Ermənistan baş naziri Nikol Paşinyan bugünlərdə ‘Euronews’ telekanalına müsahibəsində, həm hökumət iclasında deyib ki, Azərbaycanla Ermənistan bir-birinin ərazi bütövlüyünü tanımaqıa bağlı razılaşma əldə etsələr də, Azərbaycan Prezidenti İlham Əliyev bunu açıq təsdiqləməyib.
O qeyd edib ki, Brüsseldə Azərbaycanla Ermənistanın bir-birinin ərazi bütövlüyünü tanıması ilə bağlı anlaşma əldə olunub:“Bu, ərazi bütövlüyünün qarşılıqlı tanınmasıdır. O vaxtdan bəri Azərbaycan prezidenti bu razılaşmanı açıq şəkildə təsdiqləməyib. Amma onu təkzib də etməyib. Bu detal etimad mühitinin yaranmasına töhfə vermir”. Paşinyan qeyd edib ki, guya Azərbaycanın zorla müxtəlif yerlərdə bayraq yerləşdirilməsi praktikası sülh prosesini pozmaq aktına bənzəyir. Öz aləmində Azərbaycan sərhədçisinin Həkəri körpüsündə yaralanmasını bununla əlaqələndirib.
Bu boyda yalan olar? Elə sonuncu dəfə Əliyev həmin televiziya kanalına müsahibəsində Azərbaycanın Ermənistana qarşı hər hansı ərazi iddiası olmadığını bəyan edib. Bundan əvvəl də neçə dəfə bunu bəyan edib. Bu açıq təsdiq deyil bəs nədir?
“Zaman İlham Əliyevin atdığı və atacağı addımların vaxt-vədəsini yaxşı bildiyini isbatlayıb”
Sözügedən məsələ ilə bağlı fikirlərini “Bakı-Xəbər”lə bölüşən “SƏS” Media Qrupunun rəhbəri, politoloq Bəhruz Quliyev hesab edir ki, Paşinyan bu kimi sarsaq açıqlamalar verməklə spekulyasiya ilə məşğuldur: “Ümumiyyətlə, Ermənistan baş naziri Nikol Paşinyan atdığı hər bir addımda Azərbaycan Prezidenti İlham Əliyevdən nümunə götürür və onun etdiklərini təkrarlayır. Bildiyiniz kimi, bu yaxınlarda dövlət başçısı Şuşada keçirilən Qlobal Media Forumunda 100-dən artıq kütləvi informasiya vasitələrinin nümayəndələrinə şərait yaratdı ki, sərbəst şəkildə öz suallarını ünvanlasınlar. Bunun ardınca Paşinyan da dərhal İrəvanda mətbuat konfransı təşkil etdi. Həmçinin Prezident İlham Əliyev 2 avqust 2023-cü il tarixində “Euronews” televiziyasına müsahibə verdi və orada bəzi məsələlərə toxundu. Daha sonra Paşinyan da eyni addımları ataraq “Euronews” kanalına müsahibə verdi. Heç şübhəsiz ki, Ermənistan baş naziri bütün bunlarla cənab İlham Əliyevdən özünə bir dərs götürür. Bu gün Azərbaycanın beynəlxalq nüfuzu artıb. Ərazi bütövlüyü, suverenliyi müdafiə olunur və dəstəklənir. Bütün bunlar Prezident İlham Əliyevin ardıcıl, prinsipial, düşünülmüş və məntiqli siyasət yürütdüyünü aydın göstərir. Müharibədən sonrakı dövrdə bəzi xarici KİV nümayəndələri reallıqdan uzaq və əsassız suallar verməklə Azərbaycanın atdığı addımların səhv olduğunu sübut etməyə çalışırdı. Ancaq zaman İlham Əliyevin atdığı və atacağı addımların vaxt-vədəsini yaxşı bildiyini isbatlayıb”.
Politoloq qeyd etdi ki, Paşinyanın istər “Euronews” telekanalına müsahibəsində, istərsə də hökumət iclasında Prezident İlham Əliyevin Ermənistanın ərazi bütövlüyünü açıq təsdiqləmədiyi baradə səsləndirdiyi fikirlər reallıqdan uzaqdır: “O, həmçinin qeyd edib ki, guya Azərbaycanın zorla müxtəlif yerlərdə bayraq yerləşdirilməsi praktikası sülh prosesini pozmaq aktına bənzəyir. Hesab edirəm ki, Paşinyanın dedikləri bir növ Ermənistan auditoriyasına yönəlib. Çünki o dəfələrlə keçirdiyi görüşlərdə, parlament çıxışlarında bildirib ki, rəsmi Ermənistan Azərbaycanın 86,6 min kvadrat kilometr ərazi bütövlüyünü tanıyır. Onun bu etirafı artıq bütün reallıqları ortaya qoyur. Bu isə o deməkdir ki, Qarabağ Azərbaycandır!. İndi isə o, “Euronews” telekanalına müsahibəsində sülh danışıqlarının alınmamasına görə Azərbaycan tərəfi ittiham edir. Bu anlaşılandır, çünki Nikol Paşinyan həm daxili auditoriyada, həm də beynəlxalq ictimaiyyət arasında ciddi problemlər yaşayır. Bu gün faktiki olaraq Paşinyanın əleyhinə həm Ermənistandakı müqavimət hərəkatı, həm də revanşistlər müxtəlif səpkili şüarlarla çıxış edərək onun istefasını tələb edirlər. Bütün bunlara baxmayaraq, Prezident İlham Əliyevin söylədiyi fikirlər və beynəlxalq normativ aktlara cavab verən məlum beş prinsip hər kəsə bəllidir. Belə ki, bizim heç kimin torpağında gözümüz yoxdur və biz sülhün tərəfdarıyıq. Sülhə gedən yolda isə əlimizdən gələn hər şeyi etməyə hazırıq. Bizim sülh yolunda tutduğumuz mövqe, atdığımız addımlar bəllidir”.
Vidadi ORDAHALLI
