Avqustun 16-da Ermənistanın təşəbbüsü ilə keçirilən BMT Təhlükəsizlik Şurasının (TŞ) iclasında Azərbaycanın haqlı olduğu bir daha sübut olundu. Beynəlxalq ictimaiyyət onun ərazi bütövlüyü və suverenliyini dəstəklədi. Ermənistanın və havadarlarının hay-küyü, yalan, əsassız iddiaları, dünya ictimaiyyətini aldatmaq cəhdi yenidən uğursuzluğa düçar oldu. Ermənistan hökumətinin ikiüzlülüyü də isbatlandı.
Məlumdur ki, rəsmi İrəvan Qarabağın mülki əhalisinin məcburi "tam blokadaya" alınması nəticəsində humanitar vəziyyətin "pisləşməsi" ilə bağlı BMT Təhlükəsizlik Şurasının təcili iclasının çağırılmasını tələb etmişdi. Bundan başqa, ölkənin baş naziri Nikol Paşinyan və başqa rəsmilərin “Qarabağ Azərbaycan ərazisidir”, “Qarabağdakı ermənilər bizə mandat verməyib” kimi açıqlamaları da dünya ictimaiyyətinin gözündən pərdə asmaq cəhdi kimi dəyərləndirilə bilər.
Ermənistanın BMT-dəki son diplomatik uğursuzluğu Ermənistanın daxilindəki siyasi proseslərə necə təsir edə bilər? Bu proses Paşinyanın istefasını sürətləndirə bilərmi?
Siyasi şərhçi Turab Rzayev “Bakı-Xəbər”ə açıqlamasında bildirdi ki, Ermənistanın BMT - də məruz qaldığı fiasko daxili siyasətə təsir göstərəcək: “Çünki bundan böyük ümidlər, gözləntilər vardı. Həm Ermənistanın daxilində, həm xaricində çox böyük propoqanda aparılırdı. Ermənistan özünün maliyyə, iqtisadi, siyasi resursları ilə diplomatik resurslarını bir arada cəmləmişdi. Ermənistan hakimiyyəti, xaricdə olan lobbisi, bağlı olduqları qruplar, bağlı olduğu havadar dövlətlər: İspaniya, Belçika, Hollandiya, Fransa hər biri səfərbər edilmişdi. Çox böyük gözlənti vardı. Ermənistan hakimiyyəti düşünürdü ki, bununla Qarabağ üzərində beynəlxalq mandat ala biləcək və Azərbaycan BMT mandatı ilə mübarizə aparmaq məcburiyyətində qalacaq. Ermənistanın işi rahatlayacaq. Ancaq alınmadı və böyük bir fiasko oldu. Paşinyanın əlində daxildə əhaliyə təqdim edəcəyi heç bir resursu qalmadı. Ona görə də, düşünürəm ki, bu məsələdən müxalifət çox yaxşı istifadə edəcək. Xüsusilə müzakirələr zamanı Rusiya kimi Ermənistana yaxın bir dövlətin də Qərbin mövqeyinə qarşı durması, BMT - də həll edilməsinə qarşı mövqe sərgiləməsi Ermənistan müxalifətinin əlinə əlavə imkanlar verəcək. Bilirsiz ki, keçmiş Qarabağ klanı Rusiyaya daha yaxın klandır. Paşinyan hakimiyyətdə Rusiya ilə xoş münasibətlərin tərəfdarıdır. Paşinyanı daha çox Qərblə, Avropa ilə bağlı məsələlərdə Brüssel, Vaşinqton proseslərinə xəyanətdə ittiham edirlər. İndi bu qrupun əlinə imkan düşdü ki, Paşinyanın əslində bütün fəaliyyətinin nə qədər mənasız olduğunu, heç bir faydası olmadığını nümayiş etdirsin. Ona görə də düşünürəm ki, bundan müxalifət istifadə edəcək. Paşinyanın istefası mümkün deyil. Ancaq müxalifət buna cəhd esəcək. Ən azından, Paşinyanın ölkə daxilində nüfuzu azalacaq, eyni zamanda Rusiya tərəfdarlarının müəyyən qədər sayı artacaq”.
Məhəmmədəli QƏRİBLİ
