Avqustun 14-də saat 19:25 radələrində Ermənistan silahlı qüvvələrinin bölmələri Basarkeçər rayonunun Yuxarı Şorca yaşayış məntəqəsi istiqamətində yerləşən atəş mövqelərinin dəstəyi ilə Azərbaycan Ordusunun Kəlbəcər rayonunun Mollabayramlı yaşayış məntəqəsi istiqamətində yerləşən mövqelərinin qarşısında təxribat məqsədilə mühəndis işləri görməyə cəhd göstəriblər.
Bu barədə Azərbaycan Müdafiə Nazirliyi məlumat verib. Aparılan işlərin dərhal dayandırılması və atəş nöqtələrinin susdurulması məqsədilə Ordumuzun bölmələri tərəfindən təxirəsalınmaz tədbirlər görülüb. Qeyd edək ki, ermənilər Naxçıvan istiqamətində də fəallaşmağa başlayıblar. Avqustun 13-də saat 22:45-dən avqustun 14-ü saat 07:05-dək Ermənistan silahlı qüvvələrinin bölmələri Basarkeçər rayonunun Yuxarı Şorca və Dəvəli rayonunun Arazdəyən yaşayış məntəqələri istiqamətlərində yerləşən mövqelərindən Azərbaycan Ordusunun Kəlbəcər rayonunun Mollabayramlı və Sədərək rayonunun Heydərabad yaşayış məntəqələri istiqamətlərində yerləşən mövqelərini müxtəlif çaplı atıcı silahlardan fasilələrlə atəşə tutub. Ermənilərin cəbhə boyunca, hətta Naxçıvanı da hədəfə alaraq törətdikləri təxribatlar nəyə hesablanıb?
Hərbi-siyasi ekspert Ramil Məmmədli “Bakı-Xəbər”ə açıqlamasında bildirdi ki,
Azərbaycan və Ermənistan arasında davamlı sülhün bərqərar edilməsi istiqamətində göstərilən səylər Ermənistanın məqsədyönlü gərginlik və revanşizm siyasəti nəticəsində hələlik heç bir nəticə vermir:
“Ermənistan Xankəndiyə silah-sursat daşımaq üçün keçid məntəqəsinin ləğv edilməsini istəyir. Ermənilər beynəlxalq ictimaiyyəti çaşdırmaq üçün humanitar aksiya şousu yaradırlar. Heç kəs təminat verə bilməz ki, Ermənistanın Xankəndiyə göndərəcəyi yük maşınları ilə silah-sursat daşınmayacaq. Qırx dörd günlük Vətən müharibəsindən sonra biz ermənilərin Qarabağda minalar basdırdıqlarının şahidi olmuşuq.
Ermənistanda revanşist qüvvələr xaricdəki himayədarlarının göstərişi ilə sülh prosesinə əngəl yaradırlar, Azərbaycana qarşı qanunsuz, absurd iddialar irəli sürürlər. Ermənistanın bölgədə "humanitar vəziyyətin pisləşməsi" və "davam edən blokada" ilə bağlı əsassız iddiaları ikrah doğurur. Bununla paralel olaraq, Ermənistan bütün şərti sərhədlərimiz boyinca təxribatlara əl atır. Hətta Qarabağdan çox uzaqda yerləşən Naxçıvanı belə atəşə tuturlar. Bu gün beynəlxalq ictimaiyyətin Ermənistanın təxribatlarına adekvat reaksiya verməsi olduqca önəmlidir. Azərbaycanın suveren ərazilərində qanunsuz yerləşdirilmiş radioelektron mübarizə vasitələrinin istifadəsi göstərir ki, ermənilər yeni müharibəyə hazırlaşırlar. Ermənistanın Azərbaycana qarşı ərazi iddialarına son qoymaq əvəzinə təxribatlarla məşğul olması onlara yaxşı heç nə vəd etmir.
Ermənistanın bölgədə sabitliyin bərqərar edilməsi, erməni sakinlərin Azərbaycan cəmiyyətinə reinteqrasiya səylərinə təhdid törədən Laçın sərhəd keçid məntəqəsinə qarşı həyata keçirdiyi təxribatlar və müxtəlif istiqamətlərdə atəşkəsi pozması bu ölkənin sülh prosesində maraqlı olmadığını göstərir”.
Məhəmmədəli QƏRİBLİ
