“Mənim Ermənistandakı ermənilərə mesajım belədir ki, biz onların dövləti ilə sülh istəyirik”. Bunu Azərbaycan Prezidenti İlham Əliyev "Euronews" telekanalının müxbirinin “Siz artıq əhaliyə və dövlətlərə mesajlar, o cümlədən təminatlar vermisiniz ki, istəsələr onlara qalmağa icazə veriləcək, onlar qorunacaqlar və burada yaşamağa icazə veriləcək. Bu gün bizi izləyən ermənilərə mesajınız varmı? Şərt deyil, bu hökumət olsun, mən bilirəm, Siz baş nazir Paşinyanla təmasdasınız və ona mesaj göndərmək üçün bizim kameralarımıza ehtiyacınız yoxdur. Bəs bizi izləyən başqa ermənilərə gəlincə necə? Bu gün qarşı tərəfə mesajınız nədən ibarətdir” sualına cavab olaraq deyib.
"Onlara digər mesajım ondan ibarətdir ki, hazırkı geosiyasi vəziyyəti və qüvvələr balansını aydın dərk etmək lazımdır. Uzun illər ərzində Ermənistan liderləri öz xalqını inandırırdılar ki, onlar dünyanın ən güclü ordusuna sahibdirlər, əgər müharibə başlasa, onlar Bakıya çatacaqlar. Müharibə bu hekayələri məhv etdi. Biz nə bu gün, nə də gələcəkdə daha bir müharibə istəmirik. Qarabağdakı ermənilərə gəlincə, onlar qondarma liderlərinin arxasınca getməməlidirlər. Bu liderlər onlara daim yalan danışıblar. Qarabağ erməniləri başa düşməlidirlər ki, təhlükəsizlik təminatları, hüquqlarının, o cümlədən təhsil, mədəniyyət, dini, bələdiyyə hüquqlarının təmin edilməsi ilə Azərbaycan cəmiyyətinin bir hissəsi olaraq onlar normal həyat yaşayacaqlar. Onlar daha manipulyasiyanın girovu olmayacaqlar. Düşünürəm ki, onlar dinləsələr, məni anlayacaqlar. Onlar bilirlər ki, mən öz sözümə əməl edirəm", - deyə Prezident İlham Əliyev bildirib.
Prezident Əliyev avqustun 1-də “Euronews”ə müsahibə verib. Elə həmin gün “Euronews”in əməkdaşı Ermənistanın baş naziri Nikol Paşinyandan da müsahibə götürüb və ona “cənab Baş nazir, sonuncu sual: danışıqlarla bağlı görüşdüyünüz siyasi liderlərə deyil, Azərbaycan xalqına, qarşı tərəfə ünvanlayacağınız hər hansı mesaj varmı? Hazırda bizi izləyənlərə bir mesajınız varmı” sualını ünvanlayıb. Paşinyan isə cavabında “İki siyasətçi bir-biri ilə danışanda, əslində, iki xalq danışır. Çünki bir tərəfdə o xalqın seçdiyi, digər tərəfdə bu xalqın seçdiyi şəxs masa başında oturur. Söhbətlərimizə gəldikdə isə, bunlar beynəlxalq platformalarda müzakirə edilir. Bu, xalqlarımızın rifahına hesablanmış bir addımdır... Yeri gəlmişkən, həm Ermənistan, həm də Azərbaycan ictimaiyyəti öz hakimiyyətlərindən sülh tələb etməlidir. Bu ictimai tələb isə sülhün bərqərar olunmasında çevikliyi həyata keçirmək bacarığı kimi formalaşdırılmalıdır”-deyə bildirib.
