Prezident İlham Əliyevin Qarabağdakı separatçılarla bağlı fikirləri məlumdur. Ölkə başçısı dəfələrlə vurğulayıb ki, Xankəndidəki “parlament” buraxılmalıdır, özünü “prezident” adlandıran ünsür təslim olmalıdır, bütün “nazirlər”, “deputatlar” və digərləri öz “vəzifə”lərini artıq kənara qoymalıdırlar. Amma təəssüflər olsun ki, separatçılar bundan nəticə çıxarmaq əvəzinə başqa işlərlə məşğul olurlar.
Oyuncaq “parlamenti” buraxmaq əvəzinə “parlament”ə yeni “sədr” “seçiblər”. "Armenpress" xəbər verir ki, bu "vəzifə"ni Erməni İnqilab Federasiyası Daşnaksütyunun fraksiya üzvü David İşxanyan tutub. Bununla bağlı keçirilən iclasda "prezident" Araik Arutyunyan və keçmiş "spiker" Artur Tovmasyan da iştirak edib. Separatçıların "parlament sədri" Artur Tovmasyan iyulun 29-da istefa verib. Bu arada Ermənistan parlamentinin sədri Alen Simonyanın separatçıların əldəqayırma “parlament”inin yeni “sədri” ilə telefon danışığı apardığına dair məlumat yayılıb. Ermənistan parlamentinin mətbuat xidmətinin yaydığı məlumata görə, A.Simonyan “həmkarı”nı təbrik edib, onunla “gələcək əməkdaşlıq məsələsini” müzakirə edib.
A.Simonyanın qondarma “parlament”in kukla “sədr”inə zəng vurması, onu təbrik etməsi, onunla “gələcək əməkdaşlığı müzakirə” etmək istəyini dilə gətirməsi ortaya bir sıra suallar çıxarır.
Birincisi, Azərbaycan separatçılara dəfələrlə müraciət edib ki, qondarma qurumları buraxın, Azərbaycana tabe olun. Azərbaycanın onlardan əsas tələblərindən biri budur. Amma bunun əvəzində onlar separatçı hərəkətlərini daha geniş şəkildə davam etdirirlər. İkincisi, Ermənistan Azərbaycanın ərazi bütövlüyünü necə tanıyıb ki, qondarma quruma “parlament sədri” seçilən kimi Ermənistan parlamentinin sədri bunu “dövlət qurumu”nun “rəhbəri” kimi qəbul edib, bu şəxsə zəng vurub danışıb?
Aydın Quliyev: “Simonyanın separatçı oyuncaq "spikerə" təbrik zəngi Azərbaycanın daxili işlərinə hələ davam edən müdaxilənin yeni təzahür formasıdır və beynəlxalq vasitəçilər fakta prinsipial qiymət verməlidir”
“Bakı-Xəbər” qəzetinin baş redaktoru Aydın Quliyev öz rəsmi Feysbuk hesabında “Simonyanın Xankəndinin separatçı "spikerinə" təbrik zəngi Qarabağ ətrafında sülh təşəbbüslərini heçə yendirir...” başlıqlı statusunda maraqlı təhlil aparıb: “ Paşinyanın sonuncu dəfə Evronyus televiziyasına hay-küylə verdiyi "biz Azərbaycanın ərazi bütövlüyünü tanımışıq, ancaq İlham Əliyev hələ "tanıyırıq" sözünü deməyib" bəyanatının saxta və böhtançı ifadələrdən ibarət olduğuna növbəti sübutlar yarandı. Hansı sübutları?...
Əvvala, Azərbaycan dəfələrlə Qarabağdakı qondarma və oyuncaq dövlət qurumlarının buraxılması təklifi ilə çıxış etdiyi halda, separatçılar istefa, kadr təyinatı və kadr seçimləri adı altında qeyri-legitim oyunlarını hələ davam etdirirlər. Bu günlərdə qondarma rejimin oyuncaq parlament sədri istefa verdi və yeni oyuncaq parlament sədrinin "seçildiyi" bəyan edildi.
