İranın Qafandakı baş konsulu Mürtəza Abidin Varamin erməni dilini öyrənir. Bu barədə o, erməni mediasına açıqlamasında deyib.
Varamin bildirib ki, erməni dilini öyrənərkən 1640 ortaq söz olduğunu görəndə heyrətə gəlib: “Bu, məndə xoş duyğular oyadır - əlbəttə, fonetik baxımdan o sözlər bir qədər fərqli səslənir. Məsələn, xəşəng, cigər, can... Qafan muzeyində mən milli paltar geymiş erməni qadının fotosunu gördüm. Əvvəllər bizdə də belə geyinirdilər, indi də kəndlərdə bu cür geyinirlər. Bizim çoxlu oxşar adətlərimiz var”.
O əlavə edib ki, İranda erməni mədəniyyəti və abidələri qorunur. Bu il o özü də İranın Culfa şəhərində Birinci Şəhid Müqəddəs Stefan monastırının ərazisində keçirilən tədbirdə iştirak edib. Konsul Ermənistanın müxtəlif bölgələrindən olan insanların bu monastıra ziyarətinin təşkilini təklif edib. Diplomat diaspor ermənilərinin də iştirakına ümid edir.
Qeyd edək ki, “erməni milli geyimi”nin iranlı konsula “tanış” gəlməsinin səbəbi Güney türklərinin geyimi olması və onun hələ də Cənubi Azərbaycanda istifadə edilməsidir. İran diplomatı hiyləgərcəsinə erməni oğurluğuna haqq qazandırmağa çalışır.
Güney Azərbaycanın Culfa şəhərində isə hər hansı erməni monastırı yoxdur, bu, Alban abidəsidir.
“Bütöv Azərbaycanın gerçəkləşməməsi üçün İran Ermənistanla bir olmağı qarşısına məqsəd qoyub”
AMEA-nın əməkdaşı, türkoloq-alim Faiq Ələkbərli “Bakı-Xəbər”ə açıqlamasında qeyd etdi ki, İranın Qafandakı baş konsulunun bu cür açıqlama verməsinin arxasında bütöv Azərbaycan dayanır. Bütöv Azərbaycanın gerçəkləşməməsi üçün İran Ermənistanla bir olmağı qarşısına məqsəd qoyub: “Onlar hesab edir ki, İran-Ermənistan əlaqələrinin daha da üst səviyyəyə çıxması Azərbaycan məsələsinin qarşısını ala bilər. Bu səbəbdən də farslar ermənilərlə yaxınlıq edir”
Ekspert onu da əlavə etdi ki, erməni və fars toplumunun müəyyən adətlərində, geyimlərində, dillərində yaxınlıq olması mümkündür. Burda qeyri-adi, təəccübli heç nə yoxdur: “Danılmaz faktdır ki, ermənilərlə farslar arasında qohumluq əlaqəsi var. Ancaq bunu indiki anlamda, heyranləndirici formada dilə gətirmək siyasi məna daşıyır”.
F.Ələkbərlinin sözlərinə görə, İran və Ermənistan Azərbaycan xalqının İslama qədərki mədəniyyətlərini mənimsəməyə cəhd göstərir. Halbuki, Azərbaycan türklərinin bir hissəsi İslama qədər xristianlığı qəbul etmişdi. Bununla bağlı güney və quzey Azərbaycanda, o cümlədən Ermənistan adlanan ölkənin bir çox yerlərində abidələrimiz var. Həmin abidələri İran və Ermənistan tərəfi saxtalaşdırır. Konsulun nümayəndəsi bu saxtakarlığa qoşulur. Güney Azərbaycanın Culfa şəhərindəki abidə Azərbaycan türklərinə aid Alban abidələridir. Göründüyü kimi, İran və Ermənistan saxtakarlığın hər bir formasına əl atır. Onlar Azərbaycan abidələrini mənimsəməyə çalışır”.
Günel CƏLİLOVA
