Ermənistanın davam edən TIR şousu bu ölkənin Azərbaycanla münasibətlərini normallaşdırmaq niyyətində olmadığını bir daha açıq şəkildə nümayiş etdirir. Belə ki, İrəvan bir neçə gündür Azərbaycanla sərhəddə gözləyən 19 TIR-ı geri çəkmək əvəzinə, onların sayını 21-ə çatdırıb və bununla təxribatçı fəaliyyətinə son qoymaq niyyətində olmadığını göstərib.
Bu xüsusda Rusiyanın “news.ru” portalı olduqca maraqlı məqamlara toxunub. Məlum olur ki, iyulun 25-də xarici işlər nazirlərinin üçtərəfli görüşü başlayan ərəfədə İrəvanda Qarabağa yardım məqsədilə işçi qrup dərhal toplanıb: “İyulun 25-də axşam saatlarında Ararat Mirzoyan Moskvada sülh sazişi ilə bağlı danışıqlar apararkən, İrəvanda Qarabağ əhalisinə yardım məqsədilə işçi qrupu iclas keçirib. Bu işçi qrup dekabrın sonunda, yəni Ermənistan hakimiyyəti ilk dəfə “Laçın yolunun blokadaya alınması” ilə bağlı şikayətlər edən zaman yaradılıb. Bu qrup təcili olaraq iyulun 26-da Qarabağa humanitar yardım göndərmək qərarına gəlib. Səhərə yaxın İrəvanda Xarici İşlər Nazirliyinin binası qarşısında düzülən 19 yük maşınından ibarət avtomobil karvanı yaradılıb. Karvanın yola düşməsi isə rəsmi hadisə xarakteri alıb: Ermənistan hakimiyyəti xarici səfirliklərin əməkdaşlarını dəvət edib”.
Bütün bunlarda məqsəd nədən ibarətdir? Məhz üçtərəfli görüş hələ bitməmiş Ermənistanın bu addımı atması nə deməkdir?
“Paşinyan bir tərəfdən sülhdən dəm vurur, o biri tərəfdən rəsmi səviyyədə 19 TIR-ı nümayişkəranə şəkildə sərhədə yönəldib”
Sözügedən məsələyə aydınlıq gətirən politoloq Qabil Hüseynli “Bakı-Xəbər”ə açıqlamasında qeyd etdi ki, eyni vaxtda bunların baş verməsi bir sıra məqsədlərə hesablanıb: “Başlıca məqsəd görüşün keçirildiyi vaxt Azərbaycanı təxribata çəkmək olub: beynəlxalq ictimai rəyi bu təxribata yönəltməyə çalışmaq və ölkəmizi dünya miqyasında gözdən salmaq. Eyni vaxtda digər təxribat törətmək və Azərbaycan Ordusunu müdaxilə etməyə məcbur etmək. Daha sonra dünyaya hay-həşir salmaq ki, guya Azərbaycan Qarabağda erməniləri soyqırıma məruz qoyur. Ermənilərin guya zorla sıxışdırılıb çıxarılması prosesi həyata keçirilir. Deməyim odur ki, erməni təxribatı formasına görə müxtəlif və rəngarəngdir. Özü də onlar üçün adi bir məsələdən təxribat qurmaq və bunu həyata keçirmək elə də çətin deyil. Belə işlərlə məşğul olmaq ermənilərin yaşayışının ayrılmaz hissəsinə çevrilib. Paşinyan bir tərəfdən sülhdən dəm vurur, o biri tərəfdən rəsmi səviyyədə 19 TIR-ı nümayişkaranə şəkildə sərhədə yönəldib. Özü də üçtərəfli görüşün keçirildiyi vaxt. Əslində bu kimi erməni təxribatı yeni bir şey deyil. O mənada ki, əvvəlki təcrübəyə baxsaq, dəfələrlə bunun şahidi olmuşuq. Hansısa vacib danışıqlar ərəfəsində Ermənistan atəşkəsi intensiv şəkildə pozurdu. Nə böyük çətin iş idi 19 TIR-ı göndərməzdən əvvəl Azərbaycana müraciət etmək, rəsmi Bakının razılığını almaq? Demək məqsəd Qarabağ ermənilərinə yardım etmək yox, təxribat törətmək və Azərbaycanı beynəlxalq aləmdə pis vəziyyətdə qoymaq olub. Laçın yolu sankı bunlar üçün bir karvansara yoludur. Heç nəyə məhəl qoymadan sərhəd-buraxılış məntəqəsinə göndərirlər. Halbuki, sərhəd-buraxılış məntəqələri ölkə qanunları, beynəlxalq hüquq normaları ilə tənzimlənir. Bu dərəcədə Azərbaycan dövlətinə hörmətsizlik etmək, beynəlxalq qanunları heçə sayaraq belə provokasiyaya getmək murdar bir işdir. Bu da yalnız ermənilərə xas xüsusiyyətdir”.
Vidadi ORDAHALLI
