Ermənistandakı “Xaçlılar” dəstəsinin komandiri Sarqis Poqosyan Azərbaycana qarşı savaşa başlayacaqları təhdidini edib. Poqosyan İrəvanda keçirilən aksiyada bildirib ki, Ermənistan hakimiyyətinə və Azərbaycan tərəfinə axşama qədər vaxt verirlər: “Əks halda biz, mitinq iştirakçıları olaraq, Laçın dəhlizinə yürüş edəcəyik və yolda hərəkəti özümüz bərpa edəcəyik. Bunun üçün silah tapacağıq, biz döyüşçüyük. Qazandıqlarımızı Azərbaycana təslim etməyə imkan verməyəcəyik”.
Hökumətdən heç bir cavab almayan erməni təxribatçılar Kornidzor şəhərinə yola düşüblər.
Dəstənin üzvləri avqustun 9-da günorta saatlarında Laçın dəhlizi yaxınlığına gətirilən yük maşınlarının yerləşdiyi Kornidzor şəhərinə çatıblar. Ermənistan dövlət səviyyəsində bu təxribat hazırlıqlarına dəstək vermiş kimi görünür. Əgər ermənilər silahlanıb Laçın yoluna basqın edərsə, Azərbaycan onlara necə cavab verməlidir?
Hərbi-siyasi ekspert Emin Həsənli “Bakı-Xəbər”ə açıqlamasında bildirdi ki, bütün bu təxribatların arxasında Ermənistan hakimiyyəti, daha doğrusu, Ermənistanın arxasındakı qüvvələr durur: “Ermənistan heç bir zaman müstəqil olmayıb. Hər zaman Rusiyadan asılı olub. Hazırda da ABŞ - dan və Qərbdən asılıdır. Ermənistanı həm Rusiya səfiri, həm də ABŞ səfiri idarə edir. Ona görə də, Laçın dəhlizində sərhəd buraxılış məntəqəsi qoyulandan sonra başlayan hadisələr, müxtəlif təxribatlar gözə çarpır. Deyilirdi ki, 2021 - ci ildə sülh müqaviləsi imzalancaq. Ancaq 2023 - cü il oldu. Hər il danışıqlar uzandı və ermənilər götürdükləri öhdəliklərin heç birini yerinə yetirmədi. Yaxşı olardı ki, Rusiya sülhməramlıları gələn kimi Rusiya və Azərbaycan prezidentləri ilə Ermənistan baş nazirinin imzaladığı 10 noyabr bəyanatının şərtlərinə əməl olunardı, erməni silahlı qüvvələri Qarabağdan çıxıb gedərdi. Azərbaycanın müstəqilliyini, ərazi bütövlüyünü tanıyan Rusiya Xocəvənddə, Xocalıda, Xankəndidə üçrəngli bayrağın qaldırılmasını təmin edərdi. Təəssüflər olsun ki, bu gün Laçın dəhlizi ilə bağlı beynəlxalq güclər “Qarabağda nə üçün Azərbaycan bayrağı dalğalanmır?” fikirlərini açıq bildirmək istəmir. Ayrı - ayrı vaxtlarda bildirirdilər ki, Azərbaycanın humanitar yardımını dəstəkləyirlər. Sonradan kifayət qədər bu fikirlər öz əsasını tapmadı və bu da təəssüf doğurdu. O ki qaldı Ermənistanda ayrı - ayrı dəstələrin, müxalifətin radikal rəhbərlərinin belə hallar törətməsinə, onlar da heç nəyə nail ola bilməyəcəklər. Hər hansı bir təxribat olarsa, Azərbaycan silahlı qüvvələri layiqincə cavablarını verəcəklər. Amma Ermənistan özü bütün bu təxribatların qabağını almalıdır. Bütün məsuliyyət Ermənistan hakimiyyətinin üzərinə düşür. Təbiidir ki, bu üsullarla diqqəti saxta “blokada” təbliğatına yönəltmək istəyirlər. Onların sərhədi pozmağa gücləri çatsaydı, sərhədə yığdıqları yük maşınlarını keçirməyə nail olardılar. Belə çağrışlara əhəmiyyət vermək lazım deyil. Azərbaycan sərhədləri çox etibarlı şəkildə mühafizə edilir. Kimin onu pozmağa cürəti varsa, belə bir cəhd etsin və cavabını görsün”.
Məhəmmədəli QƏRİBLİ
