Bu günlərdə “Euronews” televiziyasının müxbiri İlham Əliyevdən və Paşinyandan geniş müsahibə götürüb... İmkan tapıb hər iki müsahibəni müqayisə edənlər çox maraqlı nöqtələrə çıxa bilərlər. Mən bu iki müsahibəni başqa bir yazıda müqayisə edəcəm.
Bunu “Bakı-Xəbər” Media Qrupunun rəhbəri, politoloq Aydın Quliyev öz Facebook səhifəsində yazıb.
A.Quliyev daha sonra yazır:
İndi isə baş nazir Paşinyanın öz müsahibəsində buraxdığı "xoruzlar" barədə təhlil aparacam. O "xoruzlar" ki, Yer kürəsində bir neçə milyardlıq tamaşaçı auditoriyası olan “Euronews”un efir məkanında görünür... Beləliklə....
1-ci "xoruz" - Paşinyan deyir ki, Laçın dəhlizi sadəcə yol deyil, 5 kilometr enliyində ərazidir və Azərbaycan onu bloklayıb.
Mənim şərhim - doğrudur ki, 10 noyabr 2020-ci il bəyannaməsində 5 kilometr en məsələsi əks olunub - 6- cı maddə. Paşinyan onu da düz deyir ki, bu yol yox, ərazidir. Axı 5 kilometr enində yol olmaz. Əsas məsələ də elə buradadır. Çünki həmin sənəddə yazılmayıb ki, bu ərazi əbədi olaraq Azərbaycanın əlindən alınır və sülhməramlıların nəzarətinə verilir. 5 kilometr enində ərazi niyə də Azərbaycanın əlindən alınmalıdır?! Axı həmin maddədə 3 il ərzində Laçın dəhlizi üzrə yeni hərəkət marşrutunun, yəni yeni yolun çəkilməsi də nəzərdə tutulmuşdu və icra da olundu. Məntiqi olaraq yeni yol Laçındakı 5 kilometr enində ərazinin avtomatik Azərbaycana qayıtması anlamını verir. Çünki 5 kilometr enində yol olmaz, bu həqiqətən ərazidir. Azərbaycanın ərazisidir. Başqa planetlərdə yaşayanlara məxsus deyil ki... Həmçinin, bəs Paşinyan bəyannamədən düz 2.5 il sonra Azərbaycanın keçmiş DQ və 8 anklav kəndimiz daxil 86.6 min kv. kilometr ərazisini tanımadı? Əgər Laçındakı həmin 5 kilometr enində ərazi Azərbaycanın əlində olmayacaqsa, 86.6 min kv. kilometrlik ərazimizin bütövlüyü pozulmuş olmur, Paşinyan?... Keçək...
2-ci "xoruza". Paşinyan deyir ki, Qarabağ ermənilərinin hüquq və təhlükəsizliyinin beynəlxalq format çərçivəsində müzakirəsinə dair razılaşmamız olsa da, Əliyev bunu pozur.
Mənim şərhim - Bu qədər də olmaz axı, Paşinyan. Prezident Əliyev nə vaxt, kimin yanında səninlə belə məsələdə razılığa gəlib? Fakt varsa, deyin. Ancaq bizim əlimizdə erməni yalanlarını açan faktlar var. Ermənilər bu məsələdə Hikmət Hacıyevə də şər dedilər ki, Vaşinqtonda guya Hikmət Hacıyev Ermənistan TŞ sədri Qriqoryanla bu mövzuda razılaşıb. Yalan dərhal Hacıyevin özü tərəfindən ifşa edildi və bununla da "erməni gölünə daş atıldı". İndi bu böhtanı Paşinyan Prezident Əliyevin ünvanına deyir. Yaxşı deyil, Paşinyan...
3-cü "xoruz" - Paşinyan deyir ki, Avropa İttifaqı missiyasının həm Azərbaycanda, həm də Ermənistanda fəaliyyət göstərəcəyi barədə razılaşmamız olsa da, Əliyev bunu pozur...
