Ukraynanın Ermənistandakı müvəqqəti işlər vəkili Aleksandr Sençenko Göyçə gölündə boğulub. Bu barədə Ermənistan FHN məlumat yayıb. Qeyd olunub ki, növbətçi xilasedicilər sahildən 25 metr aralıda göldə bir nəfərin itdiyini görüblər.
Xilasedicilər həmin şəxsi sudan çıxarıblar. Təcili yardım gələndə onun öldüyünü təsdiqləyib.
Hadisə ilə bağlı cinayət işi başlanıb.
Ukraynanın Ermənistandakı səfirinə qarşı sui-qəsd ehtimalı ola bilərmi?
Siyasi şərhçi Elşad Həsənov “Bakı-Xəbər”ə açıqlamasında bildirdi ki, avqustun 13 - də, axşam radələrində Göyçə gölündə Ukraynanın Ermənistandakı səfiri vəzifəsini icra edən təcrübəli diplomat Aleksandr Şençenkonun meyiti tapılıb: “Bu haqda həm Ermənistan, həm Ukrayna mətbuatı, eyni zamanda Ukrayna Xarici İşlər Nazirliyi də öz səhifəsində məlumat verib. Bu ölüm barədə xüsusi istintaq qrupu yaradılmalıdır və hansı şəraitdə, yanında kimlərin olması araşdırılmalıdır. Göstərdilər ki, 25 metr dərinlikdə boğulub. Çox güman ki, bu şəxs üzməyi bacaran adam olub, 20 ildir diplomatiya sahəsində çalışır və idmançı cüssəli bir insandır. O üzməyi bacarmasaydı, yəqin ki, Göyçə gölünə girməzdi. Burda çox maraqlı nüanslar var. Hazırki şəraitdə Ermənistanda Rusiya qoşunları, Rusiyanı dəstəkləyən revanşist qüvvələr olduqca çoxdur. Eyni zamanda Rusiyanın agenturası da Ermənistanda kifayət qədərdir. Nəzərə alsaq ki, Rusiya-Ukrayna müharibəsi gedir, ruslar ukraynalıları hər yerdə, hər saat öldürməyə hazır olduqlarını bəyan edirlər, bu ölümün də sui - qəsd nəticəsində olması istisna edilmir. Təbii ki, hər cür hadisə ola bilər. Ölümə səbəb ürək tutması da ola bilər. Bunlar müxtəlif versiyalardı. Bunun hamısını istintaq açmalıdır, bütün versiyalar yoxlanılmalıdır. Ancaq nəzərdən qaçırmaq lazım deyil ki, Ermənistanda Rusiyaya meylli qüvvələr çoxdur və Rusiyanın orda qoşunları, hərbi bazası var. Təbii ki, Rusiyanın səfirliyinin əməkdaşları da orada Ukrayna səfirliyinin əməkdaşlarına qarşı müvafiq iş aparırlar. Yəni izləmələr, onlara qarşı materialların əldə olunması və yaxud hər hansı bir səbəbə görə rəqibi aradan götürmək kimi fəaliyyətlər həyata keçirilir. Ona görə də, bu məsələnin tam aydın olması üçün orda əsas istintaq orqanı, xüsusi xidmət orqanları və Ukraynanın xüsusi xidmət orqanlarının birgə fəaliyyəti lazımdır. Yalnız bu halda bütün həqiqətlər tam ortaya çıxa bilər”.
Ukrayna Xarici İşlər Nazirliyi (XİN) Kiyevin Ermənistandakı müvəqqəti işlər vəkili Aleksandr Sençenkonun ölüm xəbərini təsdiqləyib.
Bununla bağlı müvafiq bəyanatı Ukrayna XİN-in mətbuat xidməti yayıb: “Xarici İşlər Nazirliyi 13 avqust 2023-cü ildə təcrübəli və yüksək ixtisaslı diplomat, Ukraynanın Ermənistan Respublikasındakı müvəqqəti işlər vəkili Aleksandr Anatolyeviç Sençenkonun faciəli şəkildə həlak olmasını dərin hüznlə elan edir. Ukrayna Xarici İşlər Nazirliyi bu əvəzedilməz itki ilə əlaqədar mərhumun ailəsinə və yaxınlarına dərin hüznlə başsağlığı verir”.
Məhəmmədəli QƏRİBLİ
