Qarabağdakı separatçılara “liderlik” edən Arayik Arutyunyan yenə də başını başlara qoşub onu aşan məsələlərə meyl göstərib. Oyuncaq “prezident” etiraf edib ki, Rusiya prezidenti Vladimir Putin göndərdiyi çoxsaylı məktublara, müraciətlərə məhəl qoymayıb, bir sözlə, onu əbədiyyən xəttə saxlayıb.
“Mən Rusiya rəhbərliyinə, prezidentə çoxlu məktublar, xahişlər, müraciətlər göndərmişəm... Bu, Rusiya-Ukrayna müharibəsinin nəticəsidir, amma sadə bir həqiqət də var. Biz müşahidə edirik və görürük, Rusiyanın xarici siyasət bloku Ermənistan hakimiyyətini, xüsusən də baş naziri ittiham edir ki, bu, baş nazir tərəfindən Azərbaycanın ərazi bütövlüyünü tanımasının nəticəsidir. Ermənistan Rusiyanı ittiham edir ki, bu, üçtərəfli bəyanatın öhdəliklərindən biridir və Rusiya vəziyyətdən asılı olmayaraq buna əməl etməlidir...”-deyə qondarma “prezident” yenə də Azərbaycanı ittiham etməyə çalışıb.
Araik müsahibəsində “Mən Putinə məktub göndərmişdim, sonra Brüssel görüşü oldu, sonra Azərbaycan və Ermənistan XİN rəhbərləri Moskvada görüşdü.
Bizim vəziyyətimizlə bağlı heç bir irəliləyiş olmadı. Deyəsən, hər kəs bizi Azərbaycan hökuməti ilə baş-başa buraxıb”-deyə də sayıqlayıb.
Araik özü deyir ki, hara müraciət edibsə əli boşa çıxıb, Putin məktuiblarına cavab verməyib, Brüssel və başqa danışıqlarda onların adlarını belə çəkən olmayıb. Araik də günahı Paşinyan hökumətində görür ki, əgər Ermənistan dövləti Azərbaycanın ərazi bütövlüyünü tanımasaydı ki, guya bunlar istəklərinə nail ola bilərdilər və s.
“...Özü etiraf edir ki, müraciətləri, məktubları cavabsız qalır”
Politoloq Tural İsmayılov bu barədə “Bakı-Xəbər”ə şərhində “Araik Arutyunyan əslində artıq tamamilə dalana dirəndiyinin fərqindədir. Onun bu “etirafları” Azərbaycan qanunları qarşısında cavab verəcəyi günün yaxınlaşdığını dərk etməsinin göstəricilərindən biridir. Artıq bilir ki, baş verən bütün hadisələr fonunda onun bir çıxış və qaçış yolu qalmayıb. Məhz başqa yolun qalmadığını anladığı üçün bu tip manipulyasiyalar etməklə məşğuldur. Lakin hesab edirəm ki, bütün bunlara rəğmən bəlli olan məsələlər bundan ibarətdir: bu gün, başda Rusiya və Fransa olmaqla, sepratçılığın bitməsində maraqlı olmayan qüvvələr var. Xarici güc faktorları Azərbaycan ərazilərində Araik kimi terrorçuların və onların zəhərli “ideologiyası”nın ayaqda qalmağını özlərinin geopolitik məqsədlərindən biri hesab edirlər. Araikin bu açıqlaması separatçıların nə qədər xaotik vəziyyətdə olduğunu növbəti dəfə sübut edir. Araik özü etiraf edir ki, müraciətləri, məktubları cavabsız qalır”-deyə bildirdi.
T.İsmayılov qeyd etdi ki, Ermənistan Qarabağ da daxil olmaqla Azərbaycanın ərazi bütövlüyünü tanıyıb. Araikin əlinin hər yerdən çıxdığını deyən müsahibimiz hesab edir ki, o, bu açıqlamaları ilə separatçıların vəziyyətini açıb göstərib.
Leyla QARAXANLI
