Azərbaycanın Xarici İşlər Nazirliyinin BMT Təhlükəsizlik Şurasında aparılmış müzakirələrə dair bəyanatında bildirilir ki, müzakirələr Azərbaycanın Ağdam-Xankəndi yolundan istifadə təklifinin beynəlxalq ictimaiyyət tərəfindən müsbət qarşılandığını və yüklərin Azərbaycanın Qarabağ bölgəsinə qanuni və şəffaf şəkildə çatdırılmasını təmin etmək üçün Ermənistanın yaratdığı maneələrin qəti şəkildə aradan qaldırılmasının labüdlüyünü bir daha göstərdi:
“BMT Təhlükəsizlik Şurasının üzvü olan bir neçə dövlətin, eləcə də Türkiyənin Azərbaycanın Qarabağ bölgəsində yaşayan erməni əsilli sakinlərin ehtiyaclarını ödəmək üçün məhsulların çatdırılması ilə əlaqədar, xüsusilə Ağdam-Xankəndi yolu olmaqla, Azərbaycan tərəfindən təklif olunan bütün marşrutların fəaliyyət göstərməsi ilə bağlı səmimi dialoq və vicdanlı qarşılıqlı fəaliyyətin zəruriliyi barədə verilən bəyanatları yüksək qiymətləndiririk”.
Müzakirələrin belə yekunlaşması o anlama gəlirmi ki, BMT Laçın yolunu blokadaya alınmış hesab etmir və Ağdam-Xankəndi yolunun alternativ yükdaşıma üçün istifadəsinə məqbul baxır?
Politoloq Yeganə Hacıyeva “Bakı-Xəbər”ə açıqlamasında bildirdi ki, son 10 ay ərzində biz ermənilərin bütün cəbhə boyu Azərbaycanın üzərinə informasiya hücumuna keçdiklərinin şahidi olurduq: “Onlar bu hücumları tək deyil, xaricdəki havadarları olan ölkələrlə birgə həyata keçirirdilər. Eyni zamanda onların dünyadakı lobbi şəbəkəsi də prosesə böyük dəstək ifadə edirdi. Burada ermənilər tərəfindən ələ alınan muzdlu jurnalistlərin də adını xüsusi qeyd edə bilərik. Onların yalanlarını həqiqət kimi bütün dünyaya sırıyırdılar. Hətta dünyanın nüfuzlu iqtisadi dərgilərini də bu prosesə cəlb edə bilmişdilər. Bu o deməkdir ki, biz BMT-də həm Ermənistana, həm onların lobbisinə və bu lobbinin təsiri altında olan şəbəkəyə qalib gəldik. Bununla, eyni zamanda öz dostlarımızı yaxşı tanıya bildik. Dostlar kimi qəbul etdiyimiz tərəflərdən tam dəstəyi almasaq da, sonda qalib gəlməyi bacardıq. Cəmi üç ölkə onların mövqeyini dəstəklədi. Biz illərlə davam edən informasiya müharibəsinin son 10 aylıq döyüşünü udduq. Müharibədən sonra onlarda belə təəssürat vardı ki, hərbdə zəif olsalar da, diplomatiyada çox güclüdürlər. Məhv olan erməni ideologiyası daha bir zərbə aldı. Bütün bunlardan sonra ermənilər zəhmət çəkib, göstərilən yolla da öz marşrutlarına davam edəcəklər. Ağdam-Xankəndi üzrə öz yükdaşımalarını həyata keçirə bilərlər. Laçın dəhlizinin gələcək təyinatı isə Zəngəzur dəhlizinə uyğun şəkildə müəyyənləşəcək”.
Ermənistan iddia edir ki, iki ölkə sərhədində Laçın keçid məntəqəsinin yaradılması ilə Azərbaycan faktiki olaraq ermənilərin yaşadığı əraziyə keçidi bağlayıb və bu, guya "humanitar fəlakət" törədib.
Amma keçid məntəqəsi yaradılana qədər məhz bu yol boyu sərhəddən qeyri-qanuni hərbi yüklərin daşınması və Azərbaycan Respublikasının Qarabağ bölgəsi ərazisində Ermənistan silahlı birləşmələrinin qanunsuz yerdəyişməsinin həyata keçirildiyi qeyd edilmir. Buna görə də, onlar göstərilən yolla da hərəkət etməlidir.
Məhəmmədəli QƏRİBLİ
