06/02/2023 13:04
728 x 90

Azərbaycan Qarabağdakı ermənilərlə bağlı yeni prosesə start verdi – Laçın dəhlizində 3 saatlıq gərginlik...

img

Son günlərin ən çox diqqətçəkən hadisələrindən biri də Azərbaycanın bir sıra müvafiq dövlət qurumlarının Rusiya sülhməramlı qüvvələrinin müvəqqəti yerləşdiyi Azərbaycan ərazilərində apardığı ekoloji monitorinqdir. Bu fonda həyata keçirilən proses Ermənistandan Qarabağa Laçın vasitəsilə daxil olan yolun müvəqqəti bağlanmasına da gətirib çıxarıb. Yol təxminən 3 saat bağlı qalıb. Amma bütün bu baş verənlər ermənilər üçün ciddi dərs olub. Onlar bir daha əmin olublar ki, Azərbaycan istənilən vaxt Laçın yolunu bağlaya bilər.

Xatırladaq ki, bu günlərdə Ekologiya və Təbii Sərvətlər Nazirliyi, İqtisadiyyat Nazirliyi yanında Əmlak Məsələləri Dövlət Xidməti və “AzerGold” Qapalı Səhmdar Cəmiyyətinin əməkdaşları Rusiya sülhməramlı qüvvələrinin müvəqqəti yerləşdiyi Azərbaycan ərazilərinə keçərək, Xocalıda sülhməramlı qüvvələrin qərargahında sülhməramlıların komandanlığı ilə müzakirələr aparıblar. Müzakirələr əsnasında Rusiya sülhməramlı qüvvələrinin müvəqqəti yerləşdiyi Azərbaycan ərazilərində aparılan qeyri-leqal iqtisadi fəaliyyətlər çərçivəsində faydalı qazıntıların qanunsuz istismarı, bundan irəli gələn ekoloji və digər törəmə fəsadlarla bağlı ciddi narahatlıq və narazılıq bir daha ifadə olunub. Bu xüsusda, faydalı qazıntıların qanunsuz istismarının aparıldığı yataqlarda və müvafiq digər məntəqələrdə monitorinq, əmlakın inventarizasiyası və ekoloji araşdırma işlərinin aparılmasının vacibliyi vurğulanıb. Müzakirələrdən sonra Azərbaycan təmsilçiləri Şuşa şəhərinə qayıdıblar. Xocalıda sülhməramlı qüvvələrin qərargahında keçirilmiş müzakirələrin nəticəsi olaraq qeyd olunan fəaliyyət istiqamətləri üzrə ərazidə işlərin aparılması üçün Azərbaycan Respublikası Ekologiya və Təbii Sərvətlər Nazirliyi və digər aidiyyəti qurumların iştirakı ilə “yol xəritəsi”nin hazırlanmasına başlanılıb. Bütün bunlar o deməkdir ki, Rusiya sülhməramlı qüvvələrinin müvəqqəti yerləşdiyi Azərbaycan ərazilərində tezliklə genişmiqyaslı monitorinqlərə başlanacaq. Erməni tərəfi artıq baş verənlərdən ciddi narazılıq ifadə edir. Xüsusən də Laçın yolunun 3 saatlıq belə bağlanması ermənilərdə ciddi əndişəyə səbəb olub. Qarabağdakı separatçı rejim bildirir ki, Azərbaycan tərəfi ilə üç saatdan çox davam edən danışıqlardan sonra yol açılıb: “Danışıqlardan sonra Qarabağı Ermənistanla birləşdirən yeganə magistral hər iki istiqamətdə bütün növ nəqliyyat vasitələri üçün açılıb”. Separatçı rejim həm də Azərbaycanı Ermənistanla “quru əlaqəni kəsmək” və “mülki əhalini psixoloji terrora məruz qoymaq” məqsədi ilə “təxribatda” ittiham edib. Separatçı rejim onu da  bildirib ki, hadisə ilə bağlı bölgədə yerləşən Rusiya sülhməramlı qüvvələrinin komandanlığı məlumatlandırılıb. Amma “Milli müdafiə” jurnalının baş redaktoru, rusiyalı hərbi ekspert İqor Korotçenko qeyd edi rki, əslində, burada ermənilərin yeni oyun cəhdlərini görmək mümkündür: “İrəvan növbəti dəfə feyk yaymaqla məşğuldur. Belə ki, erməni mediası və sosial şəbəkə istifadəçiləri aktiv şəkildə “Azərbaycan 10 noyabr bəyanatını kobud şəkildə pozur, soyuq havada Qarabağa yolu bağlayır, humanitar fəlakət yaratmağı hədəfləyir” kimi yalan tirajlayır. 3 dekabr saat 11:00-da Ekologiya və Təbii Sərvətlər Nazirliyinin, İqtisadiyyat Nazirliyi yanında Əmlak Məsələləri Dövlət Xidmətinin və “Azergold” QSC-nin əməkdaşları sülhməramlı qüvvələrin Xankəndi və Şuşa arasında olan nəzarət-buraxılış məntəqəsinə yaxınlaşıb və regionun ekoloji problemləri ilə bağlı monitorinqə başlamaq istəyini bildirib. Danışıqlar zamanı nəzarət-buraxılış məntəqəsində təbii tıxac yaranıb. Laçın dəhlizinin bağlanılmasından isə söhbət gedə bilməz. Sadə bir məsələ göz qabağındadır: Ermənistan yox yerdən yalan istehsal etməyə davam edir ki, regionda gərginlik yaratsın. Ermənistandan fərqli olaraq, Bakı və Moskva real strateji tərəfdaşdır, ona görə də Azərbaycan Kremlin diqqətini yayındırmamaq üçün Qarabağda indi gərginliyə getməyəcək. Hazırda Qərb ağalarından İrəvana verilən əsas tapşırıq Qarabağda maksimum destabilizasiya yaratmaqdır ki, Moskvanın Ukrayna istiqamətində güc və diqqəti yayınsın. Buna görə də Ermənistanın bütün bəyanatlarına şübhə ilə yanaşılmalıdır”.

