Molla rejimi, panfarsistlər özlərini bir türk düşməni kimi göstərməkdə davam edirlər. Türk dili, türk mədəniyyəti, türk dilində təhsil, türk dilində danışmaq kimi məsələlər gündəmə gələn kimi ariyançıların qarnına sancı dolur. Molla rejiminin tabeliyində olan mətbuat daim antitürk ruhlu yazılar dərc edir və bununla da rejimin içini açıb tökür.
İndi də sabiq İran prezidenti Haşimi Rəfsancaniyə bağlı olan İranın "Sazəndegi" qəzetində Azərbaycan xalqı və onun dili təhqir edilib. Bu barədə Azad İran telekanalı məlumat yayıb. Qeyd olunur ki, “Şahnamə alimi” kimi tanınan Cavad Rəncbər Derəxşilər adlı yazıçı qələmə aldığı bu yazıda Türk Dili Akademiyasının yaradılması məsələsini pisləyərək deyir: "Ara-sıra Türk Dili Akademiyasının yaradılmasından söhbət açılır. Bu, iransevərləri narahat edir və bəzi anti-İran dairələr bunu alqışlayır...Türk Dili Akademiyasının yaradılmasının heç bir intellektual, tarixi və siyasi əsası yoxdur. Bu qurumun vəzifələri haqqında deyilənlərin hamısı etibarsızdır, məlumatsızlıqdan və ya eqoizmdən irəli gəlir”.
Maraqlıdır, “Şahnamə alimi” niyə narahatdır?
“...Türk dilini belə gözardı etməsinin əsas səbəbi son vaxtlar güneydə yaşayan soydaşlarımızın dil uğrunda mübarizəsinin həddən artıq kəskinləşməsi...”
Müstəqil siyasətçi Bünyamin Qəmbərli “Bakı-Xəbər”ə şərhində “Sualla bağlı onu demək olar ki, adətən zəiflər, tarixi, mədəniyyəti olmayanlar başqalarını qaralamaqla, pisləməklə özünün zəif, qüsurlu olanlarını reklam etməyə çalışır. “Şahnamə”nin özü heç bir tutarlı əsası olmayan bir nağıldır. Dəfələrlə bildirmişəm ki, perslərin bu bölgəyə Hindistan ərazisindən gəlmələrinin konkret tarixi var. Perslər miladdan öncə VIII yüzillikdə ilk dəfə indiki Şiraz ərazisinə gəliblər. Perslərin ora gəlişinə qədər isə o ərazidə qutlar, hurilər, lulubilər, kassilər və digər türk tayfaları əsasında olan dövlətlər qurulub. Bundan sonra da Manna idi. İndi perslərin türk dilini belə gözardı etməsinin əsas səbəbi son vaxtlar güneydə yaşayan soydaşlarımızın dil uğrunda mübarizəsinin həddən artıq kəskinləşməsi, milli hökumət, istiqlal, müstəqillik tələb etməsidir. Hansısa bir pers şovinistinin Türk dili akademiyasının yaradılmasını “əsassız” saymasının özü cəfəngiyyatdır”-deyə bildirdi.
B.Qəmbərli qeyd etdi ki, Azərbaycan dövləti 2-3 minlik əhalinin danışdığı Xınalıq dilini, yaxud ingiloy, saxur dillərini qorumaqla qürur duyduğu halda panfarsistlər, molla rejimi 40 milyonluq Azərbaycan türkünü heçə saymaqla məşğuldur. “Başqa xalqların dilini, mədəniyyətini qorumaq biz türklərin böyüklüyüdür. Amma özünü İran adlandıran ölkədə fars şovinstləri 40 milyonluq Azərbaycan türkünün, ərəblərin, bəlucların və digər xalqların haqlarını tapdamaqla məşğuldurlar. Türk dilinə qarşı bu münasibətə Türkiyənin və digər türk dövlətlərinin susqun qalmasının özü bir sual doğurur. Nədən Türkiyə İrandakı antitürk əhval-ruhiyyəsinə bu qədər dözümlülük göstərir, susur?”-deyə B.Qəmbərli əlavə etdi.
B.Qəmbərli hesab edir ki, Azərbaycan hakimiyyəti, Azərbaycan Milli Elmlər Akademiyası, Azərbaycan Xarici İşlər Nazirliyi molla rejiminin növbəti anti-Azərbaycan dili siyasətinə sərt reaksiya verəcək. B.Qəmbərlinin sözlərinə görə, amma bununla bərabər Tehrandakı səfirliyimizə olan hücuma necə sərt reaksiya verilmişdisə, Türk Dili Akademiyası ilə bağlı səsləndirilən cəfəngiyyata qarşı da bu cür sərt reaksiyanın verilməsi vacibdir, molla rejimi bu ikiüzlü və yaramaz siyasətini dayandırmağa məcbur edilməlidir. “Bir atalar sözümüz var, onu deməyə məcburam. “İt hürər karvan keçər”. Yəni qəzetin də, alimciyin də iddiasına bu qəbildən yanaşılmalıdır”-deyə B.Qəmbərli qeyd etdi.
Əli TURABOV
