Qazaxıstanda Sovet İttifaqının dağılmasından sonra ölkə tarixində ən şiddətli hadisələrə səhnə olur.Yanacağı bahalaşmasına etirazlarla başlayan və sonradan qarşıdurmalara çevrilən hadisələrdə ən azı 164 nəfər həyatını itirib, onlarla ictimai bina yandırılıb.
Bütün bunların baş verməsi fonunda ölkənin birinci prezidenti Nursultan Nazarbayevin görünməməsi və hadisələrə heç bir reaksiya verməməsi ciddi müzakirələrə səbəb olub. Belə hesab edilir ki, Nazarbayevlə hazırki prezident Tokayev arasında ziddiyyət yaranıb. Tokayevin Nazarbayevi Təhlükəsizlik Şurasının sədri, Nazarbayevin qardaşı oğlu Samat Abışı isə Milli Təhlükəsizlik Komitəsinin sədr müavini vəzifələrindən uzaqlaşdırması bu ehtimalı gücləndirir.
Belə bir vaxtda Britaniya mətbuatı Qazaxıstanın keçmiş prezidenti, 30 il ölkəyə rəhbərlik edən Nazarbayevin qızının dəbdəbəli həyatı ilə bağlı məqalə dərc edib.
“The Telegraph” yazır ki, Qazaxıstanın keçmiş prezidentinin qızı 220 milyon funt-sterlinq sərvətini ölkədən çıxardıqdan sonra 18 milyon funt-sterlinq dəyərində lüks təyyarə və 8,75 milyon funt-sterlinqə malikanə alıb.
41 yaşlı Aliyə Nazarbayeva iki maliyyə məsləhətçisinə Lixtenşteyndən Britaniyanın Virgin Adalarındakı xarici trest və şirkətlərə pul köçürməsini tapşırdıqdan sonra Böyük Britaniyada yaşamaq icazəsi almaq üçün Londonun şimalındakı Heyqeytdə malikanə və bir “Challenger Bombardier” təyyarəsi alıb.
Dubayda 14 milyon dollarlıq əmlakın alınmasını da əhatə edən alış-veriş 2006-cı ildə baş tutub.
Tahir TAĞIYEV
