Anti-Azərbaycan və anti-Türkiyə mövqeyi ilə tanınan ermənipərəst ABŞ jurnalisti Lindsi Snell 21-23 iyul tarixlərində keçirilən Şuşa Qlobal Media Forumunda iştirak edən jurnalist və ekspertlərin siyahısını paylaşıb və forumda iştirak edən əcnəbi jurnalistləri təqib etməyə çağırır, onların nüfuzuna xələl yetirməyə çalışır və bunu onların guya "Qarabağda 120 min sakini blokadaya alan" ölkədə keçirilən forumda iştirak etmələri ilə əsaslandırır.
Qeyd edək ki, tədbirdə 49 ölkədən 150 xarici qonaq, o cümlədən dünyanın 34 ölkəsinin dövlət informasiya agentliyi, 12 beynəlxalq təşkilat və media qurumu iştirak edib. Bundan başqa, iştirakçılar arasında 60 yerli media rəhbəri və nümayəndəsi yer alıb. Əlbəttə, onların arasında keçmiş cinayətkara yer yoxdur. Şərhlərə görə, bu qədər böyük sayda xarici jurnalistin məmnuniyyətlə Şuşada keçirilən media forumunda iştirak etməsini, işğaldan azad edilmiş ərazilərdə aparılan bərpa və yenidənquma işlərini görməsini, Snelldə olmayan obyektivliyi və sağlam düşüncəni nümayiş etdirməsini sadəcə həzm edə bilmir.
O forumda xarici ölkələrdən çoxlu sayda jurnalist iştirak edirdi, əksəriyyətinin də böyük təsir dairəsi var. Azərbaycan Prezidentinin də orada çıxışı, Azərbaycanın bugünkü siyasəti, müharibədən sonrakı vəziyyət və sair böyük təəssürat yaratmaq gücündə idi, ölkəmizin siyasətinin ən müxtəlif istiqamətlərini dünyaya çatdırmaqda böyük rol oynayırdı. Üzdəniraq jurnalistin əslində hədəfi o forumda Azərbaycan Prezidentinin dünya mediasına daha yaxşı müzakirə materialları, mövzuları verməsinin qarşısını almaq, onları neytrallaşdırmaq olub, amma buna da, təbii, nail ola bilməyib. Çünki ölkə başçısının bu forumda çıxışı artıq bütün dünyada geniş müzakirə mövzusuna çevrilib.
Şuşa forumunda Prezidentin çıxışından sonra forumun belə hədəfə götürülməsinin səbəbi nədən ibarətdir?
“Ən müxtəlif yollarla forumun işini pozmağa, onu dağıtmağa çalışdılar, orada iştirak edən adamları hədələdilər ki...”
Mövzu ilə əlaqədar şərhində media eksperti Müşfiq Ələsgərli “Bakı-Xəbər”ə “Şuşa Qlobal Media Forumu keçirildiyi ilk gündən etibarən erməni tərəfin narahatlığı bizə çatdı. Forumun açılış günündə məlumat aldıq ki, erməni tərəf bu forumun pozulması, baş tutmaması üçün ciddi addımlar atır. Əvvəlcə 15 Ermənistan media təşkilatı vahid müraciət qəbul etdi, o müraciəti forumda iştirak edən xarici jurnalistlərə ünvanlamışdılar. “Həmkar müraciəti” etmişdilər ki, xaricdən gələn jurnalistlər “Arsax”ın “blokada”sına etiraz etsinlər, bu yöndə məsələlər qaldırsınlar, forumu tərk etsinlər, yaxud oradan təxribatçı informasiya yaysınlar. Onların bu niyyəti baş tutmayanda ikinci bir hiyləyə əl atdılar. Belə ki, forumda iştirak edən xarici jurnalistlərin e-mail adreslərinə, vatsap nömrələrinə mesajlar göndərdilər, onları təhdid etməyə, hədələməyə başladılar ki, əgər forumu tərk etməsələr, yaxud orada “Arsax”ın “problemləri”ni qaldırmasalar onlar haqqında qarayaxma kampaniyası aparılacaq. Yəni ermənilər bunu hələ forumun ilk günlərindən etmişdilər”-deyə bildirdi.