“Prezident İlham Əliyevin erməni xalqına müraciəti hər cəhətdən daha maraqlı və daha məzmunlu idi”
Prezident İlham Əliyevin və Paşinyanın müsahibələri arasında böyük fərqi izah edən “Alyans” strateji araşdırmalar mərkəzinin sədri Abutalıb Səmədov “Bakı-Xəbər”ə şərhində “Azərbaycan və Ermənistan liderlərinin “Euronews” kanalına verdikləri müsahibə onların arasında nə qədər böyük fərqin olduğunu bir daha bütün dünyaya nümayiş etdirdi. Müsahibənin sonunda jurnalist hər iki dövlət liderinə müraciət edərək Azərbaycan və erməni xalqlarına nə demək istəklərini soruşdu. Paşinyan əvvəlcə sualdan yayınmağa çalışdı, ancaq alınmadığını görüb Azərbaycan xalqına müraciət edərək öz rəhbərlərinə təzyiq etməyə və sülh sazişinin tezliklə imzalanması üçün cəhdlər göstərməyə çağırdı. Əslinə qalsa, buna qətiyyən ehtiyac yox idi, çünki sülh təşəbbüsü ilə birinci, müharibədən dərhal sonra Azərbaycan Prezidenti çıxış etmişdi və beş baza prinsiplərini də Azərbaycan təqdim etmişdi. Prezident İlham Əliyevin erməni xalqına müraciəti hər cəhətdən daha maraqlı və daha məzmunlu idi. İlk növbədə Ermənistandakı ermənilərə müraciət edərək onları başa salmağa çalışdı ki, Azərbaycan Ermənistanla sülh istəyir və bu sülhə mümkün qədər tez nail olmaq istəyir. Dövlət başçımız Qarabağdakı ermənilərə ayrılıqda müraciət etdi, biz müharibə istəmirik, qondarma liderlərinizin girovuna çevirilməyin, Azərbaycanın tərkibuində sizin hüquq və təhlükəsizliyiniz təmin olunacaq, təhsil, mədəniyyət, dil, bələdiyyə hüquqları və digər məsələlər qısa müddətdə həll olunacaq dedi. Sonda həm ermənilərə, həm də bütün dünyaya yaxşı məlum olan bir həqiqəti dilə gətirdi: “Ermənilər bilirlər ki, mən öz sözümə əməl edirəm”. Bu, əslinə qalsa, Nikol Paşinyanın öz sözünün üstündə durmamasına, verdiyi vədlərə əməl etməməsinə, imzasına sadiq olmamasına bir işarə idi. Azərbaycan Prezidenti bir daha ermənilərin diqqətinə çatdırdı ki, dövlət rəhbəri inandığı sözü deməlidir və dediyi sözün arxasında dayanmağı bacarmalıdır. Prezident onlara dolayısı ilə xatırladıb ki, ötən ilin sonlarında, oktyabr ayında Nikol Paşinyan çox cəsarətli bir bəyanat verib. Demişdi ki, o çox mühüm bir sənədi imzalamağa hazırlaşır, ola bilsin, Ermənistan baş naziririnin bu addımı atmasından sonra ona qarşı ciddi təpkilər göstərilsin, o xəyanətkar elan olunsun. Ancaq buna baxmayaraq bəyan etmişdi ki, mütləq həmin addımı atacaq, Ermənistan, erməni xalqı naminə həmin sənədə qol çəkəcək”-deyə bildirdi.
A.Səmədovun sözlərinə görə, gözlənildiyi kimi, ermənilər bu bəyanata etirazla reaksiya verdilər. Paşinyan dərhal dediyi sözlərdən imtina etdi. Paşinyanın hələ də sülh sazişinə imza atmağa cəsarət etmədiyini deyən A.Səmədov vurğuladı ki, Ermənistanın baş nazirinin siyasi iradəsi olmadığına görə keçən il də sülh sazişi imzalanmadı, bu il də imzalanması ciddi sual altındadır və ümumiyyətlə Paşinyanın nə vaxt cəsarət, siyasi iradə nümayiş etdirib sülh sazişinə qol çəkəcəyi sülh prosesinə cəlb olunan hər kəsi düşündürən bir sualdır. “Azərbaycan Prezidenti öz müraciətində həm erməni xalqına bu həqiqətləri xatırlatdı, həm də Paşinyana bir daha dedi ki, dövlət liderinin, dövlətə rəhbərlik edən şəxsin cəsarətli addımlar atmaq üçün mütləq siyasi iradəsi olmalıdır. Əgər belə bir iradə yoxdursa, nəinki dövlətə rəhbərlik etmək, bu cür adamların heç siyasətdə qalmaq haqqı da yoxdur”-deyə A.Səmədov vurğuladı.
İradə SARIYEVA
