Son günlər ABŞ-ın və Qərbin nüfuzlu nəşrlərində Azərbaycana qarşı qarayaxma kampaniyası başlayıb. Əvvəl “Forbes”də (iki həftədə bir nəşr olunan biznes jurnalı) Evelina Oçabın reallığı təhrif edən və birmənalı ermənilərin mövqeyini müdafiə edən məqaləsi dərc olunub.
“Vaşinqton Post” qəzeti isə 6 gün ərzində Azərbaycana qarşı nə az, nə çox düz 3 məqaləyə yer ayırıb. “Vaşinqton Post”da Azərbaycana qarşı yazılara müəlliflik edən Devid İqnatius istər 44 günlük Vətən müharibəsindən öncə, istərsə də müharibədən sonra Ermənistanın və Qarabağdakı separatçıların müdafiəçisi rolunda çıxış edib, bu istiqamətdə yazılar və açıqlamalar yayıb.
Sözügedən media nümunələrinin bu addımı media etikasına uyğundurmu?
Media eksperti Müşfiq Ələsgərli “Bakı-Xəbər”ə açıqlamasında bildirdi ki, son dövrlərdə Ermənistanın hərbi-siyasi rəhbərliyinin, siyasi çevrələrinin, eyni zamanda erməni diasporunun və ümumilikdə götürsək, erməni şəbəkəsinin Azərbaycana qarşı total informasiya savaşının başladığının şahidi oluruq: “Əslində erməni şəbəkəsinin Azərbaycana qarşı bu cür hücumları həmişə olub. Son dövrlərdə bu barədə intensivliyi də müşahidə etdik. Bu da təbii haldır. Çünki 2020-ci ildə Qarabağ torpaqlarında real döyüş səhnəsində uduzan, ağır zərbə alan erməni şəbəkəsi bundan sonrakı mərhələdə isə diplomatik və informasiya savaşı müstəvisində uduzmaqdadır. Qarabağ məsələsi ətrafında aparılan sülh prosesi yekunlaşmaq üzrədir. Canab Prezident də qeyd edib ki, istənilən halda bu ilin sonuna kimi danışıqlar prosesini yekunlaşdırmaq istəyirlər. Məsələ ondadır ki, ermənilər döyüş müstəvisində uduzduqları kimi, indi diplomatiya müstəvisində də uduzurlar. Onların faktiki olaraq heç bir tələbi bu danışıqlarda nəzərə alınmayıb. Dağlıq Qarabağda yaşayan erməni millətindən olan insanlar üçün xüsusi bir status almaq kimi, yaxud başqa bir variantda üstünlük qazanmaq üçün irəli sürülən şərtlər qəbul olunmayıb. Əgər sülh prosesi yekunlaşırsa, burada ermənilərin hər hansı bir qondarma istəkləri öz əksini tapmırsa, demək onların aqressivləşəcəyini də gözləmək mümkün idi. Bu proses gözlənilən olsa da, aydın olmayan məqamlar da vardı. Bu da ondan ibarətdir ki, bəzi aparıcı dövlətlər, bəzi transmilli kütləvi informasiya vasitələri, özünü beynəlxalq statuslu elan edən bəzi qlobal təşkilatların məhz erməni havadarı kimi çıxış etmələrini müşahidə etməkdəyik. Bu sırada, xüsusilə Fransa, ABŞ - da fəaliyyət göstərən transmilli kütləvi informasiya vasitələri və beynəlxalq statuslu təşkilatların da xüsusi aktivliyi, erməni havadarı kimi çıxış etmək yönündə açıqlamaları diqqət çəkir. Təsadüfi deyil ki, son bir həftə ərzində ABŞ Dövlət Departamentinin qeyri - rəsmi tribunası kimi qəbul olunan " Vaşinqton Post " səhifələrində 3 - ə yaxın məqalə dərc olundu. Laçın yolunun guya dırnaqarası bloklanmasından başlamış, Azərbaycanda insan haqlarına kimi ən müxtəlif mövzulardan çıxaraq, qondarma faktlardan istifafə edirlər və Azərbaycanın üstünə gəlirlər. Bu sırada sonuncu məqalələrdən biri - Devid İqnatusun yazısı diqqət çəkir. Qeyd edim ki, bu təkcə " Vaşinqton Post " - la kifayətlənmir. ABŞ - da fəaliyyət göstərən bir çox blogerlər, kütləvi informasiya vasitələri də bu kampaniyada iştirak edirlər. Misal olaraq, Litse Sinel adlı məşhur jurnalisti göstərmək olar. Bir həftə öncə o da Azərbaycana qarşı Şuşa qlobal media forumunu kəskin tənqidlə çıxış etmişdi. Fransada olduğu kimi, ABŞ - da da Azərbaycana qarşı xüsusi bir kampaniya aparılır. Amma məsələləri təhlil edəndə ortaq nəticə çıxır. ABŞ - da, Fransada və digər yerlərdə vahid bir xətt görürük. Vaşinqtonda dərc olunmuş məqalələrin müəlliflərindən birinin kariyerasına baxsaq görərik ki, 2016 - cı ildə Qarabağa qanunsuz səfər etməsi ilə diqqət çəkib. İndi Qarabağda separatçı birləşmələrə himayədarlıq edən milyarder Ruben Vardanyan tərəfindən mükafatlandırılıb. Yaxud digər bir müəllifin karyerasına diqqət yetirək. O da 2016 - cı ildə xüsusilə Azərbaycan və Türkiyə yazıları ilə tanınıb, Suriya ərazisindən qanunsuz Türkiyəyə keçməklə, burada təxribatçı əməllərlə məşğul olub. Bütün nümunələrdən bu nəticə çıxır ki, həmin insanların əksəriyyəti erməni şəbəkəsinə bağlı olan, erməni diasporu tərəfindən mükafatlandırılan şəxslərdi. Buradan belə bir nəticə çıxır ki, dünyanın harasında olmasından asılı olmayaraq, erməni diasporası, lobbi təşkilatı orada olan məşhur jurnalistləri ələ almaqla, anti-Azərbaycan kampaniyasının tərkib hissəsinə çevirirlər. Erməni şəbəkəsinə bağlı olmaq, onun diqtəsi ilə hərəkət etmək ABŞ, Fransa kimi dövlətlərin mediasına yaraşan bir hərəkət deyil. Bir tərəfdən qondarma faktlardan çıxış edərək media etikasını pozurlar. Digər tərəfdən isə, əgər bu qondarma faktları hansısa siyasi qrupdan, diaspor mərkəzindən nümunələr alaraq həyata keçirirlərsə, bu da dövlət və onun mediası üçün üz qarasıdır. Ümidvarıq ki, bütün bu proseslərin qarşısı alınacaq. Azərbaycanın yolu haqq yoludur. O, 44 günlük savaşda qalib gəldiyi kimi, bu diplomatiya savaşında da qalib gələcək”.
Məhəmmədəli QƏRİBLİ