M.Ələsgərlinin sözlərinə görə, üçüncü bir istiqamət kimi isə onlar forumda iştirak edən xarici jurnalistlərin adından yalançı açıqlamalar dərc etməyə başladılar. Artıq Azərbaycan tərəfin bunu faktlarla sübut etdiyini deyən M.Ələsgərlinin dediyinə görə, Ermənistan mediasında forum iştirakçısı olmuş şəxslər adından yalançı açıqlamalar getdi, halbuki, o şəxslərin bu cür açıqlamaları olmamışdı. “Ən müxtəlif yollarla forumun işini pozmağa, onu dağıtmağa çalışdılar, orada iştirak edən adamları hədələdilər ki, Azərbaycanın bu uğurlu işinə kölgə salsınlar. Təbii ki, hələ də erməni şəbəkəsi sakitləşməyib və Lindsi Snellin açıqlamalarını da bu qəbildən hesab edirəm. Ermənilər harda əlləri çatan, sözləri keçən şəxslər varsa, bu istər “beynəlxalq təşkilatlar”da işləyən adamlar, istərsə də xaricdə çalışan imza sahibi olan jurnalist olsun, onlardan istifadə edərək öz təsirlərində olan şəxslər vasitəsilə bu foruma qara yaxmağa, onu gözdən salmağa çalışırlar. Proses bu gün də davam edir, amma təbii ki, ciddi bir nailiyyətləri yoxdur. Forum da öz işini uğurla başa vurdu, orada qəbul edilən qərarlar da, keçirilən müzakirələr də dünya gündəmində oldu. Burada ortaya bir sual çıxır ki, ermənilər bu forumun keçirilməsindən niyə bu qədər narahat olublar, nə üçün ajiotaj içindədirlər, hansı səbəbdən bu forumu bu qədər hədəfə alırlar? Bu da təbii məsələdir. Burada iki mühüm səbəbi göstərmək istəyirəm: çünki forum çox möhtəşəm təşkil olunmuşdu, bura təqribən 50 ölkədən 150 əcnəbi jurnalist gəlmişdi. Onlar Füzuli hava limanında təyyarədən düşüb Şuşaya qədər yolboyu olan dağıntılara baxdılar, erməni vəhşiliklərini gördülər və hər biri həm sosial şəbəkədə post paylaşdı, həm də məqalələr yazdılar, beləliklə, erməniləri dünyada ifşa etmiş oldular. Təsəvvür edin ki, üç gün müddətində Azərbaycan məsələsi, işğaldan azad edilmiş ərazilər, erməni vəhşilikləri dünya gündəmində oldu. Bu baxımdan, ermənilərin “narahatlıqları” başadüşüləndir. Məsələnin ikinci tərəfi ondan ibarətdir ki, bildiyimiz kimi, Ermənistan və Azərbaycan arasında sülh danışıqları artıq yekun fazaya daxil olub, cənab Prezident də elan edib ki, bu ilin sonuna qədər müəyyən sənədlərin imzalanması gözlənilir. Yəni hər şeyin bir limiti olduğu kimi, danışqların da bir limiti var, o tamamlanmaq üzrədir. Məsələ ondadır ki, bu danışıqların gedişatında ermənilər heç bir nailiyyət qazana bilməyiblər. Yəni onlar 2020-ci ildə döyüş bölgəsində uduzduqları kimi, indi də diplomatiya müstəvisində uduzurlar və onların əsaslı hesab etdikləri tələblərin heç biri hələlik sülh danışıqları masasında yoxdur. Bu baxımdan ermənilər çox narahatdırlar və müxtəlif təxribatlarla əl atırlar. Hətta Laçın sərhəd-buraxılış məntəqəsində “humanitar yük” adı altında keçirilən təxribatı da bilirsiz. Yəni həm Şuşa Qlobal Media Forumunu qaralamaq, həm Azərbaycana qarşı yeni informasiya hücumu başlatmaq, həm də müxtəlif üsullardan istifadə etmək onların ciddi narahatlığından, uduzmaqlarından və aqressiyalarından irəli gəlir”-deyə bildirən M.Ələsgərli qeyd etdi ki, ermənilərin heç bir nailiyyəti olmayacaq, döyüşdə uduzduqları kimi, diplomatiya sahəsində də, informasiya cəbhəsində də məğlub olublar və olacaqlar da.
İradə SARIYEVA
