Müxalifət təmsilçiləri ilə bağlı və onların öz aralarında çox qəribə bir tendensiya hökm sürür. Bu maraqlı və ziddiyyətli yanaşmanı biz daha çox hansısa müxalif fəalın həbsi ətrafında yaradılan süni ajiotajlarda aydın şəkildə sezirik.
Bu günlərdə müxalif mövqeli bir jurnalistin həbsi ilə bağlı məhkəmədə açıqlanan faktlar və ona verilən reaksiyalar hamının marağına səbəb oldu. Sən demə, həmin jurnalist bir neçə yüksək vəzifəli şəxsi şantaj edərək, onlardan rüşvət alıb. Həmin jurnalisti müdafiə edən müxalif cameənin bu məsələyə qəribə reaksiyası diqqətlərdən yayınmadı. Onlar deyirlər ki, niyə Azərbaycan hakimiyyəti böyük rüşvət alanları deyil, az miqdarda alanları tutur? Həmin cameə guya bununla sözügedən müxalif jurnalist üçün “uğurlu” müdafiə taktikası seçdiyini düşünür. Əslində isə belə taktika ilə özlərini biabır etdilər. Çünki ölkədə kifayət qədər iri korrupsionerlər də korrupsiya ilə mübarizə çərçivəsində tutulur. Nisbətən xırda rüşvət almaq isə bir şəxsə müxalifətçi olduğu üçün güzəşt amili yarada bilməz.
Eyni uğursuz və arqumentsiz müdafiə taktikasını biz iqtisadçı Qubad İbadoğlunun həbsi ətrafında yaradılan səs-küydə də görürük.
134 nəfər ziyalı adından Prezidentə ünvanlanmış müraciətin mətnində toxunulan məsələləri də bu qəbildən primitiv saymaq olar. Əvvəla onu qeyd edək ki, bu imzatoplama kampaniyasının təşəbbüskarı olan ssenarist, kinorejissor, dramaturq, ictimai xadim, siyasətçi və sair statuslarda özünü təqdim etməkdən xoşlanan Eldəniz Quliyevin öz şəxsi personası ziddiyyətli və şübhəlidir. Onun adı cəmiyyətin yaddaşında tsiklik periodlarda siyasətlə məşğul olan adam kimi qalıb. Harda yeni bir qurum yaranırsa, Eldəniz Quliyev oranın vitrinində görünməyə başlayır ki, bu da onun barəsində hər bazarlıq fürsətini həssaslıqla tutan zirəng adam imicini zaman-zaman gücləndirib. Ziyalılar Forumu, Milli Şura, El Hərəkatı və sair. Hətta milliyyətcə talış olmayan və əslən həmin regionun təmsilçisi sayılmayan bu şəxs bir müddət əvvəl Azərbaycan Dövlətçiliyi Naminə Demokratik Talış Birliyi adlı bir qurum da yaratmışdı. Görürsünüzmü, Eldəniz Quliyev hansı budaqdan haralara atlanır?..
İndi belə reputasiyaya malik olan bu adam Prezidentə bir qrup ziyalı adından müraciət edir ki, Qubad İbadoğlunu azad etsin. Əvvəla, ziyalılar adından edilən bu müraciətdə tanınmış ziyalılarla yanaşı, Azərbaycan cəmiyyətində tanınmayan, bəzən reputasiyaları çox bərbad olan, adları ikrah doğuran adamların da adına rast gəlirik. Eldəniz Quliyev belə qarışıq siyahını ərsəyə gətirməklə, adlarını müraciətə çalaq etdiyi əsl ziyalıların da nüfuzunu zədələmiş olub.
