Bu gün Ermənistan sülh prosesini uzatmaq üçün müxtəlif təxribatlara əl atır. Qondarma "qaçqın", "deportasiya" iddiaları ilə çıxış edən Ermənistanın rəsmi qurumları bununla dünyanın diqqətini öz cinayətkar əməllərindən yayındırmağa çalışır.
Qərbi Azərbaycan İcması beynəlxalq qurumlara müraciət edərək, onları Qərbi azərbaycanlıların indiki Ermənistan ərazisinə qayıtması üçün tədbirlər görməyə çağırır. Əlbəttə, azərbaycanlıların geri qayıtmaq hüququ var və bu bütün beynəlxalq sənədlərdə təsbit olunub. Azərbaycanda bu istiqamətdə Qərbi Azərbaycan İcması tərəfindən işlər görüldüyü bir vaxtda Ermənistanda da "canlanma" yaranıb. Azərbaycanın haqlı mübarizəsinə qarşı öz uğursuz iddialarını irəli sürən ermənilər özlərini növbəti dəfə biabır edib. Belə ki, Ermənistan Ədliyyə Nazirliyində Azərbaycandan "deportasiya olunmuş" erməni "qaçqınların" geri qayıtmaq "hüququ" məsələsinin müzakirə olunduğu barədə məlumat yayılıb.
Ədliyyə nazirinin müavini Karen Karapetyan "1988-1992-ci illərdə", eləcə də 44 günlük müharibə dövründə "Azərbaycan SSR-dən, Naxçıvandan və "Dağlıq Qarabağdan" "məcburi köçkün" düşmüş erməni "qaçqın" və "məcburi köçkünlərin" "problemləri" ilə məşğul olan ictimai təşkilatların nümayəndələrini qəbul edib.
İddia edilib ki, guya 2020-ci ildə baş verən müharibədə "onlarla erməni deportasiya edilib". Görüşdə "deportasiya edilmiş" erməni "qaçqınların" hüquqi statusu" və geri qayıtmaq "hüququ" ilə bağlı məsələlər müzakirə edilib.
Göründüyü kimi, ermənilər saxta deportasiya şousuna başlayır. Məsələ ilə bağlı mövqe bildirməsi üçün Qərbi Azərbaycan İcmasına sorğu göndərdik, sorğumuza cavab almadığımız üçün mövzunu ekspertlə müzakirə etdik. Qurumun mövqeyini də öyrənməyə çalışacağıq.
"Görünür, artıq beynəlxalq qurumlar Ermənistana təzyiq edir ki, Qərbi azərbaycanlıların hüquqlarını bərpa etsin, Ermənistan da öz vəzifəsini icra etmək əvəzinə bizə qarşı qondarma iddialarla çıxış edir"
AVCİYA-nın vitse-prezidenti, professor, siyasi şərhçi Məhərrəm Zülfüqarlı "Bakı-Xəbər"ə şərhində "Ermənilər çalışırlar ki, həmişə məqam və fürsət düşəndə saxta iddialardan istifadə etsinlər. Hər zaman saxta, əsassız bir iddia ortaya atıblar və hər dəfə də biz onlara əsaslı cavab vermişik.
Bu dəfə biz irəli düşmüşük. Bilirsiz ki, bizə qarşı ənənəvi olaraq erməni yalanları, iftiralar olub, biz isə ayılıb sonradan cavab vermişik, hətta bir çox hallarda gecikmişik də. Amma Qərbi Azərbaycan İcmasının azərbaycanlıların hüquqlarının bərpası istiqamətində fəaliyyətilə bu dəfə biz irəli düşmüşük və artıq icma dünyanın müxtəlif beynəlxalq qurumlarına, o cümlədən də Ermənistanın baş naziri Nikol Paşinyana müraciət edib.
44 günlük Vətən müharibəsi başa çatdıqdan sonra indi də sərhədlərin müəyyənləşməsi prosesi gedir. Azərbaycan artıq Zəngəzur dəhlizinin açılması məsələsini gerçəkləşdirəcək. Son zamanlar Qərbi Azərbaycan İcması soydaşlarımızın öz torpaqlarına qayıtması, onların pozulmuş hüquqlarının bərpa olunması istiqamətində fəaliyyətə başlayıb. Ermənistanın Naxçıvana qarşı ərazi iddiaları olub, ermənilər həmişə bu iddia ilə çıxış ediblər. Qərbi Azərbaycan İcmasının yaradılması və fəaliyyətinin get-gedə genişlənməsi erməniləri təşvişə salıb.
Biz bu icmanı çoxdan yaratmalı idik. Amma gec də olsa yarandı, artıq müsbət fəaliyyəti də mövcuddur. Ermənistanın yalandan "Naxçıvandan deportasiya edilən ermənilər"in olduğunu iddia etməsi çox gülüncdür. Bu tamamilə uydurma bir iddiadır. Guya ermənilər bizim ərazilərdən "deportasiya edilib", onların "hüquqları" pozulub kimi mənasız iddialarla Qərbi Azərbaycan İcmasının fəaliyyətinə cavab vermək istəyirlər..."-deyə bildirdi.
M.Zülfüqarlının sözlərinə görə, ermənilərin "istinad" etdiyi mənbələr uydurmadır və Naxçıvanın onlara aidiyyəti yoxdur, Naxçıvandan ermənilər deportasiya olunmayıblar. "1828-ci ilin mart ayının 21-də, Novruz bayramı günü Çar Rusiyası İrəvan, Naxçıvan xanlıqları ərazisi və Ordubad mahalında, yəni bizim üç ərazidə "erməni vilayəti" yaradıb. Yəni onlar həmişə ona "istinad" ediblər ki, burada erməni vilayəti" olub, bura zaman-zaman ermənilər köçürülüb və sair. İrəvan Ermənistanın paytaxtı olduğu üçün onun adını çəkmirlər, Naxçıvana isə bu cür iddia edirlər.
Bədnam Türkmənçay müqaviləsinə qədər onlar burda yox idilər. İndi durub qondarma tarix yaradıblar.
Qərbi Azərbaycan İcmasının fəaliyyəti onları narahat edir və bu səbəbdən də növbəti saxtakarlığı əl atırlar. Guya icmaya alternativ icma yaradıblar, amma onların yaratdığı təşkilatlatın heç bir mənası yoxdur. Qərbi Azərbaycan İcması qarşıya qoyduqları hədəfə tam olaraq çatacaq və erməni yalanları tamamilə iflasa uğrayacaq. Guya öz aləmlərində Azərbaycana təzyiq göstərmək istəyirlər, amma bu mümkün olmayacaq. Görünür, artıq beynəlxaq qurumlar Ermənistana təzyiq edir ki, Qərbi azərbaycanlıların hüquqlarını bərpa etsin, Ermənistan da öz vəzifəsini icra etmək əvəzinə bizə qarşı qondarma iddialarla çıxış edir. Ermənilər deportasiya edilməyib, onlar azərbaycanlıları deportasiya ediblər" - deyə M.Zülfüqarlı qeyd etdi.
İradə SARIYEVA
