"Hökumət 44 günlük müharibənin ildönümünə dörd gün qalmış böyük konsert təşkil edir". Bunu “Netq” qəzetinin baş redaktoru Edik Bağdasaryan öz Facebook səhifəsində yazıb.
E. Baqdasaryan yazır ki, bu barədə hökumətin iclasında qərar qəbul edilib. "Baş nazirin müavinləri, nazirlər hökumətin iclasında təvazökarlıqla oturublar. Və bəziləri bu qərarın əleyhinə olsalar da, susdular. Hamısı susur və itaətkardır. Bir, ən azı bir nəfər bu qərara qarşı üsyan edir. Siz 6 milyon dollar xərcləyəcəksiniz. Bu 6 milyonu xərçəngli uşaqların müalicəsi üçün ayırın..."
Baqdasaryan hökumətdən konserti ləğv etməyi tələb edib. "Bu konserti ləğv edin. Və ümumiyyətlə, hökumətin konsertin təşkilinə nə dəxli var?" - deyə o öz etirazını bildirib.
Erməni mediasının yazdığına görə, Ermənistan hökuməti amerikalı reper, prodüser və aktyor Snup Doqun konsertinə 2 milyard 318,596,8 min dram (təxminən 6 milyon dollar) ayıracaq. Müvafiq qərar Ermənistan hökumətinin bu günlərdə keçirilən iclasında qəbul edilib.
Layihənin əsaslandırılmasında qeyd olunur ki, sənətçinin seçimi təkcə bu il sonuncunun müasir musiqi aləmində çox populyar olması ilə deyil, həm də bir növ şou-proqramın təqdim olunması ilə bağlıdır.
Layihəni Doping Space həyata keçirəcək. Konsert 23 sentyabr 2023-cü ildə İrəvandakı Hrazdan stadionunda baş tutacaq
“Proqramın icrası Ermənistana gələn turistlərin sayını artırmağa imkan verəcək, mədəni turizmin həcminin və Ermənistana maliyyə axınının artmasına kömək edəcək, buna görə də iqtisadi artım, turistlərin sayının artmasına səbəb olacaq. ölkənin reytinqi, eləcə də Ermənistanın məlumatlılığı”, – qərar layihəsində deyilir.
Proqramda 20-25 min insanın iştirak edəcəyi, Ermənistana xaricdən 5-6 min turistin gələcəyi gözlənilir. Ermənistan Statistika Komitəsinin məlumatına görə, ölkədə 1 turist orta hesabla 800-1000 ABŞ dolları xərcləyir.
44 günlük müharibənin ildönümünə 4 gün qalmış ermənilər 6 milyonluq bu böyük konserti niyə təşkil edir?
"ABŞ reperinin konsertini təşkil etməklə Ermənistan çirkin niyyətlərini həyata keçirə bilməyəcək"
Müstəqil.az saytının baş redaktoru Faiq Balabəyli "Bakı-Xəbər"ə şərhində "Ermənistanın ağır şəraitdə olduğu bir vaxtda amerikalı reper, prodüser və aktyor Snup Doqun konsertinə 2 milyard 318,596,8 min dram ayırması çox şübhəlidir. Ermənistan hökumətinin məqsədi bu konsertdən siyasi alət kimi istifadə etməkdir. 44 günlük Vətən müharibəsindən Ermənistan məğlub çıxdı və böyük itkilər verdi, indi də özünü ayağa qaldıra bilmir. Görünür, erməni lobbisinin təhriki ilə bu konserti təşkil etməkdə əsas hədəfi qondarma iddialarını daha geniş miqyasda yaymaqdır.
Məsəl var, deyirlər ki, suda boğulan saman çöpündən yapışar. Ermənilər, Ermənistan, erməni lobbisi, onların havadarları Azərbaycanı gözdən salmaq üçün əldən-ayaqdan gedirlər. Onlar Azərbaycanın Qarabağ iqtisadi rayonunda yaşayan ermənilərin guya "acınacaqlı vəziyyətdə" yaşadığını dünya ictimaiyyətinə çatdırmaq üçün müxtəlif üsullardan istifadə edirlər. İstəyirlər ki, bu konsertdə anti-Azərbaycan şüarları səsləndirsinlər"-deyə bildirdi.
F.Balabəyli qeyd etdi ki, Ermənistan hökumətinin Azərbaycana qarşı siyasi və hərbi müstəvidə həyata keçirdiyi heç bir təxribat baş tutmadı, 44 günlük müharibədə məğlub olduqları kimi, siyasi və diplomatik sahədə də məğlub oldular. "Ermənistan, erməni lobbisi, separatçı tör-töküntüləri və onların havadarlarının əli BMT Təhlükəsizlik Şurasının Qarabağ üzrə xüsusi iclasından boşa çıxdı. Ümumiyyətlə, onlar siyasi və diplomatik cəbhədə heç bir irəliləyiş əldə edə bilmədikləri üçün mədəniyyət sahəsində nəyəsə nail olmaq istəyirlər. Amma bu da alınmayacaq. ABŞ reperinin konsertini təşkil etməklə Ermənistan çirkin niyyətlərini həyata keçirə bilməyəcək. Çünki iddialarının qondarma olduğunu bütün dünya bilir. "Blokada", ermənilərin "acından ölmə" hekayəsinə artıq heç kəsi inandıra bilmirlər. İndi onlara elə gəlir ki, Snup Doqun konserti bunların "blokada" və "aclıq" şousunun dünyaya yayılmasında kömək olacaq. Ermənistan həmişə mədəniyyətdən siyasi alət kimi istifadə edib və sonda məğlub olub"-deyə F.Balabəyli vurğuladı.
Leyla QARAXANLI