2.Paşinyan Azərbaycanın ərazi bütövlüyünü necə tanıyıb ki, İşxanyan soyadlı bir separatçının qondarma Xankəndi rejiminin "parlament sədri seçilməsinin" ardından Ermənistan parlamentinin sədri Simonyan ona telefon açır və təbrik edərək uğurlar diləyir? Ermənistan hakimiyyətinin bu addımı rəsmi Brüsselin vasitəçiliyi ilə ötən il oktyabrın 6- da Praqada, bu il isə mayın 15- də Brüsseldə Mişelin vasitəçiliyi ilə əldə olunmuş razılaşmanın aşkar hesaba qoyulmamasıdır. Hər iki razılaşma 1991- ci il Alma- Ata sazişi əsasında Azərbaycanın və Ermənistanın ərazi bütövlüyünün 86.6 və 29.8 min kv.kilometr hüdudlarında qarşılıqlı olaraq tanınmasını ehtiva edir.
3.Simonyanın separatçı oyuncaq "spikerə" təbrik zəngi Azərbaycanın daxili işlərinə hələ davam edən müdaxilənin yeni təzahür formasıdır və beynəlxalq vasitəçilər fakta prinsipial qiymət verməlidir.
4.Simonyanın zəngi Qarabağ ermənilərini Azərbaycanla reinteqrasiyadan çəkindirməyə yönəlik yolverilməz rəsmi dövlət siyasətidir...”
Mübariz Göyüşlü: “Bu, normallaşmaya, sülh prosesinə qəsddir”
Müasir İnkişaf Birliyinin sədri, siyasi şərhçi Mübariz Göyüşlü “Bakı-Xəbər”ə şərhində bildirdi ki, Nikol Paşinyan da, Alen Simonyan da Qarabağ da daxil olmaqla Azərbaycanın ərazi bütövlüyünü tanıdıqlarını, qəbul etdiklərini bildiriblər. “Alen Simonyanın oyuncaq “parlament”in “sədri”nə zəng vurub onu təbrik etməsi Ermənistanın Azərbaycanın ərazi bütövlüyünə qarşı apardığı siyasətin göstəricisidir. Görsənir, onlar dildə bunu deyirlər, amma əməldə hələ də öz təcavüzkar niyyətlərindən əl çəkmək istəmirlər”.
M.Göyüşlü vurğuladı ki, Qarabağda separatçı “paralament”ə radikal baxışlı, daşnak ideologiyalı, daşnak təmayüllü bir şəxsin “spiker” seçilməsi, bu ətrafda aparılan işlər Azərbaycan-Ermənistan münasibətlərinin normallaşmasına, Azərbaycanın sülh təşəbbüslərinə, bu yöndə addımlarına maneə törətmək məqsədi daşıyır. “Daşnak, radikal əhval-ruhiyyəli bir şəxsin belə fəaliyyətdə yer alması ermənilərin açıq-aydın təxribatıdır və sülh prosesinin qarşısını almaq, vəziyyəti gərginləşdirmək cəhdləridir. Ermənistanın bu təxribata açıq dəstək verdiyi göz önündədir. Ermənistan bir tərəfdən rəsmən bəyan edir ki, Qarabağ da daxil olmaqla Azərbaycanın ərazi bütövlüyünü tanıyır, o biri tərəfdən də spiker oyuncaq qurumun “spiker”ini təbrik edir. Hesab edirəm ki, Ermənistanın bu davranışına beynəlxalq qurumlar sərt reaksiya verməlidir.
Qarabağdakı separatçılar Azərbaycan Prezidentinin mesajlarından nəticə çıxarsaydılar onlar üçün daha yaxşı olardı. Bu, həmçinin, Ermənistanla Azərbaycan arasında münasibətlərin daha tez tənzimlənməsinə də fayda verərdi. Amma göründüyü kimi, onlar yenə də separatçılıq yolunu tuturlar, təbii ki, bu da onların ziyanına işləyir”.
Separatçıların gərginlik yaratdığını deyən müsahibimiz hesab edir ki, Ermənistanın Laçın sərhədinə gətirdiyi maşınlar da, saxta parlament seçkiləri də sülhə ziyan vuran amillərdir. O qeyd etdi ki, separatçıların Qarabağdakı qanunsuz hərəkətləri Avropadakı və Rusiyadakı bəzi qüvvələr tərəfindən dəstəklənir. “Bu çox təhlükəli bir tendensiyadır. Hesab edirəm ki, bu ermənilər üçün ziyanlı olacaq bir haldır. Bu odla oynamaqdır. Hesab edirəm ki, Alen Simonyanın həm Azərbaycanın ərazi bütövlüyünü tanımasını bəyan etməsi, həm də ölkəsinin bu prosesdə rol alması, onun “spiker”ə dəstək zəngi bir-birinə zidd məsələlərdir və normallaşmaya, sülh prosesinə qəsddir”-deyə müsahibimiz qeyd etdi.
İradə SARIYEVA
