Sözün açığı, bunun bir günahı da bizim özümüzdə oldu. O dövrlər Azərbaycan dövlətinin Qarabağ münaqişəsi kimi ciddi problemi vardı, qaçqın-köçkün axını ilə üzləşmişdi, başqa digər çətinlikləri mövcud idi. Eyni zamanda da azərbaycanlılar yaşayan ölkələrdə soydaşlarımızın problemləri qaldırılanda bu bizim ölkə ilə münasibətlərin kəskinləşməsinə gətirib çıxarırdı”.
Günel CƏLİLOVA
