Ukraynanın paytaxtı Kiyevdə şiddətli qarşıdurmalar davam edir. Rusiya hücumlarını daha da gücləndirib. Şəhər ətrafındakı yaşayış məntəqələrində hər iki ölkənin əsgərləri arasında gərgin toqquşmaların olduğu bildirilir.
Ukrayna daxili işlər naziri Anton Qeraşenko Rusiyanın Ukraynanın bəzi şəhərlərinə, xüsusən də Vasilkov şəhərinə ballistik raket hücumu təşkil etdiyini açıqlayıb.
Gecə davam edən toqquşmlar zamanı həm Ukrayna, həm də Rusiya əsgərləri əsir götürüblər. Hər iki tərəfdən ağır itkilərin olduğu bildirilr.
XXX
Rusiyanın ələ keçirməyə çalışdığı Ukraynanın paytaxtı Kiyevdə Ukrayna İnfrastruktur Nazirliyi ətrafında toqquşmalar şiddətlənib. ən son məlumatlara görə, şəhərdə küçə döyüşləri başlayıb. Qeyd edilir ki, ruslar paytaxtın əsas meydanına girməyə çalışır.
Mülki insanların sığındığı Kiyev metrosunda isə elektrik enerjisi kəsilib. Ukraynadan mülki şəxslərin başqa sığınacaqlara köçürüldüyü açıqlanıb. Xarkov şəhəri də güclü bombardman altındadır.
Pentaqonun açıqlamaıarına görə, Rusiya işğal üçün 150 mindən çox əsgər göndərib ki, onların da yarıdan çoxu Ukraynaya girib.
Bununla yanaşı Qərb ölkələri Ukraynaya silah göndərməkdə davam edir.
Adının açıqlanmasını istəməyən yüksək səviyyəli Pentaqon rəsmisi ABŞ-ın Ukraynaya 350 milyon dollarlıq müdafiə yardımına icazə verdiyini bildirib: "Bu yardımlara tank əleyhinə, yüngül silahlar və sursatlar daxil olacaq".
Almaniya hökuməti Ukrayna silahlı qüvvələrinə dəstək üçün Almaniya ordusunun ehtiyatlarından 1000 tank əleyhinə və 500 Stinger raketi göndəriləcəyini açıqlayıb.
Belçika Rusiyanın hücumuna məruz qalan Ukraynaya dəstək üçün hərbi texnika, 2 min avtomatik silah və 3 min 800 ton yanacaq göndərir.
Fransa da Ukraynaya daha çox hərbi texnika tədarük edəcəyini açıqlayıb.
Bildirlir ki, göndərilən silahlar Ukraynanın qərbində bu ölkəyə təslim ediləcək.
Bu arada, Qərb ölkələri NATO-nun şərq cəbhəsini dəstəkləmək üçün Rusiyaya sərhəd ölkələrə hərbi qüvvə toplamaqda davam edir.
Tahir TAĞIYEV
