Bu gün çox aktiv fəaliyyət göstərən Qərbi Azərbaycan İcması (QAİ) Qərbi azərbaycanlıların Ermənistan tərəfindən pozulmuş hüquqlarının bərpası üçün beynəlxalq təşkilatlara müraciət etməkdə davam edir.
Bu dəfə Qərbi Azərbaycan İcması “Human Rights Watch” və “Amnesty International” təşkilatlarına məktublar göndərərək, Ermənistanın etnik təmizləmə aparması və qovduğu azərbaycanlıların öz evlərinə qaıytmalarının qarşısını alması nəticəsində azərbaycanlıların pozulmuş hüquqlarının bərpasında iştirak etmələrini xahiş edib. “Azərbaycanlı əhalinin Ermənistandan zorla qovulması insan ləyaqəti və bərabərlik prinsiplərinə xələl gətirməklə, beynəlxalq konvensiya və müqavilələrə zidd olmaqla, insan hüquqlarının çoxsaylı və kobud pozuntulara səbəb olub. Ermənistan orada yaşamış azərbaycanlılara qarşı qırğın, terror, hədə-qorxu törətməklə, əmlaklarını qanunsuz ələ keçirməklə, onları təhlükə və ya az dəyərli varlıqlar kimi qələmə verən sistemli təbliğat və insanlıqdan məhrumetmə kampaniyası aparmaqla, onların hərəkət azadlığını və resurslara çıxışını məhdudlaşdırmaqla etnik təmizləmə aparıb. Ermənistan hakimiyyət orqanları, həmçinin, azərbaycanlıların qəbiristanlıqlarını, dini ocaqlarını, mədəni və tarixi abidələrini dağıdıb. Ermənistan hökuməti bunları törədərək azərbaycanlıları fiziki olaraq didərgin salmaqla kifayətlənməyib, həm də onların bir etnos kimi izlərini o torpaqlardan silməyə cəhd edib..."
Qərbi Azərbaycan İcması bu təşkilatların açıq-aşkar ermənipərəst mövqedə olduğunu bilə-bilə niyə belə müraciət edir? Məqsəd nədən ibarətdir və bunun nə kimi əhəmiyyəti var?
"Human Rights Watch” və “Amnesty International”ın ermənipərəstliyi bizi öz məqsədimizdən yayındıra bilməz"
Milli Qeyri Hökumət Forumunun prezidenti, hüquq müdafiəçisi Rauf Zeyni “Bakı-Xəbər”ə açıqlamasında "Biz 30 ildən artıq bir dövr ərzində beynəlxalq təşkilatların ermənipərəst mövqeyinin şahidi olmuşuq. Ancaq beynəlxalq təşkilatların ermənipərəstliyinə görə onlara müraciəti dayandıra bilmərik. Qərbi Azərbaycan İcması bütün beynəlxalq təşkilatlara, o cümlədən BMT, Avropa İttifaqı, Avropa Şurası, eləcə də başqa bu kimi qurumlara haqlı olduğumuz məsələlərlə, yurd-yuvalarından, vətənlərindən didərgin salınmış Qərbi azərbaycanlılarla bağlı daima bəyanatlar, müraciətlər göndərir. Bu bəyanatlar, müraciətlər indi də göndərilir, bundan sonra da göndəriləcək. Çünki haqq-ədalət öz yerini tutana, bizim hüquqlarımız bərpa olunana, indiki Ermənistan respublikasında azərbaycanlılar beynəlxaq hüquq çərçivəsində ədalətlə və ləyaqətlə yerləşdirilənə qədər bu bəyanatlar və müraciətlər davam etməlidir. Biz bununla bütün dünya ictimaiyyətinin bir daha diqqətinə çatdırırıq ki, Ermənistandan qovulmuş azərbaycanlıların beynəlxalq hüquq normaları çərçivəsində öz vətənlərinə, öz yurd-yuvalarına, tarixi torpaqlarına qayıtmaq hüququ var. Nə qədər beynəlxalq təşkilatlar bunu eşitməyəcəklər, biz o qədər bu və digər beynəlxalq təşkilatlara, bütövlükdə dünya ictimaiyyətinə bu müraciətləri göndırməliyik və haqlarımızı müdafiə etməliyik"-deyə bildirdi.
R.Zeyninin sözlərinə görə, təkcə İcma deyil, Azərbaycanda fəaliyyət göstərən bütün fəal QHT-lər həm ekoloji, həm milli hüquqlarımızla, həm də Azərbaycana qarşı olan ədalətsizliklərlə bağlı daima bəyanatlar göndərir və bunu ictimsiləşdirir.
"Human Rights Watch” və “Amnesty International”ın ermənipərəstliyi bizi öz məqsədimizdən yayındıra bilməz. Təbii ki, beynəlxalq ictimaiyyətlə işimizi gücləndirməliyik, daha intensiv və daha səmərəli fəaliyyət metodlarını tapmalıyıq və əlbəttə ki, dünya ictimaiyyətini maarifləndirməliyik. Yəni onlar birmənalı şəkildə bilsinlər ki, Azərbaycan Respublikasının əhalisinin böyük bir hissəsinin, 1 milyondan artıq qaçqın və məcburi köçkünün hüquqları tamamilə ədalətsiz, haqsız olaraq ermənilər tərəfindən tapdanıb. Burada beynəlxalq ictimaiyyəti məlumatlandırmaqla yanaşı, həm də Ermənistan beynəlxalq hüquq normaları çərçivəsində cavab verməlidir, məsuliyyəti öz üzərinə götürməlidir, bütün törətdiklərinə görə təzminat ödəməlidir və cavab verməlidir"-deyə R.Zeyni əlavə etdi.
İradə SARIYEVA
