Xəbər verildiyi kimi, Baş prokuror Kamran Əliyev İran Baş prokurorunun təhlükəsizlik və siyasi məsələlər üzrə müavini Mehdi Əmiri İsfahaninin rəhbərlik etdiyi nümayəndə heyətini qəbul edib. İran baş prokurorunun müavini Azərbaycanın Tehrandakı səfirliyinə istintaqın gedişi barədə hesabat verib.
İsfahani cinayət işinin istintaqının gedişatı barədə ətraflı məlumat verərək, qısa müddət ərzində istintaqın tamamlanaraq iş üzrə qanuni qərarın qəbul olunmasının təmin ediləcəyini və təqsirli şəxslərin layiqli cəza alacağını bildirib.
Məgər İran lap əvvəldən demirdi ki, bu adi bir məişət cinayətidir? Əgər doğrudan da məlum cinayət adi bir kökə malikdirsə, az qala bir ilə yaxındır bu işin araşdırılması niyə sona çatdırılmır? Əgər doğrudan da bu sadə bir məişət mübahisəsi idisə nə mürəkkəb şey var burada? Onların dediyi kimi idisə, o zaman bunun açılmasına 1-2 ay vaxt lazım idi. Ancaq gör üstündən neçə ay keçir.
“Bütün bunlar onu göstərir ki, İran tərəfi obyektiv araşdırma aparmaqda maraqlı deyil”
Məsələ ilə bağlı “Bakı-Xəbər”ə açıqlama verən hüquqşünas Şəmsəddin Əliyev hesab edir ki, İran tərəfinin istintaqa münasibəti göz qabağındadır: “Məsələ ondadır ki, məlum hadisə baş verən zaman dəfələrlə fikirlərimizi mətbuata bəyan etdik. Eyni dinə, kitaba malik olan ölkədə Azərbaycan səfirliyində terror törədildi. Məqsəd daha çox səfirlik işçisini məhv etmək idi. Sadəcə, terrorçu öz iradəsindən asılı olmayaraq buna nail ola bilmədi. Əgər diplomatik korpusumuzun mühafizəçisi fədakarlıq göstərməsəydi, daha dəhşətli vəziyyət yarana bilərdi. Ancaq bütövlükdə, səfirliyin ərazisi, Azərbaycan ərazisidir. Ona görə də Azərbaycan Respublikasının tərəfdar çıxdığı, beynəlxalq müqavilələrdən irəli gələn məqamlar nəzərə alınmalı idi. Yəni, cinayət törətmiş əcnəbilər ölkəmizin Cinayət Məcəlləsinə uyğun məsuliyyətə cəlb olunmalıydı. Ancaq təəssüflər olsun ki, İran tərəfi məsələnin prossesual tərəflərini nəzərə almadı. Eyni zamanda, istintaqla bağlı Azərbaycanla birgə hərəkət etmədi. Birgə əməkdaşlıqdan imtina etdi. Halbuki, bizim kifayət qədər dəlillərimiz var idi. İran bununla bağlı müxtəlif bəhanələr ortaya atdı. Bunu onunla əsaslandırdılar ki, guya məlum terror məişət səviyyəsində törədilən cinayətdir. Ancaq əslində cinayətin miqyası, onun təhlükəsizlik dərəcəsi faktiki olaraq terrorçuluq hadisəsi idi. Bu, məişət cinayəti olsaydı, istintaqı bu qədər uzanmazdı. Ona görə də İranın yanaşması tamamilə yanlış yanaşma idi. Əfsuslar olsun ki, İran tərəfi cinayətin terror motivi ilə bağlı heç bir araşdırma aparmadı. Bu gün də bizə tam təfərrütatı ilə bəlli deyil ki, həmin adamla bağlı bizim Cinayət Məcəlləsində əksini tapan hansı maddə ilə cinayət işi açılıb. Ona görə də İran tərəfinin bizim baş prokurora verdiyi vədlərə o qədər də inanmıram. Çünki buna oxşar vədlər çox verilib. Əgər bunların verdiyi vədlər doğru olsaydı, ortada real nəticə olardı. Bu baxımdan Azərbaycan beynəlxalq tələblərə uyğun öz addımlarını atmalıdır. Bir ilə yaxındır ortada real, qaneedici nəticə yoxdur. Bütün bunlar onu göstərir ki, İran tərəfi obyektiv araşdırma aparmaqda maraqlı deyil”.
Vidadi ORDAHALLI
