Qarabağdakı separatçı tör-töküntüsünün "lideri" Araik Arutyunyan reallıqlarla barışmaq əvəzinə, davranışları ilə özünü daha da gülünc vəziyyətə salır.
Bütün dayaqlarının laxladığını yaxşı anlayan separatçıbaşı Araik yenə qondarma iddialarla beynəlxalq birliyə müraciət edib. Qondarma "blokada", uydurma "genosid" "təhlükəsi" ilə çıxış edən oyuncaq "lider" iddia edib ki, guya "Arsax xalqını" "soyqırım" "gözləyir" və bunun "qarşısının alınması" və "blokadanın aradan qaldırılması" üçün "təcili tədbirlərin görülməsi ümidi ilə beynəlxalq ictimaiyyətin aktyorlarına təcili müraciət göndərib". Başdan-başa cəfəngiyatla dolu olan üzdəniraq müraciətdə Araik ondan üz döndərən Paşinyan hakimiyyətindən tələb edib ki, Ermənistan "təcili və konkret tədbirləri əhatə edən qətnamənin qəbul edilməsi", "Laçın dəhlizinin Azərbaycan tərəfindən blokadaya alınması və "Arsax"ın "qeyri-qanuni" "blokadası" nəticəsində yaranmış "humanitar fəlakətin" müzakirəsinə görə dərhal BMT Təhlükəsizlik Şurasının təcili iclasını çağırmağa nail olmalıdır.
Araik məlum əsassız iddialarla dünya birliyinə müraciət edib, Ermənistandan da tələb edib ki, Ermənistan BMT Təhlükəsizlik Şurasının xüsusi iclasının çağırılmasına nail olsun və orada Qarabağ məsələsini müzakirə etdirsin.
Ermənistanın hazırkı şəraitdə BMT Təhlükəsizlik Şurasının Qarabağ üzrə xüsusi iclasını çağırtdırmaq gücü varmı?
"Bu reallıqlar çərçivəsində də Ermənistanı himayə edənlərin nəyəsə nail olacağına inanmıram"
Siyasi elmlər üzrə fəlsəfə doktoru, Beynəlxalq Münasibətlərin Təhlili Mərkəzinin aparıcı məsləhətçisi Mətin Məmmədli “Bakı-Xəbər”ə şərhində "Əvvəla, Araikin dünya birliyinə belə bir müraciət etməsinin heç bir əsası yoxdur. Yəni nə siyasi, nə hüquqi, nə mənəvi əsası var. Qarabağdakı qondarma rejim heç bir dövlət tərəfindən tanınmayıb. Tanınmayan rejimin də dünya birliyinə, müxtəlif dövlətlərə müraciət etməsi absurddur. Onun bu müraciətinin də hər hansı bir ciddi dövlət və beynəlxalq təşkilat tərəfindən nəzərə alınacağı gözlənilmir. Sadəcə olaraq, sadə dildə desək, hay-küy salırlar ki, diqqəti özlərinə cəlb etsinlər. O ki qaldı Ermənistanın məsələni BMT Təhlükəsizlik Şurasında müzakirəyə çıxarması məsələsinə, əlbəttə, Ermənistan kiçik dövlətdir, elə bir siyasi, iqtisadi, hərbi potensialı olmayan ölkələrdəndir. Ancaq nəzərə almaq lazımdır ki, Ermənistanın dünya birliyində çox güclü himayəçiləri var. Ehtimal etmək olar ki, bu himayəçilərin hesabına onlar hər hansı bir formadasa bu məsələni BMT Təhlükəsizlik Şurasında müzakirəyə çıxara bilərlər. Necə ki, bugünə qədər həmin himayəçilər müxtəlif vaxtlarda Ermənistanın maraqlarına uyğun olaraq məsələni BMT Təhlükəsizlik Şurasında müzakirəyə çıxarmağa çalışıblar. Yeni cəhdlər də ola bilər, amma bu cəhdlərin də ciddi nəticə verəcəyini gözləmirəm. Gözləməməyimin də əsas səbəbi ondan ibarətdir ki, birincisi, Azərbaycan bu məsələdə tamamilə haqlıdır. Yəni beynəlxalq hüquq normaları bizim tərəfimizdədir, Azərbaycan heç bir qanun pozuntusuna yol verməyib"-deyə bildirdi. Məsələnin ikincisi tərəfinə gəlincə, M.Məmmədli vurğuladı ki, həm regionda, həm də dünyada yeni geosiyasi reallıqlar yaranıb. "Bu reallıqlar çərçivəsində də Ermənistanı himayə edənlərin nəyəsə nail olacağına inanmıram. Hətta bu məsələ BMT Təhlükəsizlik Şurasının iclasına çıxarılarsa belə, onların nəyəsə müvəffəq olacağına ehtimal vermirəm. Amma bütün hallarda hesab edirəm ki, Azərbaycan diplomatiyası, xarici siyasəti ayıq olmalıdır, hazır olmalıdır ki, hər hansı bir gözlənilməz məsələ bizə qarşı təhdid olaraq ortaya çıxarılarsa ona cavab verə bilək"-deyə M. Məmmədli əlavə etdi.
İradə SARIYEVA
