Rusiya Federasiyasının BMT-dəki daimi nümayəndəsinin birinci müavini Dmitri Polyanski avqustun 16-da BMT Təhlükəsizlik Şurasının Qarabağdakı humanitar vəziyyətlə bağlı fövqəladə iclası zamanı dedi ki, iyulun 25-də Moskvada Rusiya, Azərbaycan və Ermənistan xarici işlər nazirləri arasında danışıqlar zamanı real kompromis, həll yolları təklif edilib və bu nəzərə alınıb.
Onun alternativ yol haqqında danışması diqqəti cəlb edib. Belə ki, Polyanski mülki və qeyri-hərbi malların daşınması üçün Ağdam və Laçın vasitəsilə paralel dəhlizlərin açılmasını vurğulayıb.
Rusiyanın BMT-dəki bu açıqlaması Azərbaycanın marağına tam uyğundur. Moskvanın BMT-dəki bu gözlənilməz gedişi nə ilə izah oluna bilər ?
Demokratik Dəyişim Partiyasının (DDP) sədri Əli Mustafa “Bakı-Xəbər”ə bildirdi ki, BMT - də Rusiyanın nümayəndəsinin bu açıqlamasının səbəbi bəllidir: “Əvvəla bu onunla bağlıdır ki, Rusiya Qarabağla bağlı məsələlərin beynəlxalq və BMT müstəvisinə çıxmasında çox da maraqlı deyil. Rusiya münaqişənin daha çox öz kontrolunda qalmasını və uzanmasını istəyir. Ona görə də bir formada Ermənistanın təklifini, məsələni BMT müstəvisinə çıxarmasını məmnunluqla qarşılamayıb. Dolayı yolla da, sanki Azərbaycana dəstək verib. Digər tərəfdən Rusiya da anlayır ki, dünyanın daha çox qəbul etdiyi realist siyasət deyilən bir düşüncə var. Bu qavrayışla bağlı Azərbaycan tərəfin də tələbləri haqlıdır. Azərbaycan ərazi bütövlüyü çərçivəsində qonşu dövlətlərlə, o cümlədən Ermənistanla da münasibətləri nizamlamaq istəyir. Konkret olaraq Azərbaycan ərazisinə daxil olan yüklərin hardan gəlib, necə getməsinin qərarını özü vermək istəyir və haqlıdır. Azərbaycanın ərazi bütövlüyü, sərhəd toxunulmazlığı kimi prinsipləri irəli sürərək belə iddiada olması doğrudur. Rusiya da bunu anlayır və digər tərəfdən Azərbaycanın mövqelərinin daha güclü olduğunu başa düşür. Yəqin ki, Paşinyan hakimiyyətinə olan münasibətin də burda rolu var. Xüsusilə Qərb ölkələrinin BMT - də Ermənistanı dəstəkləməsi Rusiyanın avtomatik olaraq Qərbə qarşı səngərdə yer almasına şərtləndirir. Yəni bütün bunların hamısı həm də bir prosesdir, oyundur. Məsələ uzanmalıdır, tez çözüləndə onlara xeyir etmir. Beynəlxalq güclərin də marağındadır ki, bu proses daimi prosesə çevrilsin. Münaqişə üzərindən onlar da regionda öz maraqlarını təmin edə bilsinlər”.
Məhəmmədəli QƏRİBLİ