İqor Korotçenko onu da qeyd edib ki, erməni lobbisinin, beynəlxalq erməni diasporunun və onların arxasında duran Qərb xüsusi xidmət orqanlarının hədəfi və tapşırığı rus sülhməramlıları ilə Azərbaycan ordusu arasında toqquşma yaratmaq və bunu Rusiya-Azərbaycan genişmiqyaslı hərbi münaqişəsinə çevirməkdir. O bildirib ki, bu münaqişə halında Türkiyə və onun üzvü olduğu NATO ölkələrinin hərbi kontingenti Cənubi Qafqaza daxil ola bilər: “Əslində, söhbət hazırda xüsusi hərbi əməliyyat keçirən və bütün hərbi və iqtisadi səylərini bunun üzərində cəmləyən Rusiya Federasiyasına qarşı ikinci cəbhənin açılmasından gedir. Və bütün bunlar ona görədir ki, erməni millətçilərinin Qarabağı Azərbaycandan ayırmaq və orada çürümüş və korrupsioner separatçı administrasiyanı saxlamaq istəklərini həyata keçirsinlər. Bir vaxtlar erməni millətçiləri artıq SSRİ-nin dağılması mexanizmini işə salmışdılar, indi də Rusiya Federasiyasının dağılması mexanizmini işə salmaq istəyirlər. Moskva praktiki siyasətində Rusiya ilə Azərbaycan arasında Qarşılıqlı müttəfiqlik fəaliyyəti haqqında Bəyannamənin əsas prinsiplərindən çıxış etməlidir. Qarabağ Azərbaycandır! Azərbaycanın Qarabağ iqtisadi rayonu ərazisində fəaliyyət göstərən erməni separatçıları Rusiyanın qətiyyən nə dostu, nə də müttəfiqidir. Rusiya Federasiyası öz milli maraqlarının zərərinə dünya ermənilərinin eqoist siyasi maraqlarının həyata keçirilməsi üçün alət olmamalıdır və olmayacaq da. Kaliforniyada isə “Artsax” yaradılmalıdır – orada şərait, iqlim və demoqrafik vəziyyət kifayət qədər uyğundur: ATƏT-in Minsk Qrupu - kömək edin!”. Hazırda baş verənlər rəsmi Bakının Azərbaycanın Xankəndi və ətraf bölgəsi ilə bağlı konkret və qətiyyətli addımlar atmaq ərəfəsində olduğunu göstərir.

Nahid SALAYEV

Peşə etikası

Son xəbərlər