Uzun illərdir ki, ermənilər xristian təəssübkeşliyindən sui-istifadə edərək anti-Azərbaycan təbliğatı aparmaqdadır. 30 il Azərbaycan torpaqlarını işğalda saxlayan Ermənistan və bu ölkənin işğalçılıq siyasətinə dəstək verən qüvvələr Azərbaycanın öz torpaqlarını işğaldan azad etməsi və Qarabağda, eləcə də ətraf rayonlarda da öz suverenliyini bərpa etməsi faktı ilə barışmaq istəmir.
Odur ki, gecə-gündüz qondarma ittihamlarla Azərbaycana qarşı çıxış edirlər. Çox təəssüflər olsun ki, öz saxtakar kampaniyalarına beynəlxalq qurumları da cəlb edə bilirlər. Ümumdünya Kilsələr Şurası və Avropa Kilsələri Konfransı dinc dayanmır və erməni yalanlarına uyaraq müyyən addımlar atırlar. Erməni mətbuatının yazdığına görə, Ümumdünya Kilsələr Şurası və Avropa Kilsələri Konfransı Avropa İttifaqının Xarici siyasət və Təhlükəsizlik məsələləri üzrə Ali Nümayəndəsi Cozep Borrelə məktub göndəriblər. Adını dini təşkilat qoyan bu qurumlar gerçəyə göz yumaraq, məktubda qondarma “Arsax”ın uydurma “blokadasından” danışıblar, guya hazırda oradakı “humanitar vəziyyət narahatlıq doğurur”. Onlar Ali Komisara yazıblar ki, guya Azərbaycanın Beynəlxalq Ədalət Məhkəməsinin məcburi qərarlarına əməl etməyə və “Laçın yolunu” açmaqla “Arsax”ın “mühasirəsini dayandırmağa” məcbur etmək üçün beynəlxalq məsuliyyətə ehtiyac var. Ümumdünya Kilsələr Şurasının baş katibi Cerri Pil və Avropa Kilsələri Konfransının baş katibi Yorgen Skov Sorensenin imzaladığı məktubda tamamilə həqiqətəuyğun olmayan məsələlər yer alıb. Guya “blokada” nəticəsində “yerlərdə humanitar böhran yaranıb, qida sektorunda, dərman və sahədə problem var”, guya Qarabağda “uşaqlar da daxil olmaqla 120.000 nəfər yaşayır”. Guya Azərbaycan tərəfi “insan hüquqları”nı pozur və sair. Bu açıq məktubda yer alan məsələlər tamamilə cəfəngiyatdır və separatizmə və separatçılara dəstək verməkdir. Bütün dünya bilir ki, burada iddia olunanlar tamamilə yalandır, əsası yoxdur.
Ermənilər əgər Ümumdünya Kilsələr Şurasını cəlb edirlərsə buna Azərbaycan tərəfin və Azərbaycanın dini konfessiyalarının münasibəti necə olmalıdır? İslam Konfransı təşkilatında Ümumdünya Kilsələr Şurasının bu prosesə cəlb olunmasına qiymət verilməsi üçün nə etmək lazımdır? Yəni Ermənistan Ümumdünya Kilsələr Şurasını bu işə qoşubsa biz də İslam Konfransı təşkilatını bu işə qoşmalıyıq. Kilsələr Şurasına İslam Əməkdaşlıq Təşkilatı tərəfindən etiraz edilsə nə baş verər?
