Kollektiv Təhlükəsizlik Müqaviləsi Təşkilati (KTMT) Ermənistanın sərhədyanı ərazilərində müşahidə missiyasının yerləşdirilməsinə hazır olduğunu bildirsə də, Ermənistan bundan qəti şəkildə imtina edir. Bunun əvəzində İrəvan Moskvanı qıcıqlandıracaq növbəti addım atıb.
Belə ki, Avropa İttifaqının (Aİ) Ermənistandakı missiyası Zəngəzur vilayətində ikinci ofisini açıb. Bununla da Aİ-nin Ermənistandakı Mülki Monitorinq Missiyası Zəngəzur vilayətində mövcudluğunu genişləndirir. Missiyanın növbəti ofisi Qafan rayonunda açılıb. Bundan əvvəl eyni ofis Gorusda açılmışdı. Aİ-nin Ermənistandakı missiyasının rəhbəri Markus Ritter çıxışında yeni mərkəzin açılmasının Zəngəzura sülh gətirməsini arzuladığını bildirib: “Zəngəzurda ilk əməliyyat mərkəzinin açılışını alqışlamaqdan xoşbəxtəm. Planımıza əsasən, biz Ermənistanda 6 əməliyyat mərkəzinə malik olmaq niyyətindəyik və demək olar ki, planlarımızı həyata keçirməyə yaxınıq. Biz Ermənistanda işə başlayanda cəmi iki daimi işçimiz var idi. İndi məmnuniyyətlə demək istəyirəm ki, artıq 90 işçimiz var”.
Bir sözlə, İrəvanda Avropa missiyası əməliyyat mərkəzləri açır və bunların sayını 6-ya çatdırmağı planlaşdırır. İşçilərin sayını artıraraq 100 nəfərə çatdırıblar. "Avropa komandası" adlı layihə icra edilir. Aİ hətta Zəngəzur vilayətində ikinci ofisini açıb. Bütün bu deyilənlərin fonunda nə baş verir?
“Bu o deməkdir ki, Ermənistanda Qərblə Rusiya arasında konfrontasiya açıq və kəskin müstəviyə keçir”
Məsələ ilə bağlı “Bakı-Xəbər”ə açıqlama verən AMİP funksioneri Əli Orucovun fikrincə, bu o deməkdir ki, Ermənistanda Qərblə Rusiya arasında konfrontasiya açıq və kəskin müstəviyə keçir: “Ermənistanla Azərbaycan sərhədində həm Avropa İttifaqı müşahidə missiyası, həm də ATƏT-in Monitorinq Mərkəzi İrəvanın təşəbbüsü ilə cari ilin əvvəllərindən fəaliyyət göstərir. Paşinyan bunu guya Azərbaycanın Ermənistanın dövlət sərhədlərini pozmasının qarşısını almaq üçün etdiyini bildirib. Buna qədər isə rəsmi İrəvan çox cəhd etdi ki, Azərbaycanla aralarındakı konfliktə KTMT-ni də cəlb etsin. Ancaq bu niyyət baş tutmayanda alternativ olaraq Qərb seçildi. Təbii ki, İrəvanın bu hərəkəti Moskvanı qıcıqlandırır. Rusiya XİN-i Avropa İttifaqının monitorinq missiyasının Rusiyanın maraqlarına zidd fəaliyyət göstərdiyini və missiyanın hərbi kəşfiyyat məqsədilə regionda yerləşdiyini bəyan etdi. Bu bir həqiqətdir ki, Cənubi Qafqaz uğrunda Qərblə Rusiya arasında ciddi rəqabət gedir. Paşinyan hakimiyyəti də bu rəqabət və mübarizə fonunda öz maraqlarını həyata keçirmək üçün Qərblə Rusiya arasında vurnuxmaqdadır. Ermənistan Rusiyadan nə qədər çox asılı olsa da, Paşinyan bütün vasitələrlə Rusiyanı iqnor etməyə çalışır. KTMT-nin Ermənistan sərhədinə yerləşməsinə razılıq vermir və bunu uzadır. Rusiya israr etsə də, rəsmi cavab verilmir. Hamıya aydındır ki, Paşinyan bunda maraqlı deyil. Buna alternativ olaraq Avropa İttifaqı Monitorinq missiyasına meydan verir. Ermənistanda Avropa missiyası əməliyst mərkəzləri açılır, Zəngəzur vilayətində qurumun ikinci ofis açmasına icazə verir və s. Bütün bunlar Rusiyanın Ermənistandan sıxışdırılmasına Paşinyanın yaşıl işıq yandırması deməkdir. Üstəlik, Ukrayna müharibəsinin uzanması Nikola manevr etmək üçün şans verir. Rusiya əvvəlki durumda olmadığı üçün Ermənistanda kəskin addımlar ata bilmir”.
Vidadi ORDAHALLI
