Avropa İttifaqının Ermənistandakı missiyası qərəzli fəaliyyətini özü sübuta yetirib. Bu missiya müəyyən qüvvələrin əlində oyuncaq olduğunu, sifariş əsasında fəaliyyət göstərdiyini də əməli ilə təsdiqləyib. Belə ki, missiya Ermənistan Müdafiə Nazirliyinin Azərbaycan tərəfindən Avropa müşahidəçiləri istiqamətində atəş açıldığına dair xəbərini əvvəlcə təkzib, daha sonra təsdiq edib.
Xatırladaq ki, avqustun 15-də Ermənistan Müdafiə Nazirliyi ənənəvi təxribat üsulundan istifadə edərək belə bir dezinformasiya yaydı ki, guya Azərbaycan Silahlı Qüvvələri Avropa İttifaqının müşahidəçilərinə atəş açıb. Həmin xəbərdə bildirlirdi: “Avqustun 15-də saat 12:20 radələrində Azərbaycan Silahlı Qüvvələrinin bölmələri Verin Şorja ərazisində patrul xidməti həyata keçirən Avropa İttifaqının müşahidəçiləri və onların avtomobili istiqamətində atıcı silahlardan atəş açıb. Ermənistan Müdafiə Nazirliyinin məlumatına görə, itki yoxdur”. Azərbaycan Müdafiə Nazirliyi dərhal heç bir atəşin açılmadığını bəyan etdi və Ermənistan tərəfinin yaydığı bu xəbəri təkzib elədi: “Bildiririk ki, Avropa İttifaqının müşahidəçilərinin Ermənistanda şərti sərhəd istiqamətində səfərlərinin vaxtı, onların hərəkət marşrutu, ərazidəki koordinatları, eləcə də avtomobillərin markası və nömrə nişanları Azərbaycan tərəfinə əvvəlcədən təqdim edilir. Azərbaycan Ordusunun bölmələri missiyanın səfərləri barədə məlumatlıdır. Bu səbəbdən də Ermənistan Müdafiə Nazirliyinin iddia etdiyi belə bir halın baş verməsi nəzəri və praktiki baxımdan qeyri-mümkündür”. Bütün bunlardan sonra Avropa İttifaqının missiyası da Ermənistan tərəfinin məlumatını yalan adlandırdı. Missiyanın “Twitter”də dərc etdiyi postda bu xüsusda deyilirdi: “Avropa İttifaqının heç bir patrulu atəşin hədəfi olmayıb. Biz Ermənistan-Azərbaycan sərhədi boyunca patrul keşiyi çəkir və məsuliyyətimiz zonasında atışma insidentləri də daxil insidentlər barədə Brüsselə məlumat veririk”. Amma sonradan nə oldusa, missiya bu yazdığı postu təkzib etdi. Missiyanın “Twitter”də yazdığı yeni postda deyilir: “Biz təsdiq edirik ki, Avropa İttifaqının missiyası bizim məsuliyyət zonasında atışma insidenti zamanı orada olub”. Düzdür, Avropa İttifaqının missiyasının postunda missiyanın atəşə tutulması yox, atışma insidenti zamanı “orada” olması qeyd olunur. Lakin əvvəlki postun “Twitter”dən silinməsi olduqca müəmmaldır. Avropa İttifaqının Ermənistandakı missiyası ilkin bəyanatını niyə dəyişməsinin səbəbini açıqlamayıb. Lakin Azərbaycan Xarici İşlər Nazirliyinin yaydığı bəyanat burada anti-Azərbaycan siyasəti yürüdən Fransanın əməyinin az olmadığını göstərir. Nazirlik Fransanın Avropa və xarici işlər naziri Katrin Kolonanın Ermənistanın xarici işlər naziri Ararat Mirzoyan ilə telefon danışığı nəticəsində Fransa tərəfindən verilmiş açıqlama zamanı