BMT Təhlükəsizlik Şurasının (TŞ) avqustun 16-da keçirilən iclasına böyük ümid bəsləyən Ermənistanın və ermənilərin məyusluğunun şahidi olduq. BMT TŞ-nın iclasından əlləri ətəklərindən uzun qayıdan ermənilər növbəti diplomatik uğursuzluğun ağrısını yaşayırlar.
Onlar elə zənn edirdilər ki, ermənilərin yaşadığı Azərbaycanın Qarabağ bölgəsini Ermənistanla birləşdirən Laçın-Xankəndi yolunun guya “bağlanmasından” sonra yaranmış “humanitar böhran”ın müzakirəsi üçün keçirilən təcili iclasda hansısa uğur qazana biləcəklər, amma gözləntilər özünü doğrultmadı.
Azərbaycanın təqdim etdiyi faktlar, sübutlar, əsaslandırmalar ermənilərin növbəti oyununu pozdu və müxtəlif dövlətlərin təmsilçiləri bəyan etdilər ki, humanitar məsələni siyasiləşdirmək olmaz, məsələ xaricdə yox, Azərbaycanın özündə həll olunmalıdır. Ermənilərə də mesaj verildi ki, siz Azərbaycan torpağında yaşayırsınız.
Ermənilər əgər BMT Təhlükəsizlik Şurasında istədikləri nəticəni alsaydılar, qərarın, qətnamənin, bəyanatın qəbuluna nail ola bilsəydilər nə baş verərdi? Azərbaycanın əleyhinə bir qərar çıxarılardısa nə baş verərdi? Bu, ermənilər üçün nə demək olardı? Azərbaycan BMT Təhlükəsizlik Şurasında hansı böyük təhlükənin qarşısını aldı?
“Azərbaycan Ermənistanın yalanlarını ifşa etməklə onun növbəti saxtakar kampaniyasının qarşısını aldı və onu çox şeydən məhrum etdi, təhlükəni sovuşdurdu”
AVCİYA-nın vitse-prezidenti, siyasi şərçi, professor Məhərrəm Zülüfüqarlı “Bakl-Xəbər”ə şərhində bildirdi ki, BMT TŞ-da məlum məsələnin müzakirəsində ermənilərin heç bir nəticə əldə etməməsi Azərbaycanın böyük uğurudur. “Azərbaycanın əleyhinə hər hansı bir qərar qəbul edilsəydi nə baş verərdi? Bir qayda olaraq, BMT-nin qətnamələri tövsiyə xarakteri daşıyır. Amma Azərbaycan əleyhinə hansısa bir sənəd qəbul olunsaydı ermənilər ondan mütləq mənada bizim əleyhimizə istifadə edəcəkdi. Azərbaycanın boynuna qoymuş olacaqdılar ki, guya Azərbaycan gerçəkdən Qarabağdakı erməniləri “blokada”ya salıb, “aclığa sövq edib” özünə tabe etmək istəyir. İkinci, ermənilər keçmişdəki bütün məsələlərin üstündən xətt çəkib bu “sənədi” əsas kimi götürüb bütün danışıqları o istiqamətdə aprmağa çalışacaqdılar. Eyni zamanda da “biz erməni olduğumuz üçün bizə kin, nifrət bəsləyirlər”-deyə dünyaya car çəkəcəkdilər. Azərbaycan Ermənistanın yalanlarını ifşa etməklə onun növbəti saxtakar kampaniyasının qarşısını aldı və onu çox şeydən etdi, məlum təhlükəni sovuşdurdu. BMT-nin qəbul etdiyi sənədlər tövsiyə xarakteri daşımasına baxmayaraq, ermənilər ondan sui-istifadə edib öz çirkin niyyətlərini həyata keçirmək istəyəcəkdilər, amma bu olmadı.
Bir məqamı deyim ki, BMT TŞ-nın 1993-cü ildə qəbul olunan 4 qətnaməsinin heç biri icra olunmadı. Yəni bunun mexanizmi yoxdur. Dediyim kimi, BMT-nin qətnamələri tövsiyə xarakteri daşıyır. Sözügedən 4 qətnamə 23 ildən artıq bir müddətdə icra olunmadan qaldı, onun icrası ATƏT-in Minsk qrupuna həvalə edildi, onlar da danışıqlar yolu ilə məsələni uzatmaqla Azərbaycanı işğalla barışmağa məcbur etməyə çalışdılar. Bu da olmadı, qəhrəman əsgərlərimiz 44 günlük müharibədə problemi həll etdi. Başqa bir məsələ də var ki, BMT TŞ-nın bir sıra üzvləri Azərbaycanla strateji müttəfiqdir. Bunlardan biri Böyük Britaniyadır. Azərbaycanın Xəzər Neft-Qazının Avropaya çıxarılmasında, satışında ən böyük şirkət Böyük Britaniyanın BP şirkətidir. Belə deyək, Azərbaycanın mövqeyini orada müdafiə edən müttəfiqi var. Hətta 44 günlük müharibənin gedişində də ermənilərin xeyrinə qərar qəbul etmək istəniləndə Böyük Britaniya buna veto qoymuşdu. BMT TŞ-nın qeyri-daimi üzvləri var ki, Azərbaycanı dəstəkləyirlər. Bütün bunlar o deməkdir ki, ermənilər sadəcə şou göstərməklə məşğuldurlar. Onlar zəif olduqlarını bir daha dünyaya göstərdilər. Yəni heç bir şeyə nail ola bilmədilər”-deyə bildirən M.Zülfüqarlının sözlərinə görə, sadəcə böyük dövlətlərdən Fransadır ki, Rusiyanın Ermənistandakı mövqeyini zəiflədib orada öz mövqeyini yaratmaq istəyir, bu da mümkünsüzdür.
M.Zülfüqarlı deyir ki, dünya inkişaf edir, qloballaşır, nəyin nə, kimin kim olduğu məlum olur, ona görə də, BMT TŞ-da Ermənistanın yaratdığı şounun heç bir nəticə verməməsi Azərbaycanın diplomatik sahədə növbəti qələbəsidir. “Azərbaycanın bu sahədə qələbəsi Ermənistanın növbəti təxribatının üstündən xətt çəkdi”-deyə professor Zülfüqarlı qeyd etdi.
İradə SARIYEVA
