Erməni bloger Roman Baqdasaryan hazırladığı videoməlumatda sensasion və diqqəti çəkən faktlar açıqlayıb. O qeyd edib ki, İlham Əliyev şəhərlər salanda erməni liderlər dövləti və xalqı talayıb: “Azərbaycan Prezidenti şəhərlər salanda bu ermənilər dövləti və xalqı talan edib. Məhz bu ermənilərin “xidmətləri” sayəsində Azərbaycan İkinci Qarabağ müharibəsində qələbə çalıb”.
Daha sonra Baqdasaryan Qarabağ hesabına varlanan erməni liderlərin adlarını sıralayıb.
Qarabağ separatçılarının eks-prezidenti Arkadi Qukasyan – 30 il ərzində böyük var-dövlət sahibi olub. Sankt-Peterburqda bir neçə otelin alıcısı olub.
Bako Saakyan – İrəvanda otel sahibinə çevrilib. Moskvada isə mağazalar və ticarət köşkləri alıb.
Arayik Arutunyan – Ermənistanda və xaricdə xeyli mülkləri var. Təkcə Rusiyanın Stavropolsk vilayətində böyük otellər şəbəkəsi var. Birləşmiş Ərəb Əmirliklərinin Dubay əmirliyində, Parisdə mənzillər alıb. Öz “rəfiqələrinə” Sayat-Nova küçəsində mənzillər bağışlayıb. İrəvanda böyük apartamentləri də məlumdur. Hazırda Ermənistanda böyük ranqlı məmurlara sutinyorluq edir. Ermənistanın keçmiş prezidenti Robert Koçaryan – prezidentliyi dövründə Yunanıstanda ada alıb. “Drako” otellər şəbəkəsi, oğlu Levon üçün yüzlərlə obyekt əldə edib. Ermənistanda bütün zavod və fabrikləri satıb, ölkəni məktəbsiz, uşaq bağçasız və yolsuz qoyub...
“Xalqı öz ətrafında birləşdirən müzəffər Ali Baş Komandan əraziləri işğaldan azad etdi”
Sözügedən məsələ ilə bağlı fikirlərini “Bakı-Xəbər”lə bölüşən siyasi ekspert Elşad Həsənov hesab edir ki, erməni blogerin dedikləri reallığı əks etdirir: “Erməni blogerin məlum açıqlaması nəinki Ermənistanda, digər region ölkələrində də geniş yayılıb və ciddi rezonansa səbəb olub. Çünki ortaya qoyduğu faktlar reallığı əks etdirir. Bu səbəbdən Ermənistan ictimai rəyində müəyyən ajiotaja səbəb olub. Vaxtilə “Böyük Ermənistan” xülyası və Qarabağ dalğasında hakimiyyətə gələn səhra komandirləri erməni xalqını talayıblar. Söhbət əsasən Qarabağda separatçılara rəhbərlik edən Röbert Köçəryan, Serj Sarkisyan, Seyran Ohanyan və bu kimi digər quldurlardan gedir. Robert Köçəryanın prezidentliyi dövründə 1999-cu ilin 27 oktyabrında parlament gülləbaran edildi. Nəticədə hakimiyyətdəki əsas fiqurlar aradan götürüldü və bu da Köçəryana imkan verdi ki, bütün hakimiyyəti öz əlində cəmləyib erməni xalqını talasın. Həmin şovinist qüvvələr indi müxalifətə keçib ədalətdən dəm vururlar. Baqdasaryanın qeyd etdikləri hələ çox kiçik rəqəmlərdir. Bu gün Köçəryan Rusiyanın “Qazprom” şirkətinin səhmdarlarından biridir. Bunlar Ermənistanın bütün zavodlarını, az-çox gəlirli sahələrini satdılar. Ona görə də erməni xalqı bunların iç üzünü yaxşı bilir. Təsadüfi deyil ki, 44 günlük müharibədə Ermənistan məğlub olsa da, 2021-ci ilin iyununda keçirilən parlament seçkilərində erməni xalqı revanşistlərə stavka etmədi. Niyə? Ona görə ki, bunların quldur xislətini bilirdilər. Ancaq 1993-cü ildə ulu öndər Heydər Əliyev hakimiyyətə gələndə bütün məqsədi xalqın sosial vəziyyətini yaxşılaşdırmaq və işğal altında olan əraziləri azad etmək idi. Yəni Azərbaycan güclənməli və ərazilərini azad etməlidir. Həm əhalinin vəziyyəti yaxşılaşdırıldı, həm də Azərbaycan Ordusu gücləndirildi. Ordumuz NATO standartlarına uyğun quruldu, müasir silahlar alındı. Bütün bunların ərsəyə gəlməsində Prezident İlham Əliyevin müstəsna xidmətləri var. Xalqı öz ətrafında birləşdirən müzəffər Ali Baş Komandan əraziləri işğaldan azad etdi. Daha sonra məhv edilən yaşayış məntəqələrinin bərpasına və yenidən qurulmasına start verildi. Məcburi köçkünlər öz yurdlarına dönür. Qısa müddətdə 2 hava limanı tikildi. Bütün bunları revanşistlər öz kor gözləri ilə görür. Bütün bunların fərqində olan erməni blogerlər revanşistləri ifşa edirlər”.
Vidadi ORDAHALLI
