Aİ-nin Ermənistandakı missiyası öz “boyunu aşan” bəyanatla çıxış edib. Həmin bəyanatda deyilir ki, güya qurumun apardığı gündəlik patrul xidməti nəticəsində, xüsusilə Laçın dəhlizinin girişində qoşunların yerdəyişməsi və cəmləşməsi qeydə alınmayıb. Bununla missiya, faktiki olaraq, Azərbaycan Xarici İşlər Nazirliyinin qoşunların toplanması ilə bağlı bəyanatını təkzib edib.
Sitat: “Aİ Missiyası Ermənistan-Azərbaycan sərhəd zonası boyunca patrul xidməti həyata keçirən 4 əməliyyat bazasından gündəlik olaraq hərbi və təhlükəsizlik vəziyyətinə nəzarət edir. Yerdəki məlumatlara əsasən, biz xüsusilə Laçın dəhlizinin girişində qeyri-adi hərəkət və ya qoşun cəmləşməsi görmürük”.
Qeyd edək ki, bundan əvvəl Azərbaycan Xarici İşlər Nazirliyi bəyan etmişdi ki, Ermənistan Silahlı Qüvvələri sərhədə çoxlu sayda silah və hərbi texnika cəmləyib.
Əslində neytral olmağı qarşısına məqsəd qoyan bu missiya Fransanın təsir dairəsindədir. Məhz buna görə də, açıq şəkildə ermənipərəst mövqe sərgiləyir. Son bəyanat bunu bir daha təsdiqləyirmi?
Təhlükəsizlik məsələləri üzrə ekspert Elşən Həsənov “Bakı-Xəbər”ə açıqlamasında bildirdi ki, Avropa İttifaqının aparıcı ölkələrindən sayılan Fransanın səyi ilə fəaliyyət göstərən bir missiyadan bundan artıq nəsə gözləmək sadəlövhlük olardı: “Üstəlik, bu ölkə Azərbaycanın Laçın yolunu, guya blokadada saxladığını bildirir, Qarabağ iqtisadi rayonunda yaşayan ermənilərin humanitar böhran yaşadıqlarını iddia edir, Meşəli qətliamının günahkarlarından olan Vaqif Xaçaturyanın Azərbaycan sərhədçiləri tərəfindən həbs edilməsini “humanitar hüququn kobud şəkildə pozulması” kimi qələmə verir.
Bu isə o deməkdir ki, ermənipərəst mövqedən çıxış edən missiyanın məqsədi tamamilə başqadır. Məqsəd Azərbaycanı qaralamaq, ölkəmizin genişlənməkdə olan nüfuzuna xələl gətirməkdir. Şübhəsiz, faşizmi, işğalı, terrorizmi, separatizmi dövlət siyasətinə çevirmiş bir ölkəni, yəni təcavüzkar Ermənistanı dəstəkləyən, Azərbaycanla Ermənistan arasında sülh müqaviləsinin imzalanmasına mane olan bu missiya fəaliyyətini dayandırmalıdır. Missiyanın bu “fəaliyyətindən” ağızdolusu söz açan erməni mediası bildirib ki, guya Aİ-nin missiyasının genişlənməsi Azərbaycan üçün çəkindirici təsirə malikdir. Missiya ermənilərin hər təxribatından sonra Ermənistanın mövqeyinə uyğun mövqe ortaya qoyur. Yəni ermənilərin “alovlu müdafiəçiləri” rolunda çıxış edirlər. Bununla da separatçıların törətdikləri terror və təxribata bəraət qazandırmağa çalışırlar. Bugünlərdə Rusiya Xarici İşlər Nazirliyinin rəsmi nümayəndəsi Mariya Zaxarova bildirmişdi ki, Aİ-nin missiyası yalnız vəziyyəti gərginləşdirir və Ermənistan-Azərbaycan sərhədində toqquşmanın qarşısını almaq üçün heç bir təsir göstərmir. O, həmçinin qeyd etmişdi ki, Aİ-nin Ermənistandakı monitorinq missiyasının fəaliyyəti Rusiya ilə geosiyasi qarşıdurmaya yönəlib. Son bəyanatı ilə bu missiya sanki Ermənistanın rəsmi qurumu kimi mövqe ortaya qoydu”.
Qeyd edək ki, Aİ-nin Azərbaycan və Ermənistana müşahidə missiyası göndərməsi təklifi 2022-ci ilin oktyabrında Praqa görüşündə gündəmə gəlmişdi. O zaman Prezident İlham Əliyev ölkə ərazisində belə bir fəaliyyətə icazə verməsə də, Ermənistanın Azərbaycanla sərhəd bölgələrinə iki ay müddətinə 40 nəfərlik heyətin göndərilməsinə etiraz etməmişdi. Lakin sonrakı mərhələdə Aİ-də dominant rolunda çıxış edən ermənipərəst Fransa missiya ilə bağlı çərçivələri pozdu. Nəticədə daha çox sayda, daha uzun müddətə növbəti missiya göndərilməsi ilə bağlı məsələ gündəmə gəldi və Azərbaycanın razılığı alınmadan Ermənistana ikiillik missiya göndərmək qərara alındı.
Məhəmmədəli QƏRİBLİ
