Azərbaycan dövlət müstəqilliyini bərpa etdikdən sonra molla rejiminin yuxusu əməlli-başlı qarışıb. Suverenliyimizə zərbə vurmaq üçün hər vasitədən istifadə edir, Azərbaycan Respublikasının ərazisinə qarşı iddialar irəli sürür, şəhərlərimizi, mahallarımızı "farslaşdırırlar".
Üzdə müsəlman olsalar da, hələ də daxilən şovinist Sasani sülaləsinin tör-töküntüsü olan molla rejimi sasaniliyi dirçəltmək üçün hər cür fırıldağa əl atır. Əlbəttə, bu əməllərini tarixi mənbələri təhrif edərək yayırlar. Yeri gələndə, Abbasqulu ağa Bakıxanovun "Gülüstani-İrəm" əsərini belə baş-ayaq təqdim edirlər. Çox maraqlıdır ki, molla rejimi bu təhrif siyasətinə adı azərbaycanlı olanları da qoşur. Şimali Azərbaycanın elə şəhəri, elə kəndi yoxdur ki, onun farslar tərəfindən salındığını iddia etməsinlər. Özlərini elə qələmə verirlər ki, guya bölgədə yalnız farslar "aparıcı xalq" olub, qalanlar olmayıb.
Azərbaycanın ən qədim mahallarından olan Şirvan haqqında da uydurmalar yayırlar. Fars şovinistlərinin təsiri altında olan Azərbaycan tarixi Telegram kanalı vasitəsilə indi də iddia edirlər ki, guya Şirvan mahalının əsasını Sasanilər "qoyub". Şirvan kəlməsinin tarixi haqda iddia edirlər ki, guya "Şirvanı Sasani sülaləsindən olan Ənuşirəvan-Adil bina etmişdir, bu cəhətdən onun adı ilə tanınmışdır. «Ənu» ləfzi çox işlənməmək nəticəsində atılmışdır. Bəziləri də deyir ki, Şirvanın əsli Şirvand, yəni şir olan yer olub, sonra Şirvan olmuşdur..."
Guya Abbasqulu ağa Bakıxanov da bunu təsdiqləyib. Bunlar bu uydurma şeyləri hardan tapır? Tarixdə konkret olaraq Şirvan xanlığı var, onlar da fars əsilli deyildilər.
Bunlar nə üçün yenə də belə çürük iddialarda bulunurlar?
"Şirvan mahalının əsasını Sasanilərin qoyması haqqında uydurmalar son əsrlərdə formalaşıb"
Azərbaycan Milli Elmlər Akademiyasının Fəlsəfə və Sosiologiya İnstitunun aparıcı elmi işçisi, fəlsəfə doktoru, BAO sədrinin müavini, siyasi şərhçi Faiq Ələkbərli "Bakı-Xəbər"ə şərhində "Şirvan mahalının əsasını Sasanilərin qoyması haqqında uydurmalar son əsrlərdə formalaşıb. Bilirik ki, Sasanilər III-VII əsrlərdə mövcud olub. Hətta Sasanilərin dövründə Quzey Azərbaycanda Albaniya dövlətinin hakimiyyəti davam edirdi. Hətta Sasanilər Ərəb xilafətinə məğlub olduğu dönəmlərdə belə Albaniya öz mövcudluğunu qoruyub saxlayıb. Albaniyanın tarixi isə miladdan əvvəl ən az IV əsrdən başlayır. Məhz o dönəmdə də burda Əhəmənilərə tabe olmayan və heç zaman onların işğalçılığı ilə razılaşmayan Massagetlər çarlığı olub. Massagetlər çarlığından sonra Parfiya dönəmində də burada Parfiyayadan müəyyən qədər asılı olan üç yarımmüstəqil çarlıq vardı ki, onlardan biri də Albaniya çarlığı idi. Albaniya çarlığı, Şirvan da daxil olmaqla, böyük bir ərazini özündə ehtiva edirdi”- deyə bildirdi.
F.Ələkbərlinin sözlərinə görə, yəni Ərəb xilafəti bu əraziləri işğal edənə qədər ilk Şirvanşahlar deyilən ərazidə albanlara bağlı Şirvanşahlar vardı, amma onlar haqda da geniş məlumat yoxdur:" Şirvanı-Şamaxı və ətrafındakı əraziləri Albaniya çarlığına məxsus türk sülalələri idarə ediblər. Şirvan sözünün bir neçə cür yozumu var. Bu barədə Abbasqulu ağa Bakıxanov "Gülüstani-İrəm" əsərində yazır. Yəni buranın şirlər oylağı olması təbiidir. Panfarsistlərin iddiası tamamilə əsassızdır, Şirvanın Ənuşirəvanla heç bir bağlılığı yoxdur. Bu iddialar sonralar farslar tərəfindən uydurulmuş bir şeydir. Şirvanşahlar Albaniyaya bağlı idilərsə, Ərəb xilafəti buranı işğal etdikdən sonra məhz Məzyədilər sülaləsi oranı idarə etməyə başladı"-deyə qeyd edən F. Ələkbərli vurğuladı ki, Məzyədilər də Sasani-fars mənşəli deyildilər. Onun sözlərinə görə, bu gün panfarsistlər tarixi təhrif etməklə öz çirkin mahiyyətlərini ortaya qoyurlar.
İradə SARIYEVA