Mənim şərhim - Paşinyan burada da açıq yalan danışır. 2022-ci il oktyabrın 6-da dördtərəfli Praqa görüşündə həmin missiya məsələsi ortaya gələndə Azərbaycan onun öz ərazisində fəaliyyət göstərməsinə heç bir razılıq vermədi, Paşinyanın da başa düşəcəyi tərzdə Prezidentimiz bəyanat verdi ki, ərazimizdə missiya yerləşdirmirik, Ermənistan istəyirsə bunu etsin, ehtiyac olsa konkret hallarda, Ermənistandakı missiya ilə əməkdaşlıq edərik. Bu qədər sadə. Bəs sənə noolub, Paşinyan?...
4-cü "xoruz" əvvəlkilərdən xeyli "böyük" olacaq.
Ancaq bu “xoruza” da baxmağa dəyər.
Paşinyan deyir: "Dağlıq Qarabağda humanitar böhrandır... Azərbaycan snayperləri bizim kənd təsərrüfatı ilə məşğul olan traktorçuları vurdular. İndi traktorlar da işləmir, çünki yanacaq yoxdur. Yanacaq olmadığına görə adamlar məhsullarını da tarlalardan yığa bilmir, əgər hansısa möcüzə nəticəsində məhsulu, məsələn, taxılı yığa bilsələr də, yanacaq olmadığına görə, onu taxılüyütmə zavodlarına daşıya bilmirlər, əgər hansısa möcüzə sayəsində un üyüdə bilsələr, yanacaq olmadığına görə, unu çörəkbişirmə sexlərinə çatdıra bilmirlər, əgər hansısa möcüzə hesabına unu çörəkbişirmə sexlərinə çatdıra bilsələr, elektrik və qaz olmadığına görə istehsalat həcmində çörək bişirə bilmirlər, əgər möcüzə ilə hansısa həcmdə çörək bişirilə bilirsə, yenə də nəqliyyat üçün yanacaq olmadığına görə çörəyi mağazalara daşımaq ya mürəkkəb olur, ya da mümkünsüz, əgər hansısa möcüzə ilə çörəyi mağazalara çatdırmaq mümkün olursa, yenə də yanacaq olmadığından ictimai və şəxsi nəqliyyat işləmədiyi üçün adamlar çörək almaq üçün mağazaya gedə bilmirlər, əgər hansısa möcüzə ilə adamlar mağazalara qədər gedib çata bilirlərsə, blokada şəraiti onları işsiz qoyduğu üçün ciblərində çörək almağa pulları yoxdur, əgər hansısa möcüzə ilə çörək pulu tapa bilirlərsə, mağazaların qabağında o qədər böyük növbələr var və çörək də mağazada o qədər azdır ki, çörək almadan evə dönmək zorundadır...
İnanın, dostlar, Paşinyanın bir kəlməsini də o yan, bu yan demirəm . Özü müxbirə necə deyibsə , o cür də yazdım. Onun bu "xoruzu" o qədər biabırçılıqdır ki, ona heç bir şərh vermədən Sizlərin hər birinizin onu lazımınca anlayacağınıza, anlayıb da ürəkdən güləcəyinizə əminəm. Təkcə son cümləsindəki onun özünü ifşa edən məntiqə fikir verin. Əgər blokadanın işsizliyi üzündən heç kimin cibində çörək parası belə yoxdursa, bu parasız adamlar çörək mağazalarının qabağında böyük növbələri niyə yaratmalıdırlar ki?!...
Belə şey olar, Paşinyan?
Bizim xalqımızda tənbəl gəlinlə deyingən qayınanasının məşhur "paltar yumaq" məsələsi burada Paşinyana cavab olaraq nə yada düşür?! Ancaq çox uzundur, dostlarımı çox yazmamaq üçün demirəm...
Tahir TAĞIYEV