Müraciətin mətni və məramı çox primitiv və savadsız notlarla bəzədilib. Çünki qanunvericiliyə görə Prezidentin indiki mərhələdə bu prosesə müdaxilə etmək hüququ və səlahiyyəti yoxdur. Azərbaycan qanunları Prezidentə belə səlahiyyəti vermir. Prezident yalnız müstəsna səlahiyyətindən istifadə edərək cəzaya məhkum olunan şəxsləri əfv edə bilər. Qubad İbadoğlunun isə işi hələ ki, istintaq mərhələsindədir və o, hansısa cəzaya məhkum edilməyib. Deməli, Eldəniz Quliyev belə bir müraciəti tərtib etməklə həm də özünün hüquqi savadsızlığını ortaya qoyub. Daha sonra, müraciətdə Qubad İbadoğlunun guya siyasi sifariş əsasında həbs olunduğuna dair əsası olmayan iddialar irəli sürülür. Elə həmin müraciətdə Qubad İbadoğlunun tərcümeyi-halına nəzər salınır. Oxuyanda belə qənaətə gəlinir ki, İbadoğlu siyasətdən daha çox pedaqoji fəaliyyət və iqtisadi analitika ilə məşğul olub. Onu partiya yox, siyasi bir dərnəyin rəhbəri saymaq olar. Çünki bu adam aktiv siyasətə Müsavatda gedən başqan seçkilərində Arif Hacılıya məğlub olandan sonra atıldı. Yəni onu aktiv siyasətə əqidə deyil, şəxsi prinsiplər gətirmiş oldu. Əvvəlcə hərəkat yaratdı, sonra da onun partiyaya çevrildiyini bəyan etdi. Elə bundan sonra da onunla Müsavatdan üzü bəri uzun yol gəlmiş Adil Qeybulla, Səxavət Əlisoy kimi tanınmış adamlar Qubad İbadoğlunu biabır edərək, həmin partiyadan istefa verdiklərini bildirdilər. Kiçik bir siyasi dərnəyi öz ətrafında toplayıb, onun monolitliyini qorumağı bacarmayan belə bir persona hakimiyyət üçün hansı səviyyədə siyasi rəqib ola bilər ki, onun “şərlənərək” həbs olunmasına fərman verilsin?! Deməli, bu adamın siyasi sifariş əsasında həbs edildiyini iddia etmək demoqogiyadan başqa nəsə deyil. Elə həmin müraciətdə qeyd edilir ki, guya Qubad İbadoğlunun həbsi “Qarabağ məsələsinin həllinə maneə yaradır”. Bunu da onunla əsaslandırırlar ki, guya beynəlxalq aləm bu həbs kontekstində ölkəmizə təzyiqləri artırmış olacaq. Azərbaycan gənc dövlət olsa da, bələ təzyiqlərlə çox üzləşib və bu kontekstdə özünə yaxşı immunitet formalaşdırmağı bacarıb. Eldəniz Quliyev və onun dəstəsi yəqin unudurlar ki, həm Qubad İbadoğlunun həbsi, həm də Qarabağ məsələsi Azərbaycanın daxili işidir. Bu mövzularda kimlərinsə Azərbaycana təzyiq göstərməsi baş tutan iş deyil. Ancaq əslində bu məsələlərdə bir əlaqə var ki, o da məlum müraciətdə qeyd edilməyib. İş burasındadır ki, Qubad İbadoğlunu müdafiə edən beynəlxalq dairələr, həm də Azərbaycanı Qarabağdakı erməniləri “blokadaya” salıb “acından öldürdüyünü” iddia edənlərdir. Hazırda Qarabağ məsələsi Azərbaycanın öz gücü hesabına həlledici mərhələyə qədəm qoyub. Məhz indiki zamanda adlarını ziyalı qoyan bu şəxslər xarici dairələrə züy tutmaq əvəzinə, ölkənin daxilində milli birlik, həmrəylik istiqamətində addımlar atmalıdırlar.
Sonda onu qeyd etmək istərdik ki, hətta “Nobel” adlı ən nüfuzlu mükafatın laureatı olan şəxs belə bu məzmunda olan müraciətə imza azsaydı, bunun bir adı olardı: aparılan istintaqa təzyiq. Bu ziyalılar nə bilir ki, istintaq Qubad İbadoğlu ilə bağlı hansı qənaətə gələcək? İstintaq ittihamın üzərində dayanıb, onu sübut etsə belə, bu işə 3 ierarxiyalı Azərbaycan məhkəmələrində baxılacaq. Nə bilmək olar, bəlkə Qubad İbadoğluna elə bəraət veriləcək. Belə hallara həm bizim, həm də digər ölkələrin hüquqi praktikasında çox rast gəlinib.
Bir də, bütün cəmiyyət bilməlidir ki, bir şəxsin savadlı olması, partiya sədri cildində peyda olması onun cinayət törədə bilməyəcəyinə dəmir zəmanət vermir. Buna görə də, hörmətli ziyalılar, öz imzanıza hörmət qoyun və istintaqın, məhkəmənin sonunu gözləyin!
Əli TURABOV
