Ermənistanda istehsal olunan minalardan əziyyət çəkən yeganə ölkə Azərbaycan deyil, Ukrayna da bu minalardan əziyyət çəkir. Telegram kanallarında və KİV-də yayılan məlumata görə, ukraynalı politoloq, hərbi ekspert Aleksandr Kovalenko sosial şəbəkələrdə “İşğaldan azad edilmiş Ukrayna ərazilərində Ermənistan istehsalı olan piyada əleyhinə minalar aşkar edilib”-deyə yazıb.
O qeyd edib ki, Ukraynanın azad edilmiş ərazilərinin minalardan təmizlənməsi zamanı bəzən gözlənilməz nümunələr ortaya çıxır: “Məsələn, Ukraynada tapılan, Ermənistanda istehsal olunan E-001 piyada əleyhinə minanın fotosu dərc edilib. Bunun Ermənistan istehsallı mina olmasına şübhə yoxdur. Mən şəxsən belə minaları Qarabağda görmüşəm”.
Politoloqun sözlərinə görə, Ermənistanın Rusiyaya mina verməsi, onların sayı və Rusiya ordusuna məxsus silahların siyahısına necə daxil olması barədə indiyədək məlumat olmayıb: “Müvəqqəti işğal altında olan Krımda erməni diasporunun nümayəndələri işğalçılarla sıx əməkdaşlıq edirlər. Hətta Krım Könüllülər Birliyinin rəhbəri Armen (Samvel) Martoyan 44 günlük müharibə zamanı Qarabağa gedib və orada döyüşmək üçün könüllülər göndərib. Odur ki, tədarüklə bağlı silsilə kanallar yaradılmış ola bilər”.
Ukraynanın minalanmasında Ermənistanın da əlinin olmasının heç bir təəccüb doğurmadığını deyən politoloq Mehman İsmayılov “Bakı-Xəbər”ə şərhində “rusların Ermənistan istehsalı olan minaları Ukrayna ərazisində basdırması təəccüblü deyil. Ermənistan Rusiyaya silah da ötürür, istehsal etdiyi minaları da verir. Bundan əlavə, Rusiya sanksiyalar altında olduğu üçün o sanksiyalardan qaçması üçün bütün cinayətkar sxemlərdə iştirak edir. Bu yaxınlarda məlumat yayıdı ki, Ermənistan ABŞ-dan, Avropa İttifaqından, Çindən mikro çiplər, mikro prosessorlar alıb Rusiyaya ötürür, Rusya da bu proseslərdən, mikroçiplərdən raket istehsalı üçün istifadə edir. Ermənistan hər zaman belə kirli oyunlarda aparıcı halqa rolunu oynayıb” - deyə bildirdi.
M.İsmayılovun sözlərinə görə, Ermənistanın İranla silah sövdələşməsi, sanksiyalar altında əzilən Rusiyaya bütün gücü ilə yardım etməsi hər kəsə məlumdur. “Çünki Rusiyanın Ukrayna cəbhəsində məğlubiyyəti Ermənistan üçün ən arzuolunmaz ssenaridir. Ona görə də, hələ Rusiyanın Ukraynaya təcavüzü başlamazdan öncə dəfələrlə bəyan etmişəm ki, Rusiyanın Ukraynada məğlubiyyətinin ən ağır yükünü Ermənistan çəkəcək. Çünki Ermənistan artıq bu gün sahibsiz qalıb, o artıq bütün gücü ilə ən çirkin sxemlərlə Rusiyanın Ukraynadakı müharibəsinə yardım edir. İran da, Ermənistan da Rusiyanın yanındadırlar ki, Rusiya Ukrayna cəbhəsində məğlub olmasın. Ona görə də mina məsələsi son məsələ deyil, orada ermənilərin çox ləpirləri, çox izləri aşkara çıxarılacaq. Çünki Ermənistan Rusiyanın, Frasanın və İranın əlində bir oyuncaqdır. O səbəbdən, bu ölkələrin bütün çirkli oyunları Ermənistan vasitəsilə həyata keçirilir. Hələ bizim ərazilər işğalda olduğu dövrdə İranla Ermənistanın birgə bütün dünyaya narkotik daşıması, Rusiyadan hədiyyə aldığı silahları Ermənistana satması aşkar fakt idi. Bu baxımdan, Ukrayna ərazisinin Ermənistanda istehsal olunan minalarla minalanması qətiyyən təəccüblü deyil, hələ Ermənistanın bu müharibədə iştirakına dair başqa izlər də üzə çıxacaq” - deyə M.İsmayılov əlıavə etdi.
İradə SARIYEVA
