Separatçılar son günlər Rusiya sülhməramlılarına qarşı aqressivlik nümayiş etdirirlər. Ermənilərin zirehli texnikanın qarşısını kəsməsi ciddi mahiyyət daşıyırmı? Belə qənaət çıxır ki, separatçı rejim beynəlxalq aləmə sülhməramlıların fəaliyyətini qənaətbəxş hesab etmədikləri ilə bağlı mesaj göndərmək istəyirlər.
Onlar bu görüntüləri yayaraq, Rusiya sülhməramlılarının bölgədən çıxarılmasına və beynəlxalq qüvvələrin orada yerləşdirilməsinə nail olmaq niyyətinə düşüblər. Necə ki, Ermənistanda Avropa Birliyinin “mülki missiyası” yerləşdirilib, eynisini də Qarabağa tətbiq etmək istəyirlər. Bu baxımdan, sülhməramlı-separatçı “insidenti” ssenari saymaq olarmı?
Hərbi-siyasi ekspert, ehtiyatda olan polkovnik-leytenant İbrahim Rüstəmli “Bakı-Xəbər”ə açıqlamasında bildirdi ki, separatçıların Azərbaycan ərazilərindəki davranışını müşahidə etdikcə belə təsəvvür formalaşır ki, onlar hələ harada yerləşdiklərini başa düşmürlər: “Başa düşmürlər ki, Qarabağı Azərbaycanın tərkib hissəsi kimi Ermənistanın özü belə tanıyıb. Azərbaycan Respublikasının ərazi bütövlüyünü Ermənistan da daxil olmaqla bütün dünya tanıyıb. Təəssüf hissi ilə qeyd etmək istəyirəm ki, onlar həm revanşist, həm separatçı qüvvələrdir və ona görə də Azərbaycanın gücü, müstəqilliyi ilə barışmaq istəmirlər. Hələ də başa düşmürlər ki, Azərbaycan ərasisində oturub, Azərbaycan dövlətinə və xalqına meydan oxumaq olmaz. Bunun ağır fəsadları ola bilər. Yəni dünya 30 il bundan əvvəlki dünya deyil. Artıq Azərbaycan istər təhlükəsizlik baxımdan, silahlı qüvvələr, quruculuq baxımından, istərsə də siyasi bazalar yaratmaq baxımından çox ciddi irəliləyişlərə nail olub. Azərbaycan bu irəliləyişləri öz həqiqətlərini dünya birliyinə çatdırmaqla əldə edib. Yəni, biz nə yalan danışmışıq, nə ikiüzlülük etmişik. Sadəcə Azərbaycan öz həqiqətini 30 ildən sonra Prezidentimiz İlham Əliyevin simasında bütün dünyaya çatdırıb və bütün dünya da bu reallıqlarla barışıb. Əslində isə 30 il əvvəl də dünya birliyi Azərbaycan ərazi bütövlüyünü tanımışdı. Bu sırada bəzi ölkələr, həmçinin Ermənistan da yox idi. Ermənistan da bu sıraya qatıldı. Ancaq, separatçıların bu günki hərəkəti, rus separatçılarına qarşı aqresiv münasibəti sadəcə onların qurduqları bir teatrdı. Onlar bir qrup adamdı. Kütləvi və total xarakter daşıyan heç nə yoxdu ortada. Orada 5 - 6 nəfər revanşist, separatçı hansı ki, bandaların, kollektivin,partiyaların yerləşdirdiyi adamlardır. Onlar çıxıb Rusiya sülhməramlıların qarşısını kəsirlər. Rusiya sülhməramlıların fəaliyyəti ilə bağlı biz əvvəldən dəfələrlə bəhs etmişik. İndi də, təəssüf hissi ilə xatırlatmaq istəyirəm ki, Rusiya sülhməramlıları Azərbaycan ərazilərinə tərəf kimi daxil oldular. Sülhməramlı missiyanın əsas istiqaməti ərazidə təhkükəsizlik, barışıq əhval - ruhiyyəsi aparmaqdan ibarətdir. Bunların hərəkətlərindən belə görünürdü ki, guya Ermənistan yox, Azərbaycan Ermənistanın torpaqlarını işğal edib. Onların tərəf kimi özlərini təqdim etməsi sirr deyil. Ermənilərin buna baxmayaraq, sülhməramlılara qarşı aqresiv hərəkətini başa düşmək çətindir. Ermənilər reallıqlarla barışmazlarsa, onlara nə Avropa Birliyi, nə siyasi missiyalar kömək etməyəcək. Burada yeganə variant Azərbaycanın ərazi bütövlüyü çərçivəsində Azərbaycanın vətəndaşlığını qəbul etmək, qanunlarına tabe olmaq, silahı yerə qoymaq, heç bir status, xüsusi üstünlük tələb etmədən adi qaydada yaşamaqdan ibarətdir. Mən xüsusilə qeyd edirəm ki, bu gün Rusiya sülhməramlılarına qarşı bu cür kəskin şəkildə hərəkət etmək, onları azərbaycanlıların müdafiəçisi kimi təqdim etmək növbəti erməni təxribatıdır. Bu təribatın arxasında da Avropadan gələn güclərin obrazı dayanır. Yəni istənilən halda rus sülhməramlılarına qarşı bu cür münasibət Avropadan və Qərbdən qaynaqlanan münasibətdir. Siz onların hərəkətlərinə yəqin ki, fikir verdiz. İnsana, kişiyə yaraşmayan hərəkətlər nümayiş etdirirdilər. Onlar uşaq oyunu oynayırlar və reallığın nədən ibarət olduğunu anlamırlar. Bir toplum nə qədər həyasız ola bilər ki, Azərbaycan ərazisində oturub, ona meydan oxusun? Bunlar keçməyəcək. Artıq Azərbaycan bölgədə yeni geosiyasi reallıq yaradıb və bu reallıqla barışmaq Ermənistana xeyir gətirəcək yeganə yoldur. Ona görə də, Azərbaycanın siyasi və hərbi qüdrətinə qarşı çıxmaq, Azərbaycanda yaşayan azsaylı erməni toplum üçün baha başa gələ bilər. Azərbaycan dövlət rəhbəri səviyyəsində birbaşa bəyan etdi ki, ya bizim qanunlarımıza tabe olacaq, Azərbaycan vətəndaşlığını qəbul edəcək, bizimlə sülh şəraitində yaşayacaq, ya da hara sizə xoşdur, gedin orda da yaşayın. Mən bu cür mövqeyi əslində azərbaycanlıların xeyrinə kimi qiymətləndirirəm. Çünki, qoy sülhməramlıların özləri də görsün ki, öz fikri, düşüncəsi olmayan ermənilər hansı sifətə sahibdirlər. Bütün bunlar heç nəyi dəyişməyəcək. Azərbaycan öz ərazi bütövlüyü çərçivəsində kifayət qədər ciddi və qəti siyasi kordinatlara, kursa malikdir. Azərbaycan bu kursla inamla sona kimi addımlayacaq. Bu addımların gec - tez Azərbaycanın ərazi bütövlüyünün və təhlükəsizliyi ilə nəticələnəcəyinə inanıram”.
Məhəmmədəli QƏRİBLİ