“İslam Konfransı Təşkilatı da, İSESKO da, başqa qurumlar da Ümumdünya Kilsələr Şurasının əsassız iddiasına mövqe bildirməli, Qarabağdakı vəziyyətlə bağlı gerçəkləri ifadə etməlidir”
AMEA-nın Qafqazşünaslıq İnstitutunun Qafqaz tarixi şöbəsinin müdiri, professor Qasım Hacıyev “Bakı-Xəbər”ə şərhində bildirdi ki, ermənilərin bizə qarşı irəli sürdükləri əsassız ittihamlara cavab verməliyik. “İlk növbədə ermənilərin xeyrinə beynəlxalq təşkilatlara müraciət edən kilsə qurumlarının hərəkətlərinə onlarla eyni statusda olan islam təşkilatları mövqe bildirməlidir. Əgər hansısa elmi qurum erməniləri müdafiə məqsədilə müraciət edərsə Azərbaycanın elmi qurumları dərhal adekvat addım atmalıdır, dini təşkilat edirsə dini qurumlar mövqe bildirməlidir. Ümumdünya Kilsələr Şurasının əsassız müraciətinin cavabı verilməlidir və məsələnin gerçək tərəfi beynəlxalq qurumlara izah olunmalıdır. Beynəlxalq təşkilatlara bildirilməlidir ki, ermənipərəst qüvvələrin iddiaları yalandır, heç bir blokada yoxdur, orada heç kəs acından ölmür, Qarabağdakı ermənilər bizim vətəndaşlarımızdır, Azərbaycan onlara sahib durmağa hazırdır. Ermənilərin siyasi məqsədlə qaldırdıqları məsələlər dünyanın gözü qarşısında azərbaycanlılara böyük bəlalar gətirib. Amma təəssüf ki, din və mədəniyyət sahəsində təmsil olunan ermənipərəst qüvvələr var, onlar gerçəyi gizlədib erməniləri “əzilən xalq” kimi təqdim edirlər. Onlar beynəlxalq təşkilatlara yalandan məlumat verirlər ki, guya Azərbaycan “erməniləri blokada”da saxlayır. Bu tamamilə yalandır, uydurmadır. Ümumdünya Kilsələr Şurasının və Avropa Kilsələr Konfransının üzdəniraq müraciətinə, məktubuna Azərbaycandakı xristian icması mövqe bildirməlidir. Niyə o Kİlsələr Şurası və Kilsələr Konfransı ermənilərin alban xristian abidələrini məhv etməsinə susurdular? Onlardan bu soruşulmalıdır.
Eyni zamanda İslam Konfransı Təşkilatı da, İSESKO da, başqa qurumlar da Ümumdünya Kilsələr Şurasının əsassız iddiasına mövqe bildirməli, Qarabağdakı vəziyyətlə bağlı gerçəklikləri ifadə etməlidir. Çox təəssüf ki, bu gün xaricdəki bəzi dini və siyasi təşkilatlar Azərbaycanın daxili işlərinə qarışmağa cəhd göstərir. Amma bu cavabsız qalmamalıdır. Hesab edirəm ki, QMİ başda olmaqla ölkəmizdəki bütün dini konfessiyalar Ümumdünya Kilsələr Şurasının davranışları ilə bağlı beynəlxalq təşkilatlara müraciət etməlidir. Bundan başqa islam təşkilatları mövqe bildirməlidir. Bütövlükdə, islam həmrəyliyi məhz bu məsələdə özünü bütün formalarda ifadə etməlidir. İslam təşkilatları Ümumdünya Kilsələr Şurasına layiqli cavab verərsə, o təşkilat başqa dövlətin daxili işinə müdaxilədən və qarayaxmadan geri çəkilər”-deyə Q.Hacıyev vurğuladı.
Q.Hacıyev hesab edir ki, İslam Konfransı Təşkilatı üzvü olan dövlətlər Qarabağ və Laçın yolu gerçəklikləri ilə bağlı tədbir də keçirə və beynəlxalq aləmə, xristian dini təşkilatlara, Roma papasına müraciət qəbul edə bilər, buna böyük ehtiyac var. Kilsələr Şurasının prosesə məqsədli şəkildə qoşulduğunu deyən Q.Hacıyev hesab edir ki, oradakı ermənipərəst güclər bununla dünya xristianlarının dəstəyini qazanmaq istəyir, amma biz buna imkan verməli deyilik, gerçəkləri xristian dünyasına çatdırmalıyıq. “Bu baxımdan düşünürəm ki, biz də prosesə İslam Əməkdaşlıq Təşkilatını qoşmalıyıq və belə daha yaxşı olar”-deyə Q.Hacıyev qeyd etdi.
İradə SARIYEVA