Azərbaycana qarşı irəli sürülmüş əsassız iddialara toxunarkən bu xüsusda bildirir: “Fransız nazirin Ermənistanın saxta təbliğatına inanaraq, Avropa İttifaqının Ermənistandakı missiyası tərəfindən də yanlış olaraq dəyərləndirilən guya missiyaya qarşı atəş açılması barədə dezinformasiyaya öz açıqlamasında istinad etməsi də Fransanın bölgədə sülh və sabitliyin bərqərar olmasında maraqlı olmadığını bir daha sübut edir. Azərbaycan Müdafiə Nazirliyinin rəsmi məlumatında qeyd olunduğu kimi, Avropa İttifaqının nümayəndələrinin hərəkət marşrutu Azərbaycan tərəfinə əvvəlcədən təqdim olunur. Təqdim edilmiş həmin marşruta əsasən beynəlxalq müşahidəçilərin qeyd edilən günə təyin olunmuş istiqamətə səfərinin heç bir insident baş vermədən həyata keçirilməsinə Azərbaycan tərəfi xüsusi nəzarət edib. Missiyanın səfərinin baş tutduğu ərazi heç də Ermənistanın insident baş verdiyi iddia edilən rayonda deyil, şərti sərhədin fərqli istiqamətində olub. Son günlər şərti sərhəddə və Qarabağ iqtisadi rayonunda yeni təxribatlara zəmin yaradan Ermənistan tərəfi ənənəyə sadiq qalaraq, böhtan xarakterli məlumat yaymaqla dünya ictimaiyyətinin diqqətini yayındırmağa və bu məqsədlə Avropa İttifaqını alətə çevirməyə çalışır. Fransa tərəfinin də bu kampaniyanın alətinə çevrilməsi təəssüf doğurur".
Beləliklə, Avropa İttifaqının missiyası qərəzli və ikiüzlü olmasnı açıq nümayiş etdirir. Burada qeyd edək ki, məhz Avropa İttifaqı missiyasının gəlməsindən sonra Ermənistan daha da azğınlaşıb, çox ciddi təxribatlara əl atıb. Əslində artıq bu məsələlərdə Avropa İttifaqı müəyyən addımlar atmalıdır. Çünki Azərbaycan daha öncədən bəyan etmişdi ki, Ermənistan onun çətirinin altında gizlənərək yeni təxribatlara rəvac verəcək. Artıq bu reallaşır. İndi Avropa İttifaqının mülki missiyası ermənilərin vəkili rolunda çıxış edir. Ermənistanın Qarabağdakı ermənilərə humanitar yardım aparmaq kimi siyasi spekulyasiya, şantaj və beynəlxalq ictimaiyyət üçün qurulan növbəti şousuna Avropa İttifaqı missiyasının dəstəyi də bunun təsdiqidr. Avropa İttifaqının Ermənistandakı missiyasının maşın karvanını az qala hərbi konvoy kimi müşayiət etməsi bu riyakarlığın əyani təzahürüdür. Bu gün islamofobiyanın və rasizmin tüğyan etdiyi bəzi Avropa ölkələri çirkin iç üzlərini bu məsələdə də növbəti dəfə nümayiş etdirirlər. Bu gün guya Qarabağdakı ermənilərin “qayğısı”na qalan, mövcud vəziyyətdən narahatlıq keçirən Avropa ölkələri Azərbaycan torpaqları işğal altında qalanda, bir milyon qaçqın və məcburi köçkün məşəqqətli həyat yaşayanda susqunluq nümayiş etdirirdilər. Avropa İttifaqı Azərbaycanın 400 min sakininin Naxçıvanda blokada həyatı yaşamasının üstündən sükutla keçir. İndi də atəşkəslə bağlı məsələ Avropa İttifaqının missiyasının obyektiv fəaliyyətinin mümkünsüz olduğunu göstərir.
Nahid SALAYEV
